Mopɛpɛ makasi mpe mpela oyo ezindisaki bandako mingi etyaki bomoi ya bato mingi na Congo (Kinshasa) na likama. Filiale ya Batatoli ya Yehova ya Congo elobi ete bandeko mingi bazwaki makama na mpela wana. Kutu likambo ya mawa, na engumba mokonzi Kinshasa, ndeko mobali moko akufaki na mpela yango.

Filiale ya Batatoli ya Yehova ya Congo elobi ete:

• Na sudi-wɛsti ya etúká ya Kasai, mbula mpe mipɛpɛ ya makasi ebebisaki bandako ya mabota 6 ya Batatoli ya Yehova.

• Ndako ya Bokonzi moko ezindaki mpenza na mai na etúká ya Sud-Ubangi. Masangá 3 oyo soki tosangisi basakoli na yango nyonso bazalaki 69 nde ezalaki kosalela Ndako ya Bokonzi yango. Mpela yango esimbaki mpe mabota 22 na etúká yango. Filiale eponaki mobongisi-nzela monene moko ná nkulutu mosusu mpo na kobongisa makambo mpo na kopesa lisalisi mpe lisusu kosalisa na elimo bandeko oyo bakutanaki na likama yango.

• Na etúká ya Tshopo, Basɛngaki bandeko oyo bafandaka pembeni ya ebale congo bátika bandako na bango. Mpe, Ndako ya Bokonzi moko ezindaki na etúká yango.

• Masangá mingi na engumba mokonzi kinshasa emonisi ete mabota soki 80 ezwaki makama na mpela yango.

Lokola mpela yango ebakisi bosɔtɔ na bisika wana mpe bosɔtɔ yango ekoki kobimisa bamaladi mabe, filiale ezali kopesa basakoli malako etali sante mpo na komibatela.

Atako makambo wana ya mpasi mpenza, bandeko bazali kokoba kosalisana na biloko lokola bilamba to mpe bilei. Komite ya kopesa lisungi oyo filiale ezali kotambwisa, ezali mpe kosalisa bandeko.

Tozali na kondima ete mabondeli na biso, biloko ya kobikela mpe lisalisi ya elimo oyo Yehova azali kopesa na nzela ya ebongiseli na ye ‘ekobɔndisa baoyo bazali kolela.’​—Yisaya 61:1, 2.