Na mokolo ya 25/09/2020, a tribinale ya etúká ya Yelizovsky na teritware ya Kamchatka ezali kokana koyebisa ekateli na yango na likambo etali ndeko Konstantin Bazhenov ná mwasi na ye Snezhana, mpe ndeko mwasi Vera Zolotova. Prokirɛrɛ asɛngi ete tribinale ekatela ndeko mobali yango ná mwasi na ye lomande ya 600 roubles (7 850$) mpe ndeko mwasi Zolotova lomande ya 400 roubles (5 235$).

Konstantin Bazhenov

• Abotami na: 1977 (Petropavlovsk-Kamchatsky, na teritware ya Kamchatka)

• Bomoi na ye: Mwana ya liboso na kati ya bana minei. Azali mécanicien mpe ateyaka na eteyelo ya tekiniki. Alingaka koboma mbisi mingi

• Na 2001, abalaki Snezhana, oyo mpe azalaki molakisi. Babotá mwana mwasi moko, nkombo na ye, Elizabeth. Na libota na bango basalelaka Yehova

Snezhana Bazhenova

• Abotami na: 1977 (esanga ya Shikotan, Sakhalin Oblast)

• Bomoi na ye: Abɔkwami na mama na ye. Alingaka bana, mpe asepelaka koteya bana ya maternelle. Kasi sikoyo, akoki koteya bango lisusu te mpo balobi ete azali moto mabe

• Nkɔkɔ na ye ya mwasi nde ateyaki ye makambo ya Nzambe mpe ndenge ya kobondela. Yango esalisi ye akóma kolinga Nzambe mingi mpe Biblia

Vera Zolotova

• Abotami na: 1946 (Yelizovo, teritware ya Kamchatka)

• Bomoi na ye: Akolaki na libota ya bana mingi. Na 1966 abalaki Yuri Zolotov. Babotaki bana mibale. Azwá pansiɔ na mosala ya kɔntable. Alingaka kotambola na makolo na mwa bazamba, masano ya ski mpe kosakana na glase

• Abandá koluka Nzambe kala mpenza. Yango wana, ayekolaki mangomba ebele. Nsukansuka, atondaki na esengo ntango ayebaki ete Nzambe azali sembo mpe alingaka bato. Mobali na ye azalaki Motatoli ya Yehova te. Kasi, azalaki kokamwa mpenza ndenge Biblia ebongisaki bomoi ya mwasi na ye

Na mokolo ya 19/08/2018, bapolisi bakɔtaki kolukaluka biloko na ndako ya Batatoli ya Yehova misato na engumba Yelizovo. Bakangaki bandeko mibali mpe basi 11. Batunaki bango mituna na boumeli ya bangonga ebele mpenza. Na nsima, batikaki Batatoli ya Yehova mwambe. Bongo bakonzi bafundaki ndeko Bazhenov, mwasi na ye, na ndeko Zolotova ete babuki mibeko. Batyaki bango na kasho. Nsima ya mikolo mibale, batikaki bandeko basi bábima. Zuzi moko alobaki ete ndeko Bazhenov atikala na bolɔkɔ. Babimisaki ye nsima ya mikolo mwambe.

Lokola ndeko Bazhenov na mwasi na ye, ná ndeko Zolotova bazali kozela ekateli ya bazuzi, tozali kobondela ete bákoba kotyela Yehova motema na bango mobimba. Biblia ezali kondimisa biso ete Yehova akotondisa basaleli na ye ya sembo na esengo mpe na kimya, mpe ‘akotondisa bango na elikya na nguya ya elimo santu.’​—Baroma 15:13.