KINSHASA, Congo​—Batatoli ya Yehova bazali kosunga na biloko, mpe kolendisa bandeko na bango oyo bamoni mpasi mpo na bitumba oyo ekɔtisi makambo ya nsɔmɔ na etúká ya Kasaï, na République Démocratique du Congo. Kowelana kati na bikólo, bitumba kati ya basoda mpe bana-mboka, oyo ezali kosila te, esali ete bato koleka 1 300 000 bákima mboka, bakisa mpe bato koleka 30 000 oyo bakimi Kasaï tii na Angola. Mingi kati na bato yango banyokwamaki makasi mpe ntango bakómaki na Angola, esɛngaki bázwa lisalisi ya monganga, mpo bamosusu bazikaki, mpe basusu bazali na bampota makasi mpo bazokisaki bango na mashɛti to masasi. Balapolo oyo touti kozwa emonisi ete bato koleka 870 oyo bakimaki mboka mpe bazali na Angola, ezali Batatoli ya Yehova ná bana na bango ya mike, mpe bato koleka 10 kati na bango bazokisamaki makasi. Likambo ya mawa, balapolo emonisi ete Batatoli ya Yehova 22 babomamaki.

Ndeko Robert Elongo, molobeli moko ya Batatoli ya Yehova na biro ya filiale na bango na Kinshasa, alobi: “Tozali na mawa ndenge ebele ya bato bakweli likama mpo na bitumba, mingimingi mpo basusu bazali bana mike mpenza. Basusu bakutanaki na likama kaka mpo bazalaki pene na esika oyo bitumba ebimaki na mbalakaka. Tozali komitungisa mingi mpo na bomoi ya bandeko na biso, yango wana tosɛngaki bango bázalaka ekɛngɛ. Elongo na bandeko ya biro ya filiale ya Angola, tozali kosala nyonso oyo tokoki mpo na kosunga bango na biloko, to na makambo mosusu, mpe mingimingi kolendisa bango na elimo.”

Batatoli ya Yehova na Angola mpe na Congo basali Bakomite mpo na kosunga na ntango oyo ya likama. Bakomite yango ezali kobongisa mosala monene ya kosunga bandeko oyo bakutani na likama. Tɔni koleka 34 ya biloko epesamaki na bandeko oyo bakimaki bitumba, na ndakisa bambeto, bilamba, bilei, ba moustiquaire, mpe basapato, elongo na kilo 525 ya bankisi. Monganga moko oyo azali Motatoli ya Yehova akendaki mpe kotala bandeko na kaa ya bato oyo bakimá bitumba, mpo na kosunga bandeko 135 oyo bazalaki na mposa nokinoki ya lisungi ya nkisi.

Longola yango, bamonisi ya biro ya filiale ya Angola mpe ya Congo bakendaki kotala bandeko oyo bakimá bitumba mpo na kolendisa bango, na ndakisa kosala makita ya sipesiale oyo ezali na badiskur oyo ebongisami mpo na bamposa ya bandeko yango. Atako monɔkɔ ya libosoliboso na Angola ezali Portugais, bibongiseli ezwamaki mpo makita esalema mpe na Tshiluba, moko ya minɔkɔ minene ya Congo, mpo na bandeko oyo bakimá mboka, ndenge emonisami na fɔtɔ ya ebandeli.

Uta na biro monene na Warwick, na New York, Lisangani ya Mikóló-Bakambi ya Batatoli ya Yehova esalisaka mpo mosala ya kosunga bandeko oyo bakweli likama ekende liboso. Basalelaka mbongo ya makabo oyo epesami mpo na kosunga mosala ya koteya Biblia na mokili mobimba.

Bato oyo bapanzi-nsango bakoki kobenga:

Mpo na mokili mobimba: David Semonian, Biro ya kozwa bansango, +1-845-524-3000

Angola: Todd Peckham, +244-923-166-760

République Démocratique du Congo: Robert Elongo, +243-81-555-1000