Na mokolo ya 23/05/2019 ntango azalaki na tribinale, Dennis azwaki maloba mpo na kosamba na boumeli ya ngonga soki moko mobimba. Oyo elandi ezali makambo oyo Dennis alobaki ntango azalaki kosamba na tribinale (ekomamaki na monɔkɔ ya Russe):

Nalingi sikoyo kopesa matɔndi mingimingi na baoyo nyonso basungaki ngai na boumeli ya mbula mibale ya kosamba.

Ya liboso, mwasi na ngai Irina, oyo kobanda na ebandeli asalaki nyonso oyo akokaki mpo na kosalisa mpe kosunga ngai. Azalaki kokipe ngai malamu, komemela ngai bilamba, bilei, nkisi, mpe biloko mosusu oyo nasengelaki na yango awa na bolɔkɔ. Azalaki kosunga ngai na makanisi mpe na elimo ndenge azalaki koya kotala ngai mpe kokomela ngai mikanda mikolo nyonso.

Mwasi na ngai ya motema, kondima na yo ya makasi, motema molai na yo, kimya na yo, bolingo oyo olingaka ngai mpe solo, makanisi malamu oyo azali na yango; ezalaki ndakisa malamu mpo na ngai. Osengeli koyeba ete nalingaka yo mingi mpenza mpe ezali lipamboli kozala na mwasi lokola yo!

Nalingi mpe kopesa matɔndi na bandeko ya libota na ngai na Denmark, mingimingi tata na ngai oyo akómi mobange mpe ndeko na ngai ya mwasi. Bosengeli koyeba ete nazali kokanisa bino mingi. Nalingaka bino mpe nazali na botondi mpo na nyonso oyo bosalelaki ngai. Nabolɔkɔ, bosungaki ngai na mikanda botindelaki ngai mpe ndenge bozalaki kobenga ngai na telefone. Nandimi ete bokolɛmba te mpe bokobungisa elikya te ete mokolo mosusu tokofanda elongo na libota.

Lisusu, nalingi kopesa matɔndi na baninga na ngai nyonso oyo bazali na mokili mobimba. Bino mpe basungaki ngai na ndenge bakomelaki ngai mikanda, na maloba ya kolendisa, bililingi kitoko, mpe bakado oyo botindelaki ngai. Nyonso wana esalisaki ngai námona ete nazali ngai moko te mpe nazali na kati ya libota ya bandeko na mokili mobimba.

Bandeko ya bolingo, bosengeli koyeba ete mikanda nyonso, ezala ya moke to monene, elendisaki mpe epesaki ngai makasi. Nabondeli bino bólɛmba nzoto te mpo nazali koyanola te na mikanda na bino. Nalaki bino ete tokokutana mpe tokoyambana na mokili ya sika!

Nalingi mpe kopesa matɔndi na biro ya ambasadɛrɛ ya Denmark na Moscou mpe ekipi na ye mobimba. Boyaki mbala na mbala kotala ngai na tribinale mpe na bolɔkɔ esika batyaki ngai. Toli ya ntina, litambwisi mpe bilendisi oyo bopesaki ngai esalisaki ngai mingi. Nazali na botondi mingi mpo na nyonso wana.

Nakosepela lisusu kopesa matɔndi na Cour d’appel ndenge epesaki ngai nzela nakende ngai moko kosamba na tribinale. Ntango nazalaki kosamba na nzela ya vidéoconférence na bolɔkɔ, ezalaki mpasi mpo nayoka makambo nyonso oyo ezalaki kolobama na tribinale. Makambo mingi bazalaki koloba nazalaki kosimba yango malamu te. Yango esalaki ete nasamba malamu te. Longola oyo wana, soki ozali kosamba na bolɔkɔ na nzela ya vidéoconférence, okangami lokola nyama moko oyo efandi na ndako ya banyama. Yango ebongi te mpe ezali mabe koleka na siɛklɛ ya 21 oyo tozali.

Eleki sikoyo mbula soki mibale mobimba, nazali kaka awa na bolɔkɔ mpe esali sikoyo sanza 15 banda nabandaki kosamba. Mpo na kolonga makambo oyo nyonso, natika te mpe nalɛmba nzoto te, ezali na ntina mingi nazala na mpiko mpenza. Biblia elobi na Bafilipi mokapo ya 4, vɛrsɛ 13 ete: “Na makambo nyonso nazali na makasi na lisalisi ya moto oyo apesaka ngai nguya.” a Yisaya mokapo ya 12, vɛrsɛ 2, elobi: “Talá! Nzambe azali lobiko na ngai. Nakotya motema mpe nakozala na nsɔmɔ te; mpo Yah Yehova azali makasi na ngai mpe nguya na ngai, mpe akómaki lobiko na ngai.”

Na ntango wana nyonso, namonaki ete Nzambe na ngai, Yehova azalaki elongo na ngai, azalaki kopesa ngai makasi ya koyikela makambo wana nyonso mpiko; apesaki makasi natika te, nalɛmba nzoto te, nazala na esengo mpe kimya mpe nazala motema mpiɔ. Nazali mpenza na botɔndi mpo na nyonso wana mpe nazali na esengo ya kozala Motatoli na ye; elingi koloba Motatoli ya Yehova.

Bato mingi batunaki ngai soki likambo wana ya kozanga bosembo esalaki ngai nini. Mpo na koloba solo, ezali pɛtɛɛ te kozala na bolɔkɔ ntango molai boye, kokabola yo ná mwasi na yo mpe bandeko ya libota mpe baninga. Mbula mibale oyo eleki, nafandaki kaka ngai moko. Nazalaki na bomoi, kasi bomoi ezangá bonsomi. Nazalaki kosala ngonga 23 na mokolo na bolɔkɔ esika batyaki ngai oyo ezali na bonene ya mɛtrɛ 3 mpe bolai ya mɛtrɛ 6. Nazalaki kotambola ngonga moko na mokolo na mwa ndako oyo bazalaki kosala ngalasisi, oyo ezali mpe na bonene ya mɛtrɛ 3 mpe bolai ya mɛtrɛ 6, kasi yango ezalaki na libándá. Nakutanaki na bato ya ndenge na ndenge mpe tosololaki na bango masolo kitoko. Namonaki ete bato mingi oyo bazalaki na bolɔkɔ bazalaki na mposa bálandela malamu makambo na bango mpe bákata yango na bosembo. Mingi na bango bamonaki lokola basambisamaki te, ngai mpe nayokaki bongo na mbula mibale oyo euti koleka. Nasalaki nyonso oyo nakokaki mpo na kosunga mpe kolendisa bango, mpo nandimi ete Yesu Kristo alingaki kosala mpe bongo.

Nasalaki boninga na bato ebele. Mingi na bango bazalaki ntango nazalaki kosamba; basusu bazalaki kokomela ngai mikanda. Nayebi basusu kati na bango, mpe basusu nayebi bango te. Ezali na baoyo bandimaka bindimeli na biso mpe baoyo bandimaka yango te. Kasi, bazali nsima na ngai mpo balingi te kotika nzela na makambo ya kozanga bosembo oyo ezali kosalema awa na Russie, epai bakómisi Batatoli ya Yehova bato oyo balekisaka ndeko. Nzokande bazali bato ya kimya mpe oyo balingaka bazalani na bango lokola bango moko. Yango ezali likambo ya bozoba mpe ezangi motó na makolo. Bato mingi bayoki mpasi ndenge makambo ya bongo esalemi awa na Russie na siɛklɛ ya 21.

Bato mingi batunaki ngai soki likambo wana ya kozanga bosembo esalaki kondima na ngai nini. Bifundeli oyo ya lokuta oyo bafundi ngai esali ete kondima na ngai ekóma lisusu makasi mpe nazali komona kokokisama ya maloba oyo ya Biblia oyo ezali na Yakobo mokapo ya 1, vɛrsɛ 2 tii ya 4: “Bómona yango esengo mpenza, bandeko na ngai, ntango bozali kokutana na komekama ndenge na ndenge, mpo bino moko boyebi ete kondima na bino oyo emekami ezali kobota ezaleli ya koyika mpiko. Kasi tiká ezaleli ya koyika mpiko esala mosala na yango mobimba, mpo bózala bato oyo bakoki na makambo nyonso mpe babongi na makambo nyonso, bazangi eloko te.”

Nazali moto ya kokoka te, kasi nayekoli koyika mpiko mpe kozala na esengo na komekama. Mpe oyo eleki ntina ezali ete nakómi na boyokani makasi elongo na Yehova Nzambe na ngai. Nakómi mpe na mposa makasi ya koyebisa basusu makambo etali ye mpe mokano na ye; mposa makasi ya kokoba kosakola nsango malamu ya Bokonzi ya Nzambe oyo ezali solisyo se moko mpo na kosilisa bampasi ya bato; mposa makasi ya koyebisa basusu nsango malamu ya Biblia etali kimya mpe bomoi ya seko na Paradiso awa na mabele, kosalisa bango bákóma baninga ya motema ya Mozalisi na bango, mpe bákómisa kondima na bango makasi epai na ye mpe bilaka na ye.

Nazali koloba liboso na bino mpo “maloba epesameli ngai,” mpe mbala mosusu oyo nde mbala na ngai ya nsuka ya kozwa maloba boye. Ekoki kozala mbala na ngai ya nsuka ya koya kosamba awa na tribinale to mpe nsuka ya makambo oyo ekómeli na ngai na bomoi. Kasi bóyeba ete ezali te mbala na ngai ya nsuka ya kozwa maloba mpo na kotɛmɛla makambo ya kozanga bosembo oyo bazali kosalela bato ya kimya mpe oyo basali likambo moko te awa na Russie. Oyo ezali kaka ebandeli, mpe nazali naino na mingi ya koyebisa bato na mokili mobimba. Nakoki kokanga monɔkɔ te lokola nde nasali likambo moko ya mabe to nazali koluka kobomba likambo moko ya mabe. Nazali na lisosoli ya pɛto mpo nayebi ete nasali likambo ya mabe te mpe nabuki mobeko moko te ya ekólo Russie. Yango wana, nazali na likambo ya koyokela nsɔni te.

Makambo ya koyokela nsɔni ezali nde makambo oyo bazali kosalela ngai mpe Batatoli ya Yehova mosusu awa na Russie, na ndakisa: Bifundeli ya lokuta, kokanga bato, kokɔtela bato na bandako, kobɔtɔla bato biloko na bango, kolandela bango mpe sikoyo ekómi tii na kobɛta bango pene na liwa. Nyonso wana ezali mpenza makambo ya nsɔni. Solo ekoyeba kaka, mpe bosembo ekolonga kaka ata ndɛlɛ. Na Biblia, na mokanda ya Bagalatia mokapo ya 6, vɛrsɛ 7, elobi boye: “Bómikosa te: Nzambe azali moto ya kotyola te. Mpo nyonso oyo moto azali kolona, yango nde akobuka.”

Tribinale ekateli ngai etumbu ya bolɔkɔ ya mbula 6, mpo na likambo nini nasali? Eloko moko te! Ezali ata na elembeteli moko te oyo emonisi ete nasali likambo moko ya mabe. Kutu, ezali na makambo ebele oyo emonisi ete nasaleli Artikle 28 ya mobeko-mokonzi ya ekólo Russie, oyo epesi ngai nzela ya kosala oyo nasalaki. Natosaka mibeko ya ekólo Russie mpe nazali moto ya sembo. Nazali mokristo, moto oyo asambelaka, Motatoli ya Yehova mpe nalingaka bato ya Russie. Mpo na nini nazwa etumbu? Mpo na nini bakateli ngai etumbu ya mbula 6 ya bolɔkɔ? Kaka mpamba boye! Ezali sembo te.

Nandimi ete Cour d’appel ekolandela likambo oyo mpe ekosala ete solo elonga. Mpe yango ekotya nsuka na konyokola oyo bazali konyokola Batatoli ya Yehova awa na Russie. Nandimi mpenza ete Cour d’appel ekosala ete bato na mokili mobimba bámona ete na Russie bato nyonso bakómi na bonsomi ya losambo.

Kala mingi te maloba oyo ya Biblia ekokokisama: “Mpe akokata mpenza makambo na kati ya bato ya bikólo ebele . . . Mpe bakotula mipanga na bango ete ekóma bitimweli ya mabele mpe makɔnga na bango ete ekóma makwangola ya kokata matiti. Bakotombola mopanga te, ekólo moko mpo na kobunda na ekólo mosusu, mpe bakoyekola etumba lisusu te. Mpe bakofanda mpenza, moto na moto na nse ya nzete na ye ya vinyo mpe na nse ya nzete na ye ya figi, mpe moto ata moko te akozala mpo na kolɛngisa bango,” Mika mokapo ya 4, vɛrsɛ 3 mpe 4.

Nzambe akataka ntango nyonso makambo na bosembo, mpe na boyangeli na ye matata ekozala te, mobulu to bitumba mpe ekozala te. Na esika na yango, tokozala na kimya, mpe mitungisi ekozala te. Na maloba mosusu, moto nyonso akozala na esengo ya solosolo.

Ekateli oyo bokoki kozwa lelo, ekoki kosalisa bino mpo bókɔta na nzela wana, nzela oyo ezali komema na bomoi ya solosolo mpe ya kimya; ekozala litambe monene na nzela oyo ezali komema na mokili ezangá nkanda, mpasi mpe kozanga bosembo. Mpe nandimi ete bokokɔta na nzela yango. Matɔndi mingi!