Mosala ya kotonga Betele ya sika na engumba Lubumbashi na République Democratique du Congo ezali se kokende liboso. Bandeko ya libota ya Betele soki 260 bakokende kofanda na bandako yango ya sika kobanda na sanza ya 05/2022, mpe bandeko mosusu ya Betele 131 bakotikala na Betele ya Kinshasa. a Mosala ya kotonga bandako mpe babiro mosusu pene na Betele ya Kinshasa esilaki kobanda. Bandeko ya Betele soki 48 bakokende kofanda na bandako yango ntango mosusu nsima ya sanza ya 01/2024. Lokola mosala ya kosakola ezali kobota mbuma mingi awa, bandako yango ya sika ekosalisa mingi mpenza.

Na boumeli ya mobu ya mosala 2021, bandeko ya République Démocratique du Congo bayekolaki Biblia na bato koleka 250 000. Bato koleka milio moko bayanganaki na Ekaniseli ya liwa ya Kristo. Sikoyo, na Betele ya Congo Kinshasa ezali na bandeko 394.

Lokola ezalaki mpasi kozwa bisika ya kotonga bandako na Kinshasa, bandeko balukaki bisika na bingumba mosusu. Bazwaki esika ya malamu mpenza na engumba Lubumbashi; esika oyo ekokaki kosalisa mpo na kotonga Betele ya sika mpe bandako mosusu na mikolo ezali koya.

Betele ya Lubumbashi ezali na ntaka ya kilomɛtrɛ 2 300 longwa na Kinshasa. Lopango ya Betele ya Lubumbashi ezali 12 hectare. Na lopango yango, bakotonga bandako mpo na kolala, babiro, esika ya kobomba biloko, ndako ya kolya, mpe bisika ya masano.

Mosala ya kotonga bandako yango ebandaki na sanza ya 11/2020. Kasi mosala yango ekutanaki na mikakatano mingi mpo na maladi mabe oyo ya Coronavirus.

Ndeko Robert Elongo, oyo azali na komite ya filiale ya Congo Kinshasa, alobi boye: “Lokola bandelo ya bikólo mingi ekangamaki, ezalaki mpenza mpasi tózwa bisaleli ya kotonga. Yango esali ete mosala yango eumela.”

Atako bongo, ndeko Elongo abakisi ete: “Kaka na mbula moko mpamba, 40% ya eteni ya ebandeli ya mosala yango esalemi.”

Emonani ete Yehova azali mpenza kopambola mosala yango. Tozali kobondela ete bandako yango ya sika epesa litatoli epai ya bato oyo bafandi na engumba yango mpe ekumisa nkombo ya Yehova.​—Matai 24:47.