Na mokolo ya 26/10/2020, tribinale ya etúká ya Lgov eboyaki lisusu ete bábimisa ndeko Dennis Christensen, atako asili kosala mbula koleka misato na bolɔkɔ. Azali na mikolo zomi mpo na kosɛnga ete bátalela lisusu likambo na ye. Bolɔkɔ ya ndeko Christensen esengeli koumela tii na sanza ya 05/2022. Dati yango ezali bongo mpo basangisi mpe mikolo oyo alekisaki na kasho. Kasi, na sanza oyo eleki, bakonzi ya bolɔkɔ balobaki ete azali kobuka mibeko ya bolɔkɔ na nko mpenza. Na yango, bakonzi ya bolɔkɔ bakoki koboya kotánga mikolo oyo alekisaki na kasho, mpe akoki koumela na bolɔkɔ tii koleka sanza ya 05/2022.

Ndeko Christensen ná mwasi na ye, Irina, bazali konyokwama mingi, na nzoto mpe na makanisi, banda bakangaki ye na mokolo ya 25/05/2017. Atako bongo, bazali kaka na mwa esengo na bango, mpe bazali na ekateli ya kolonga komekama ya kondima na bango, matondi na bamilio ya bandeko na mokili mobimba mpo na mabondeli oyo bazali kosala.