Na mokolo ya 05/10/2020, a tribinale ya etúká ya Zasviyazhsky na engumba Ulyanovsk ekokata likambo ya bandeko oyo: Aleksandr Ganin, Khoren Khachikyan, Andrey Tabakov, ná Mikhail Zelenskiy, bakisa mpe ndeko Sergey Mysin ná mwasi na ye, Nataliya. Bango nyonso bakokɔta bolɔkɔ, moto na moto na kolanda mbula oyo bakateli ye, banda na mbula misato tii na mbula nsambo. Prokirɛrɛ asɛngi mpe bábɔtɔla mbongo mpe mituka na bango, biloko nyonso wana ezalaki na valɛrɛ ya dolare 20 000.

Aleksandr Ganin

• Abotami na: 1957 (Ekhabi, na esanga ya Sakhalin)

• Bomoi na ye: Banda akómaki Motatoli ya Yehova esali mbula koleka 20. Sikoyo azwá pansiɔ na mosala mpe asepelaka kosala bilanga

Khoren Khachikyan

• Abotami na: 1985 (Erevan, Arménie)

• Bomoi na ye: Azali na diplome ya makambo ya nkita. Ntango azalaki elenge, azalaki kosala masano ya bitumba. Ayebani lokola moto ya esengo mpe ya boboto

• Abandaki koyekola Biblia na Batatoli ya Yehova mpo azalaki na mposa ya koyeba Nzambe malamu mpenza mpe ya kotosa mibeko na ye na bomoi na ye. Asepelaka na Biblia mpo elobelaka makambo na molɔngɔ mpe makambo yango ezali na boyokani

Sergey Mysin

• Abotami na: 1965 (Kulebaki, na etúká ya Nizhny Novgorod)

• Bomoi na ye: Akutanaki na mwasi na ye, Nataliya ntango azalaki na kelasi mpo akóma ingénieur. Babalanaki na 1991. Banda bazali kosalela Yehova esali sikoyo mbula koleka 20, mpe bakolisá bana mibale. Asepelaka na masano, mingimingi lisano ya lacrosse

Nataliya Mysina

• Abotami na: 1971 (Leningrad, lelo babengaka yango Saint-Pétersbourg)

• Bomoi na ye: Abotami na libota ya basoda. Azalaki kofanda na Allemagne liboso asilisa kelasi na iniversite mpo akóma monganga. Alingaka kolamba mpe kosala mampa ná bagato

Andrey Tabakov

• Abotami na: 1973 (Minsk, Bélarus)

• Bomoi na ye: Abongisaka baordinatɛrɛ. Abalaki mwasi na ye, Marina, na 2006. Bayekolaki Biblia na Batatoli ya Yehova mpe bazwaki batisimo. Abongisaka baradio ná baordinatɛrɛ

Mikhail Zelenskiy

• Abotami na: 1960 (Bulaesti, Moldovie)

• Bomoi na ye: Azalaki kosala na masuwa mpe azalaki sofɛlɛ ya mituka ya minene. Abalaki mwasi na ye, Victoria, na 1989. Na ebandeli ya bambula ya 1990, babandaki koyekola Biblia. Bolingo na bango epai ya Yehova ebakisamaki mpe bazwaki batisimo

Ekómi pene na mbula misato, bato ya Service fédéral de sécurité ya Russie (FSB) babandaki kolandela makambo bandeko bazali kosala na engumba Oulianovsk. Na ndakisa, bato ya FSB bakómaki kolandela masolo bandeko bazali kosolola na telefone. Na mokolo ya 24/02/2019, bato ya FSB bafundaki ndeko Mysin ná mwasi na ye ná bandeko oyo: Khachikyan, Tabakov, mpe Zelenskiy.

Nsima ya mikolo misato, na ngonga ya 5 ya ntɔngɔ, bapolisi bakɔtaki na ndako ya ndeko Khachikyan, Tabakov, mpe ndeko Zelenskiy. Bakangaki bango nyonso misato mpe batyaki bango na kasho mpo na mwa moke. Kaka na ntɔngɔ yango, babengaki ndeko mwasi Mysina na telefone. Moto oyo abengaki ye ayebisaki ye ete, motuka na ye ezwi likama, mpe asɛngaki ye ná mobali na ye, Sergey, bábima libándá. Ntango kaka ndeko Mysin afungolaki porte, bato ya FSB bakɔtaki na makasi na ndako na bango. Bapolisi balukalukaki na ndako na bango mobimba, mpe bazwaki batelefone na bango ná biloko mosusu ya ndenge wana. Na nsima, bakangaki bango.

Mokolo oyo elandaki, tribinale ya etúká ya Leninsky oyo ezali na etúká ya Ulyanovsk etyaki ndeko Mysin na kasho. Ndeko mwasi Mysina ná bandeko mibali mosusu misato batyamaki mpe na bolɔkɔ.

Ndeko Mysin asalaki mikolo 55 na bolɔkɔ mpe mikolo 123 na ndako kozanga kobima. Ndeko mwasi Mysina, bandeko Khachikyan, Tabakov, mpe Zelenskiy balekisaki mikolo 50 mpe 55 na ndako kozanga kobima.

Na ntɔngɔ, na mokolo ya 15/05/2019, bato ya FSB bakɔtaki na ndako ya ndeko Ganin kolukaluka biloko mpe bakangaki ye. Asalaki mikolo mibale na kasho.

Guvɛrnema epekisi basakoli motoba yango kosala makambo mosusu. Bakonzi ya Leta bazali kokoba konyokola bango mpe na ndenge mosusu. Bakonzi ya esika ndeko Mysin ná mwasi na ye, ná ndeko Tabakov bafandaka, bapekisi bango kozwa mbongo na kɔnti na bango na banki. Ndeko Mysin ná mwasi na ye bazali na mbongo dolare 6 313 mpe ndeko Tabakov dolare 7 575.

Lokola bandeko na biso oyo bazali na Russie bazali kokoba konyokwama mpo na kondima na bango, tozali kobondela ete maloba ya mokomi ya nzembo oyo elandi ekoba kopesa bango makasi: “Nzambe azali ekimelo mpe makasi na biso, lisalisi oyo ezwamaka noki na bantango ya mpasi.”​—Nzembo 46:1.