Na mokolo ya 21/12/2020, tribinale ya etúká ya Leninski (na engumba Rostov-sur-le-Don) ekweisaki ndeko Semyon Baybak na likambo mpe ekatelaki ye etumbu ya mbula misato na ndambo ya bolɔkɔ. Atako bongo akokɔta bolɔkɔ te.

Ntango ndeko Semyon azalaki kosamba na tribinale mwa mikolo liboso, asalelaki maloba ya moto moko oyo alandelaka ntomo ya moto na Russie mpo na kosukisa maloba na ye, moto yango alobaki boye: “Batatoli ya Yehova bazali konyokwama mpenza, atako bongo bazali kaka na esengo.” Ndeko Semyon alobaki mpe ete: “Alobi solo. Nalɛmbi nzoto te mpe nazali komiyoka te ete bayini ngai.” Na nsima, atángaki 2 Bakorinti 4:8, 9, mpe asalelaki vɛrsɛ yango mpo na bandeko ya Russie mpe mpo na ye moko: “Tokamolami na ndenge nyonso, kasi tofinani te tii tózanga koningana; tosili mayele, kasi tozangi mwa nzela ya kobima te; tozali konyokwama, kasi tosundolami te; tozali kobambama na nse, kasi tobomami te.”