Na mokolo ya 26/04/2020, basakoli koleka 2 000 ya teritware oyo balobaka monɔkɔ ya Krio na Sierra Leone, basepelaki ntango Biblia​—Libongoli ya Mokili ya Sika ya Makomami ya Grɛki ya bokristo ebimaki na monɔkɔ ya Krio.

Ezalaki mpasi mpo bandeko básangana esika moko mpo na molulu yango ya ntina mingi, na kotalela bipekiseli oyo bakonzi ya Leta batyaki mpo na maladi mabe ya coronavirus. Lisusu, bandeko bakokaki te kolanda programɛ ya molulu yango ya sipesiale na nzela ya video mbala moko mpo bandeko mingi na Sierra Leone, mingimingi baoyo bafandaka na bingumba ya mikemike, bazali na batelefone ya malonga te.

Yango wana, Komite ya filiale ya Libéria, oyo etalelaka mosala na Sierra Leone, ezwaki ndingisa na Komite ya Mateya ya Lisangani ya Mikóló-Bakambi mpo na kozwa bilili ya mokuse ya programɛ ya kobimisama ya Biblia. Basakoli balandaki programɛ yango na radio mpe na televizyo, kasi bayebaki te ete Biblia ekobima.

Mwa mikolo liboso ya programɛ yango ya sipesiale, bakendaki kotikela basakoli baanvelɔpɛ oyo ezalaki na Babiblia ya sika na bandako na bango. Bakomaki likoló ya baanvelɔpɛ yango ete kofungola anvelɔpɛ te tii programɛ ya sipesiale ekosila.

Na nsima kaka ya programɛ yango ya sipesiale, ndeko Megan Diaz, oyo asakolaka na teritware epai mposa ezali mingi na Sierra Leone, alobaki boye: “Moyekoli na ye moko ya Biblia abengaki ye mpo na koyebisa ye ete azwaki ntango ya kolanda diskur yango mpe alobi ete azali na esengo ndenge Yehova asali ete Biblia ebongolama na monɔkɔ oyo ya Krio! Tokosalela Biblia yango ya sika lobi na boyekoli na biso.”

Tounkara azali moyekoli ya Biblia oyo alobaka monɔkɔ ya Krio. Alobaki boye: “Ezali komonisa mpenza ete Yehova alingi ete moto nyonso ayoka nsango, bato bakoki kaka te koyekola yango, kasi mpe koyeba yango malamu mpe ebongi mpo na koteya bana na bango. Nazali mpenza na esengo komona libongoli oyo ya sika na monɔkɔ na biso!”

Krio ezali monɔkɔ ya Créole oyo euti na Anglais, oyo bato mingi balobaka na Sierra Leone. Babongoli minei balekisaki mbula mibale na ndambo mpo na kobongola Makomami ya Grɛki ya bokristo na monɔkɔ ya Krio. Libongoli yango etyamaki na site jw.org na mokolo ya 27/04/2020 mpo na baoyo bakoki kozwa yango na Internet

Elongo na bandeko na biso ya Sierra Leone, tozali na botɔndi mingi epai ya Yehova ndenge Makomami ya Grɛki ya bokristo na monɔkɔ ya Krio ebimi. Ezali ‘likabo ya malamu mpe libonza oyo ekoki mpenza’ oyo euti epai ya Tata na biso ya likoló, Yehova.​—Yakobo 1:17.