Na mokolo ya 02/07/2019, tribinale moko na Krasnoyarsk, na Russie, ezwaki ekateli ya kobimisa ndeko Andrey Stupnikov na bolɔkɔ. Atako azali lisusu te na bolɔkɔ, bakonzi bakokoba kolandela ye mpo na bifundeli oyo bafundaki ye na yango.

Na mokolo ya 03/07/2018, bazalaki kotalatala biloko oyo ezalaki na basanduku ya Stupnikovs na ntɔngɔ libándá ya mpɛpɔ na Airport International ya Krasnoyarsk na Yemelyanovo, na Russie. Bato mibali ya sireté bapusanaki pene ya ndeko Stupnikov mpe bakangaki ye. Na nsima alekisaki sanza mwambe na kasho mpo na mwa ntango liboso bákɔtisa ye na bolɔkɔ na nsuka ya sanza ya 02/2019.

Ndenge ndeko Stupnikov amonisi yango mpo na ye, ayekolaki makambo mingi etali bomoi na ye mpe boyokani na ye na Yehova na boumeli ya mbula moko mobimba. Alobi: “[Ngai ná Olga] tozali Batatoli ya Yehova esali sikoyo mbula mingi, kasi tokómá naino te na boyokani makasi na Yehova ndenge wana! Na bantango ya mpasi boye, namoná mpe nazali kokoba komona, libɔndisi mpe lisungi ya Tata na biso. Ezali kokamwisa ngai ndenge azali kopusana penepene na ngai mpe ndenge azali koyoka mabondeli na ngai!”

Ndeko Stupnikov asukisi na maloba oyo: “Koleka liboso, nandimi mpenza ete Tata na ngai azali komona mpe ayebi ndenge nazali komiyoka. Eksperiansi na ngai moko esalisi ngai natyela ye lisusu motema mingi mpe nabanga minyoko koleka ndelo te. Ezali mpenza kobangisa kobebisa boyokani makasi na Yehova. Nandimi mpenza ete elongo na ye tokoki kolonga likambo nyonso.”

Bakonzi ya Russie bazali kokoba kokanga lisusu ebele ya bandeko na biso ya basi mpe ya mibali. Na mokolo ya 01/07/2019, bakonzi balandelaki bandeko na biso 217. Na ngámbo mosusu, bakonzi ya Russie bakitiseli bandeko na biso mosusu minei bitumbu. Kasi, tozali te kotyela batribinale ya bato to bakonzi motema​—tozali nde kokoba kotyela Yehova motema. Tozali kobondela ete Yehova akoba kolendisa mpe kobatela bandeko na biso nyonso na Russie.​—Nzembo 28:7.