Na mokolo ya 07/10/2020, tribinale ya engumba Maïski na République de Kabardino-Balkarie emonaki ete ndeko Yuriy Zalipayev azali na ye na ngambo te mpo na bifundeli oyo bafundaki ye na yango. Bato oyo bafundaki ye bazali na mikolo zomi mpo na kosɛnga bátalela lisusu likambo na ye.

Bafundaki ndeko Zalipayev ete azalaki kotinda bato básala mobulu. Kasi, bato koleka 30 bamonisaki polele ete azalaki nde kolendisa bato bátánga Biblia mpe bámonisela bato mosusu bolingo mpe boboto.

Bazwaki ekateli ya koloba ete ndeko Zalipayev azali na ngambo te na kotalela ekateli oyo ebongiseli ya ONU oyo etalelaka makambo ya kokanga bato kaka mpamba eutaki kozwa oyo emonisaki ete Batatoli ya Yehova bateyaka bato te básala mobulu.

Nsima ya ekateli ya tribinale, ndeko Zalipayev alobaki boye: “Ezala bato ya libota na ngai to baninga na ngai, bango nyonso bakanisaki ete makambo ekoyela ngai ndɔngɔ. Na lisalisi ya Yehova, nazalaki komitungisa mingi te na tribinale. Nazali na esengo mingi mpe na botɔndi epai ya moto nyonso oyo amonisaki ete nazali na ngambo te.”