NEW YORK​—Na mokolo ya 3/05/2018, tribinale ya engumba Saint-Pétersbourg na Russie ekotalela likambo oyo Batatoli ya Yehova basɛngaki ete etalela lisusu ekateli oyo Leta ezwaki ya kobɔtɔla biro ya kala ya misala na bango. Soki tribinale eboyi kotalela ekateli yango, Leta ekoki kobɔtɔla nokinoki lopango yango ya ektarɛ soki 10, oyo ezali na bandako 14 mpe ezali na valɛrɛ ya mosolo ya dolare soki 31 800 000.

Ekateli ya liboso oyo tribinale ya etúká Sestroretskiy ezwaki na sanza ya 12/2017 ekipaki te bilembeteli oyo emonisi ete lopango yango ezali ya Watch Tower Bible and Tract Society of Pennsylvania (WTPA), oyo ezali ebongiseli ya mombongo te, oyo Biro monene na yango ezali na États-Unis. Batatoli ya Yehova na Russie bapesaki WTPA lopango yango na mobu 2000, mpe banda wana WTPA efutaki bakonzi ya Russie mosolo ya dolare milio soki misato ya batakse ya Leta. Atako guvɛrnema ya Russie eyebi ete bandako yango ekómá ya WTPA na kolanda mibeko mbula koleka 17, lelo oyo tribinale ya etúká elobi ete kɔntra oyo WTPA esalaki ezali lisusu na ntina te. Na yango, tribinale elobi ete nkolo-lopango yango ezali nde biro ya misala ya Batatoli ya Yehova ya Russie. Lokola na 2017 tribinale monene elongolaki lotomo oyo Leta epesaki bibongiseli nyonso ya Batatoli ya Yehova ya kotambwisa misala na bango, soki Batatoli ya Yehova balongi te na tribinale, Leta ekosalela ekateli yango mpe ekoki kobɔtɔla mbala moko bandako yango.

Bakosambisa likambo yango na ngonga ya 11:30 na ntɔngɔ, na tribinale ya Saint-Pétersbourg, ul. Basseynaya, 6, Saint Pétersbourg, Russie.

Moto oyo bapanzi-nsango bakobenga:

Na mokili mobimba: David A. Semonian, Biro ya kozwa bansango, +1-845-524-3000