NEW YORK. Lokola balingi kopekisa mosala na bango na Russie, Batatoli ya Yehova bamonaki malamu básɛnga tribinale ya Kremlin mpe bakonzi ya tribinale monene ya Russie bátalela likambo yango. Lisangani ya Mikóló-Bakambi ya Batatoli ya Yehova esɛngi Batatoli koleka 8 000 000 bápesa mabɔkɔ na kampanye ya kokomela bakonzi ya Russie mikanda.

Na mokolo ya 15/03/2017, Ministre ya Justice ya Russie akendaki kofunda Batatoli ya Yehova na tribinale monene ya Russie mpe asɛngaki ete Biro ya misala na bango na Russie etyama na molɔngɔ ya mangomba oyo etindaka bato na mobulu mpe bákanga yango. Efundeli yango ezali na mokano ya kopekisa misala nyonso oyo esalemaka na biro ya Batatoli ya Yehova na Russie. Soki Tribinale monene endimi efundeli yango, biro oyo ezali pene na St. Petersbourg ekokanga baporte na yango. Boye, bibongiseli na bango soki 400 oyo eyebani na Leta ekokangama, ata mpe masangá koleka 2 300 na Russie. Leta ekoki kobɔtɔla bandako ya biro yango, ezala mpe Bandako ya Bokonzi. Longola yango, tribinale ekokóma kolandela Motatoli ya Yehova nyonso kaka mpo na makambo ya losambo na bango. Tribinale monene ekozwa ekateli na mokolo ya 5/04/2017.

David Semonian, molobeli mpo na biro monene ya Batatoli alobi boye: “Lisangani ya Mikóló-Bakambi ya Batatoli ya Yehova elingi kobenda likebi ya bato na likambo wana ya mabe. Kofunda bana-mboka oyo bazali bato ya kimya mpe batosaka mibeko ete bazali bateroriste ezali lokola nde mibeko ya Russie ebongwani. Mpo makambo mpenza oyo epesi nzela na kolandela Batatoli ya Yehova ndenge wana ezali te.”

Ezali mbala ya liboso te ete Batatoli ya Yehova básala kampanye ya ndenge wana. Eleki sikoyo mbula pene na 20, Batatoli bakomaki mikanda mpo na kokɔtela bandeko na bango ya Russie ntango bato mosusu ya guvɛrnema basalaki kampanye ya kobebisa lokumu ya Batatoli ya Yehova na ntango wana. Longola yango, bakampanye mosusu ya kokoma mikanda esí esalemá mpo na kosɛnga bakonzi ya bikólo mosusu, na ndakisa Jordanie, Corée du Sud mpe Malawi etika konyokola Batatoli ya Yehova.

Ndeko Semonian abakisi boye: “Kotánga Biblia, koyemba, mpe kobondela elongo na bato oyo bosambelaka na bango ezali ata na mabe moko te. Tozali na elikya ete kampanye ya mikanda oyo tokomeli bakonzi ya Russie ekotinda bango bátika konyokola bandeko na biso kaka mpamba boye.”

Bato oyo bapanzi-nsango bakoki kobenga:

Mpo na mokili mobimba: David Semonian, Biro ya kozwa bansango, +1-845-524-3000

Russie: Yaroslav Sivulskiy, +7-812-702-2691