Na sanza ya 05/2019, bakonzi ya etúká Arkhangel’sk ná ya Volgograd na Russie bafundaki bandeko na biso mibale ya basi na tribinale. Ndeko mwasi Kaleriya Mamykina, oyo azali na mbula 78, ndenge azali komona na fɔtɔ likoló, mpe ndeko mwasi Valentina Makhmadgaeva, oyo azali na mbula 71, bazali kolandela bango mpo na misala oyo makambo na yango “elekisaka ndeko” mpo bazali Batatoli ya Yehova.

Na sanza ya 04/2018, bakonzi na engumba Vladivostok bafundaki na likambo ndeko mwasi moko na nkombo Yelena Zayshchuk, oyo azali na mbula 84 mpe Batatoli ya Yehova mosusu minei. Ezali sikoyo na bandeko zomi ya mibali mpe ya basi ya mbula 70 oyo bazali kosamba na tribinale mpo bazali kosambela Yehova na kimya.

Atako moko te kati na mikóló yango azali na bolɔkɔ, kasi likambo yango ezali kopesa bango mpasi mingi. Soki bakobi kolandela bango mpe tribinale ekweisi bango na likambo, bakoki kofutisa bango mbongo mingi to kokɔta bolɔkɔ.

Na mokolo ya 17/06/2019, motángo ya bandeko na biso oyo bafundaki bango na likambo ekómaki 215. Motángo yango ezali se komata. Tiká ete tókoba kotya bandeko na biso ya basi mpe ya mibali na Russie na mabondeli na biso, na bantango mosusu tokoki kotángaka bango na bankombo na bango. Tondimisami ete Yehova akokoba kolendisa bango “na nguya nyonso kino kokóma na bonene ya nguya na ye” mpo “báyika mpiko mpenza mpe bázala na motema molai ná esengo.”​—Bakolose 1:11.