Bakonzi na Mpoto mpe na Amerika bazali kokoba kokweisa ekólo Russie ndenge ezali konyokola Batatoli ya Yehova.

Na mokolo ya 27/10/2020, Gayle Manchin alobaki ete: “Ebongiseli (USCIRF) ezali kokamwa mpenza na makambo Russie ezali kosala ndeko Dennis Christensen.” Abakisi lisusu ete: “Emonani mpenza polele ete ekólo Russie ezali koyina mobali oyo, azali kozwa etumbu kaka mpo azali kosambela Nzambe na ye mpe azali moto ya mobulu te. Na esika ya koyokela ye mawa, Russie ezali kosalela ye makambo lokola nde azali moto mabe. Oyo ezali mpenza likambo ya kozanga bosembo mpe ezali mabe.”

Na nzela ya USCIRF, oyo ezali kotalela bato oyo bakangi bango mpo na mpo na kondima na bango, Manchin azali kokɔtela ndeko Christensen. USCIRF eboyaki mpenza mbala na mbala etumbu ya mbula 6 na bolɔkɔ oyo bakatelaki ndeko Christensen.

Lisusu USCIRF elobaki polele ete Russie esali mabe ndenge eboyi kobimisa ndeko Christensen na bolɔkɔ liboso ya ntango batyaki. USCIRF emonisi ete bapesaki ye bonsomi na mokolo ya 23/06/2020, kasi prokirɛrɛ aboyaki ekateli yango nokinoki. Na esika bábimisa ye, batyaki ndeko Christensen na esika moko ya mpasi koleka mpe balobaki ete abukaki mibeko ya bolɔkɔ.”

Maloba ya nsuka ya USCIRF ezalaki na lapolo na yango ya mobu 2020. Lapolo yango ezali kokweisa bakonzi ya Russie ndenge bazali kokoba kobongisa makambo mpo na kobuka mibeko etali bonsomi ya losambo mpe esɛngaki bakonzi ya États-Unis bápesa Russie etumbu, elobaki kutu ete esengeli kotya likebi na ekólo yango.

Ndenge moko na mokanda oyo batindaki na Russie epai ya ONU, bato minene 8 ya ONU oyo balandelaka ntomo ya moto bamonisaki polele ete bazali kokamwa ndenge ekólo Russie ezali kokoba konyokola Batatoli ya Yehova, ndenge ekangi Betele na bango na St. Petersbourg, mpe ndenge epekisi makambo etali losambo na bango mpe bibongiseli mosusu 395 na bango na ekólo mobimba.” Lisusu, bakonzi yango bazali koloba mabe mpo na Russie ndenge ezali koboya koyokela bibongiseli ndenge na ndenge ya mokili mobimba oyo ezali kosɛnga bátika konyokola Batatoli ya Yehova.

Bakonzi ya ONU balobi ete mobeko ya Russie na likambo etali kolekisa ndelo “esalelami mpo na kopekisa misala nyonso ya Batatoli ya Yehova, kobangisa bango, kokɔtela bango na bandako, kobebisa biloko na bango, kotunatuna bango mituna, kokanga bango, mpe kotya bango na bolɔkɔ.”

“Bakonzi yango bazali kobɛta nsɛtɛ mpe koloba ete lotomo ya Batatoli ya Yehova na oyo etali lotomo na bango ya losambo esimbami na mobeko 18 (1) ya ICCPR.” a Mpe basɛngi ekólo Russie “etosa mobeko ya 2002 mpo na kobundisa bato ya mobulu na likambo etali kolekisa ndelo oyo ebuki te ntomo oyo moto azali na yango, na ndakisa, ntomo ya koloba, ya makanisi, ya lisosoli, mpe ya losambo.”

Mokanda yango elobeli mpe lisusu lolenge mabe oyo bazalaki kosalela bandeko na biso makambo. Na ndakisa, elobeli Batatoli 5 oyo babɛtamaki na Saratov na mokolo ya 06/02/2020. Mokanda yango elobi lisusu boye: “Batatoli ya Yehova oyo bazali na bolɔkɔ bazali konyokwama, kobɛtama mpe konyokwama na makanisi, kosambwisama na ndenge moko ya nsɔmɔ, nyonso wana kaka mpo bazali kosala makambo ya losambo na bango.”

Mokanda yango elobeli lisusu likambo mosusu​—basoda babɛtaki ndeko Vadim Kutsenko na mokolo ya 10/02/2020. Kasi bakonzi ya Russie bazali kowangana ete basalaki yango te. Bakonzi ya ONU bandimeli bakonzi ya Russie te mpe bazali kokoba koloba ete “bazali konyokola Batatoli ya Yehova na ekólo yango mobimba mpo kaka balobi ete misala na bango ya losambo ezali mabe.”

Bipekiseli ya 2017 nde elamusaki ebongiseli ya kopesa toli ya Mpoto b mpe elobaki ete ekólo Russie esalaki mabe na ndenge ezalaki kopekisa losambo ya Batatoli ya Yehova. c Yango wana, ebongiseli yango emonisaki polele ekateli moko oyo ezwamaki na mokolo ya 01/10/2020, na ekateli yango emonisi ete lobanzo na yango na likambo ya bipekiseli ya 2017 mpe balapolo ya mabe oyo ezalaki kouta epai na epai  . . . oyo ezalaki komonisa ete bipekiseli wana ekosala ete Batatoli ya Yehova bákoba kokangama na bolɔkɔ, kolandela bango mpe kotya bango na bolɔkɔ kaka mpo bazali kotosa mateya ya losambo na bango.”

Mpo na kopekisa monyokoli ya ndenge wana, ebongiseli yango epesi mitindo na ekólo Russie etalela lisusu “mibeko na yango na likambo etali kobundisa bato ya mobulu oyo esali ete epekisa misala ya Batatoli ya Yehova.” Mpe Russie esengelaki “kolongola mobeko na yango mpe kotika konyokola Batatoli ya Yehova oyo bazalaki kotosa mateya ya losambo na bango.” Na yango ebongiseli yango ekotalela lisusu soki ekólo Russie etosi mobeko yango na mobu 2021.

Kobanda na mobu 2017, bandeko na biso ya basi mpe ya mibali koleka 400 bazali na bolɔkɔ na Russie and Crimée mpe babengamaki batomboki. Batatoli koleka 210 bakangamaki na bolɔkɔ na bingumba 70 ya Russie.

“Tokotánga nkombo ya Yehova Nzambe na biso” akoba kosalisa bandeko na biso bákoba koyika mpiko wana bazali na motema molai.​—Nzembo 20:2, 7.