Na mokolo ya 22/02/2022, Tribinale monene ya Mpoto mpo na ntomo ya bato [cour europénne des drotis de l’homme (CEDH)] ezwaki bikateli mibale mpo na kolongisa Batatoli ya Yehova 15. Likambo ezalaki ete, kati na mobu 2010 mpe 2012, bapolisi basalaki bandeko makambo ya mabe ntango bazalaki kokɔta na bandako na bango mpo na kolukaluka. Bikateli oyo ezwamaki elobaki ete Russie etosaki te ntomo monene ya bandeko na biso: kozala na bonsomi ya kopona lingomba oyo olingi. Tribinale esɛngaki Russie efuta bandeko wana mbongo koleka dolare 112 323. Ezalaki bikateli ya nsuka, Russie ekoki lisusu komema likambo yango na tribinale te.

Bikateli wana mibale ya Tribinale ekweisaki Russie na makambo 6. a Eboyaki kondima mokanda ya ndingisa oyo bapolisi ya Russie basalelaki mpo na kolukaluka na bandako ya Batatoli ya Yehova mpe na Ndako ya Bokonzi moko. Eboyaki mpe ndingisa ya kolukaluka na nzoto ya bandeko basi mibale oyo bakangaki mpe babɔtɔlaki biloko na bango mpo bazalaki kosakola. Na bisika mosusu, bapolisi oyo balataki bamaske mpe basimbaki mandɔki nde bakɔtaki na makasi mpo na kotungisa bandeko na bandako na bango.

Mpo na komonisa soki bikateli yango elimboli nini, André Carbonneau, avoka oyo atalelaka ntomo ya bato na mokili mobimba, oyo bandeko basalelaki, alobaki ete bikateli yango “ezali elembo monene oyo emonisi ete Russie asalaki mabe mpe abukaki mibeko ndenge atindaka bapolisi bákɔta na bandako ya Batatoli ya Yehova. Ekateli yango etali mpe ndenge oyo bapolisi bakɔtaki na bandako ya Batatoli mbala 1 700 banda bapekisá mosala ya Batatoli ya Yehova na 2017. Sikoyo, kokɔta mpo na kolukaluka na ndako ya moto kaka mpo azali Motatoli ya Yehova ezali kobuka mibeko mpe kozanga kotosa boyokani ya Mpoto (Convention européene).” Abakisaki boye: “Likambo ya kokamwa, Tribinale ekweisaki mpe bakonzi ya Russie ndenge bazali kotɛmɛla mosala ya kosakola ndako na ndako. Yango emonisi ete Tribinale monene emonisi ete mosala ya kosakola ezali mosala ya lingomba mpe bakonzi basengeli kopekisa yango te.”

Atako bikateli yango etalalaki te monyoko ya Batatoli ya Yehova na Russie, ezali ndakisa oyo ekosalisa mpo na bikateli oyo ekozwama na mikolo ezali koya na oyo etali epekiseli ya ebongiseli na biso. Ezali na makambo koleka 60 oyo etali Batatoli ya Yehova na Russie, oyo esengeli kotalelama na Tribinale monene ya Mpoto. Tozali na elikya ete bikateli malamu mibale oyo ezwami emonisi ndenge Tribinale ekokata makambo wana.

Tozali kosepela komona ete bakonzi oyo batalelaka ntomo ya bato bandimi ete bandeko na biso ya Russie balingi kotikala sembo. Bikateli yango ezali komonisa ete Yehova azali kopambola milende oyo ezali kosalema mpo na kokɔtela nkombo na ye mpe kolongisa boyangeli na ye.​—Nzembo 26:11.