Bakonzi ya Russie bazali kokoba na milende na bango ya kobɔtɔla Biro ya Batatoli ya Yehova oyo ezali na Solnechnoye, pene na Saint-Pétersbourg.

Na mokolo ya 20/04/2017, tribinale monene ya Russie ezwaki ekateli ete bálongola lotomo oyo Leta epesaki bibongiseli nyonso ya Batatoli ya Yehova oyo esalemi na kolanda mibeko ya Leta mpe bábɔtɔla bandako esika misala na bango esalemaka, ata kobɔtɔla Biro oyo etambwisaka misala ya Batatoli ya Yehova na mboka yango. Kasi, lopango yango ezali ya Watch Tower Bible and Tract Society of Pennsylvania (WTPA). Boye, prokirɛrɛ azali koluka kosilisa valɛrɛ ya kɔntra ya mbula 17 oyo na kolanda mibeko, ebongiseli ya WTPA nde ekómaki nkolo na yango. Liboso ete tribinale ezwa ekateli wana, ntembe moko te ezalaki mpo na kɔntra yango mpe ebongiseli ya WTPA efutaka batakse na yango banda bandako yango ekóma ya Watch Tower. Bakonzi yango bazali koluka sikoyo ndenge ya kosala mpo mokano na bango ya kobɔtɔla Biro yango eyokana na mibeko ya Leta.

Na kosamba ya liboso oyo esalemaki mokolo ya 29/11/2017, zuzi aboyaki makambo nyonso oyo baavoka ya Batatoli ya Yehova basɛngaki, mpe yango ekómi likambo ya prokirɛrɛ. Longola likambo ya kobungisa bandako ya Biro yango oyo ezali ya bamilio ya badolare, bato soki 400 oyo bazali Ba-Russe mpe bapaya oyo bafandaka kuna, oyo bamosusu na bango basali mbula 20 to koleka, bakozanga esika ya kofanda. Kolongwa wana mpo na kozonga na bandako na bango mpe kokata mosala bamipesaki na yango mpo na kosalisa bandimi ya lingomba na bango na Russie, ezali likambo ya mpasi mpo na bango.

Kosamba lisusu mpo na likambo yango ekobanda mokolo ya 7/12/2017, na ngonga ya 14, na Sestroretskiy, tribinale ya etúká ya Saint-Pétersbourg.