Kobanda sanza ya 12/2017, matata kati na Ba-Hema ná Ba-Lendu oyo bafandaka na Ituri, etúká moko ya République Démocratique du Congo ebomisi ebele ya bato mpe bato mosusu mingi bakimi bisika mosusu. Lokola matata yango ezali se kobakisama, mingi ya bandeko na biso mpe bazali na mpasi.

Ebele ya Ba-congolais oyo bakimi mobulu yango bakei na Ouganda, na kati na bango Batatoli ya Yehova 192 oyo bazali sikoyo na kaa mibale ya bato bakimá bitumba oyo ezali na ndelo oyo ekaboli Congo ná Ouganda. Na sanza ya 06/2018, Batatoli ya Yehova mosusu 1 098 bakimaki matata yango mpe bayaki na Bunia, engumba-mokonzi ya Ituri. Likambo ya mawa, ndeko mwasi moko ná mobali na ye, mpe bana misato oyo baboti na bango bazali Batatoli ya Yehova, bakufaki mpo babɛlaki. Kasi ata ndeko moko te akufaki na bitumba yango.

Kasi bandako mingi ya bandeko na biso oyo bakimaki bitumba yango babebisaki to batumbaki yango. Babebisaki mpe biloko oyo bandeko balonaki mpo na kobikela.

Ntango kaka bitumba yango ebandaki, bandeko oyo bazalaki esika matata ezali te basalisaki bandeko na bango oyo bazwaki mpasi mpo na matata yango. Bamosusu bapesaki mituka na bango mpo elongola bandeko esika bitumba ezalaki (Talá fɔtɔ). Longola yango, mabota 205 ya Batatoli ya Yehova babimisaki mbongo, bilei, mpe bapesaki bandeko oyo bakimaki bitumba bandako ya kofanda atako bazali na makoki mingi te. Atako ezali na kaa mibale ya minene ya bato oyo bakimá bitumba na Bunia, kasi bandeko nyonso oyo bakimaki bitumba bafandi na bandako ya bandeko.​—Masese 17:17.

Bandeko ya komite ya filiale ya Congo basalaki komite moko ya kopesa lisungi mpo na kosunga bandeko yango na biloko oyo basengeli na yango. Momonisi ya filiale akendaki mpe kotala bandeko oyo bazwaki mpasi mpo na kolendisa bango na elimo.

Atako bakimaki bitumba, bandeko oyo bayaki na Bunia mpe na bisika mosusu bazali kokoba koyangana na makita esika oyo bazali mpe bazali kokoba kosakwela basusu nsango malamu na molende. Kobanda na sanza ya 02/2018 tii sanza ya 04/2018, bayekolaki Biblia na bato koleka 270 na bakaa ya bato oyo bakimá bitumba.

Tozali kobondela ete Yehova akoba kopesa bandeko na biso ya Congo kimya ya makanisi mpe apambola milende oyo ezali kosalema mpo na kosunga basakoli oyo bazwi mpasi. Biso nyonso tozelaka na mposa makasi mokolo oyo Bokonzi ya Nzambe ekoya kotya kimya mpe ekosala ete bato bázala lisusu na likambo ya kobanga te, “esika ya kimya” mpo na basaleli nyonso ya Yehova.​—Yisaya 32:17, 18.