NEW YORK​—Bato soki 300 bayaki na tribinale na mokolo ya misato 19/04/2017, (bamosusu bayaki na ntɔngɔ mpenza, na ngonga ya 2:00) mpo na kolanda kosamba ya mokolo ya mitano na tribinale monene ya Russie. Tribinale ezali kotalela likambo oyo Ministere ya Justice esɛngaki bákanga biro ya misala ya Batatoli ya Yehova. Batatoli ya Yehova bapesaki tribinale badosye 43 oyo emonisaki ndenge bakonzi ya Russie banyokoli bango na boumeli ya mbula zomi oyo euti koleka.

Ntango batalelaki badosye yango, baavoka ya Ministere ya Justice bamonisaki ata likambo moko te na kolanda mibeko oyo epesi nzela ya kokanga biro ya misala ya ebongiseli ya Batatoli ya Yehova mpe bibongiseli na bango mosusu ya losambo na Russie. Balongaki mpe te komonisa ete mosala moko boye oyo ebongiseli moko ya Batatoli ya Yehova esala elekisaka ndelo. Yury Toporov, moko ya baavoka ya biro ya misala ya Batatoli ya Yehova na Russie amonisaki ete badosye mingi oyo bapesaki tribinale ezalaki mpe na balɛtrɛ ya kozongisa botɔndi mpe ya mbano oyo guvɛrnema epesaki biro ya misala ya Batatoli ya Yehova na Russie. Yango emonisi na boumeli ya ebele ya bambula bakonzi ya Russie bandimaka mosala oyo biro yango esalaka mpo na litomba ya bana-mboka. Amonisaki mpe ete bibongiseli mosusu ya Batatoli ya Yehova esalaka mpe mpo na litomba ya bana-mboka. Ebele ya mikanda mosusu mpe emonisi ete baankɛtɛ oyo Ministere ya Justice ezali kosala kobanda 2008 na bibongiseli ya losambo ya Batatoli ya Yehova emonisi ata moke te ete balekisaka ndelo na makambo na bango ya losambo. Baavoka ya Ministere ya Justice bandimaki likambo yango.

Tribinale ekozongela kosambisa likambo yango na mokolo ya 20/04/2017, na ngonga ya 14:00.

Bato oyo bapanzi nsango bakoki kobenga:

Na mokili mobimba: David Semonian, Biro ya kozwa bansango, +1-845-524-3000

Russie: Yaroslav Sivulskiy, +7-911-087-8009