Na mokolo ya 03/09/2020, tribinale ya engumba Novozybkov na etúká ya Bryansk ekatelaki ndeko Vladimir Khokhlov, ndeko mwasi Tatyana Shamsheva, ndeko mwasi Olga Silaeva, mpe ndeko mobali Eduard Zhinzhikov etumbu. Tribinale ekatelaki bango etumbu ya sanza 12 tii 15 ya bolɔkɔ. Nzokande, babimisaki bango mpo basilaki kolekisa basanza yango nyonso na bolɔkɔ liboso tribinale ekatela bango etumbu.

Vladimir Khokhlov

• Abotami na: 1977 (Novozybkov, etúká ya Bryansk)

• Bomoi na ye: Azali mécanicien. Azalaki soda liboso akóma Motatoli ya Yehova. Alingaka kobɛta bale, kotánga, koboma mbisi, mpe kobɛta gitare

• Moninga na ye moko alendisaki ye ayekola Biblia. Abalaki Olga na 2007. Babotá mwana mwasi moko, nkombo na ye Anastasia. Libota na bango basambelaka Yehova

Tatyana Shamsheva

• Abotami na: 1977 (Cherepovets, na etúká ya Vologda)

• Bomoi na ye: Ayekolá makambo ya nkita. Azali kotángisa makambo ya nkita, mibeko, mpe makambo ya kɔntabilite banda bambula ebele. Azwaki batisimo na 1995. Asepelaka kolakisa bato toli ya malamu oyo ezali na Biblia

Olga Silaeva

• Abotami na: 1988 (Davydovo, na etúká ya Moscou)

• Bomoi na ye: Azali mwana ya nsuka na kati ya bana misato. Asilisá na inivɛrsite, ayekolaki mateya ya tekiniki. Alingaka kotonga bilamba. Asepelaka kotánga mpe kobɛta volleyball. Alandá ndakisa ya mama na ye, ayekolá Biblia mpe andimá mateya na yango

Eduard Zhinzhikov

• Abotami na: 1971 (Novozybkov, na etúká ya Bryansk)

• Bomoi na ye: Bapolisi basalelaki ye na mosala ya sudire mpe ya kobatela bandako. Azaláká kobɛta miziki. Na 1993, abalaki alangá-nzembo moko nkombo na ye Tatyana. Alingaka kokoma maloba ya ntɔki mpe kobɛta gitare

• Mwa moke liboso ya mobu 2 000, abandaki koyekola Biblia mpe azwaki biyano na mituna mingi oyo azalaki na yango. Biyano yango etindaki ye atika mimeseno ya mabe oyo azalaki na yango mpe abongisa bomoi ya libota na ye. Yango ekamwisaki Tatyana. Ye mpe abandaki koyekola Biblia mpe akómaki Motatoli ya Yehova

Na mokolo ya 11/06/2019, bakonzi bakɔtaki na bandako 22 ya Batatoli ya Yehova na Russie, na etúká ya Bryansk. Bakangaki bandeko basi Tatyana Shamsheva ná Olga Silaeva. Bango mibale basalaki sanza 8 na pɔsɔ mibale na kasho. Babimisaki bango na sanza ya 05/2020 mpo bázonga na bandako na bango mpe bázela ekateli ya tribinale.

Na mokolo ya 16/10/2019, bakonzi babandaki kosambisa ndeko Vladimir Khokhlov ná ndeko Eduard Zhinzhikov. Na nsima, basangisaki likambo na bango ná likambo ya bandeko basi mibale Shamsheva ná Silaeva. Nsima ya mikolo nsambo, batindaki bandeko mibali na kasho, epai bazali tii sikoyo.

Batunaki bandeko basi yango mituna na Lapolo ya Lisangani ya Mikóló-Bakambi No.5 ya 2020. Ndeko Silaeva alobaki ete, sanza mwambe na bolɔkɔ endimisi ye ete “ezala mpasi yango ya ndenge nini, Yehova apesaka ngai ntango nyonso elimo santu na ye, oyo esalisaka ngai nayikela mikakatano yango mpiko.” Ndeko Shamsheva alobi mpenza na motema mobimba ete: “Yehova azali ntango nyonso pene na biso, mpe asalisaka biso ntango nyonso, apesaka biso makasi, asalisaka mpenza biso.”

Tozali na elikya ete Yehova akokoba kosunga bandeko na biso oyo bakoki kokɔta na bolɔkɔ na Russie to oyo bazali na bolɔkɔ mpo bákoba koyikela mikakatano ya ntango oyo mpiko na kimya mpe na esengo.​—1 Bakorinti 10:13.