Na mokolo ya 13/08/2019, tribinale monene ya engumba Kirov epesaki mitindo ete bábimisa na bolɔkɔ ndeko Andrey Suvorkov oyo azali na mbula 26. Atako bapesaki ndeko Suvorkov bonsomi, bakokoba kolandela ye mpo na likambo oyo bafundaki ye na yango.

Ndenge lapolo emonisaki yango, batyaki ndeko Suvorkov na bolɔkɔ, elongo na mobali ya mama na ye mpe bandeko mosusu misato, ntango bapolisi mpe bato ya sireté oyo balataki maskɛ na bilongi bakɔtaki na ndako 19 ya Batatoli ya Yehova na Kirov na mokolo ya 09/10/2018.

Ndeko Suvorkov akanisi lisusu ntango bakɔtaki na ndako na ye mpo na kosala ankɛtɛ, alobi boye: “Babɔtɔlaki biloko na biso ya motuya. Kasi ngai ná mwasi na ngai tomitungisaki te mpo na yango, mpo ntango nyonso tozalaki koluka kozala na bomoi oyo ezangi mindɔndɔ mpe tozalaki te komitungisa mingi mpo na biloko ya mosuni. Toli oyo ezali na Matai 6:21, oyo elobi ‘mpo epai eloko na yo ya motuya ezali, motema na yo ekozala mpe kuna,’ esalisaki biso tófanda kimya.”

Nsima ya kokɔtela biso na bandako, balandelaki ndeko Suvorkov, mobali ya mama na ye mpe bandeko wana mosusu misato mpo bazalaki koyemba nzembo ya Bokonzi, koyekola mikanda ya losambo mpe bazalaki na kopi moko ya Biblia​—Libongoli ya Mokili ya Sika na monɔkɔ ya Russe. Batyaki bango nyonso mpo na mwa ntango na kasho wana bazalaki kozela tribinale epesa mitindo ete bábimisa bango to bátya bango na bolɔkɔ liboso básambisa bango.

Ndeko Suvorkov amonisi eksperiansi na ye: “Nalekisaki butu mibale na kasho mpo na mwa ntango. Na ebandeli, natikaki te kobondela. Nandimaki ete Yehova akoyoka ngai mpe akosunga ngai. Nakanisaki miziki ya nzembo ya Bokonzi mpe nazalaki koyemba. Na nsima, nakanisaki lisusu miziki koleka 50 ya nzembo ya Bokonzi ná maloba na yango.”

Tribinale ezwaki ekateli ete bátya ndeko Suvorkov mpe bandeko mosusu na bolɔkɔ mpo na mwa ntango. Na pɔsɔ ya liboso oyo alekisaki na bolɔkɔ, ndeko Suvorkov amipesaki mpo na kosalisa basusu. Akanisi lisusu boye: “Nazwaki ekateli ya kotánga bankombo ya bandeko na mabondeli na ngai mpe kokomela baoyo nabosani adrɛsi na bango te mikanda ya kolendisa. Yango epesaki ngai esengo.”​—Misala 20:35.

Nsima ya basanza ebele, nsukansuka bandeko nyonso bakɔtaki na bolɔkɔ, longola kaka ndeko Andrzej Oniszczuk. Ndeko Suvorkov azali moto ya liboso na kati ya bandeko oyo babimaki na bolɔkɔ.

Ndeko Suvorkov alobi boye: “Ntango nakanisaka makambo oyo esalemaki, nazalaka na esengo mpo nayebi makambo oyo esalemaka na bolɔkɔ. . . . Nayebi te nini ekokómela ngai na mikolo ezali koya to soki nakozonga lisusu na bolɔkɔ. Nandimi sikoyo ete nakozwa lisungi epai ya Yehova mpe ebongiseli na ye, ata soki nazali na bolɔkɔ. Nazali kobanga te ete bátya ngai na bolɔkɔ.”