Ata na ntango ya maladi ya coronavirus, bandeko na biso na République Démocratique du Congo mpe na République du Congo, bazali konyokwama na mai oyo ezali kozindisa bamboka, mpe na bitumba oyo ezali kosila te. Filiale ya Congo-Kinshasa ekambaka mosala na mboka mibale, mpe bazwaki bibongiseli bápesa bandeko biloko ya kolya mpe bálendisa bango na Biblia. Filiale yango esali bakomite 57 ya kopesa lisungi epai ya bandeko oyo bazwaki makama na teritware yango mobimba mpo na kosalisa bandeko yango na biloko oyo basengeli na yango. Tii sikoyo, bandeko yango basalisi bandeko koleka 90 000.

Nsima ya bambula makasi oyo ebɛtaki na bitúká ya ɛsti na République Démocratique du Congo na mokolo ya 16 mpe 17/04/2020, basakoli 139 batikaki bandako na bango. Bakendaki kofanda na bandako ya bandeko mosusu. Bandeko oyo bayaki mpo na kopesa lisungi na teritware wana bazali kosala makasi básalisa bandeko oyo balongwaki na bandako na bango bázwa bandako oyo bakoki kofanda mpo na mwa mikolo mpe basusu bázwa bandako na bango ya libela.

Bandeko bazali kopesa makabo mpo na kosunga bandeko mosusu. Na teritware moko, basakoli basangisaki makemba kilo 700, masangu kilo 400, mpe fufu ná mpondu kilo 220.

Lisusu, basakoli 60 oyo bazali na masangá oyo ezali na ntaka ya kilomɛtrɛ 26 bapesaki bandeko 50 oyo bakimaki etumba bisika ya kolala. Basakoli bazalaki kokabola bilei oyo bazalaki na yango na bandeko mosusu tii ntango oyo komite ya kopesa lisungi eyaki kopesa bango biloko.

Tata ya libota moko na Brazzaville, mboka-mokonzi ya République du Congo, alobi boye ntango bapesaki ye biloko: “Bomoi ekoki kobongwana kaka na mbala moko. Nazalaki na mosala mpe bazalaki kofuta ngai mwa mbongo, mwasi na ngai mpe azalaki na mwa mosala na ye, ezalaki kosalisa biso tókokisa bamposa na biso. Ntango kaka maladi ya coronavirus ebandaki, misala nyonso esilaki. Kasi elikya na biso epai ya Yehova esili te. Ntango tozalaki kolobela ndenge nini tokosala ntango biloko na biso ya kolya ekosila, Yehova ayaki kosalisa biso.”

Ndeko mwasi moko na nkombo Mbuyi Ester, oyo mobali na ye akufá, afandaka na Kinshasa alobaki mpe ndenge wana: “Mobali na ngai auti kokufa esali sanza moko. Nazalaki na bosɛnga mpenza. Nazalaki na mbongo te mpe nazalaki na bana misato ya koleisa. Bandeko ya libota na ngai bazalaki na likoki te ya kopesa biso biloko oyo tokoki kolya mpo na mikolo ebele. Matɔndi Yehova!”

Tozali kobondela Yehova akoba kobatela bandeko na biso mpe apambola ebongiseli ya kopesa bandeko lisungi na ntango ya likama. Tozali mpe kozela na esengo ntango oyo moto nyonso akozala na likoki ya kozwa biloko ya kolya ebele awa na mabele.​—Nzembo 72:16.