BANGKOK​—Bakonzi ya Leta ya Thaïlande bazali kosalela mikanda oyo Batatoli ya Yehova babimisaka mpo na kopesa basali ya Leta formasyo na makambo etali koteya bana, koboya kobɛta bato ya libota mpe ndenge ya kozala na nzoto mpe makanisi ya malamu. Sanza oyo ekokisi mbula misato banda bakonzi yango ya Leta basalelaka mikanda ya Batatoli ya Yehova mpo na kobongisa makambo etali bana-mboka.

Programɛ ya formasyo yango ezali kopesama na ba-centre koleka 8 700 na ekólo mobimba. Longola yango, guvɛrnema etye centres d’aide au développement local (CDLC) 11 mingimingi mpo na kopesa bakonzi ya kartye formasyo. Chaiwat Saengsri, (oyo azali na katikati na fɔtɔ) azali mokambi ya CDLC na etúká ya Nakhon Nayok, na nɔrdi-ɛsti ya Bangkok; alobi boye: “Batatoli ya Yehova bakamwisaka ngai mpo mokano ya misala na bango ezali polele mpenza. Balingaka kosalisa bana-mboka báyeba Mozalisi malamu mpenza. Biso mpe tozali na mokano yango mpo na kosalisa bana-mboka ya ekólo na biso bábongisa bizaleli na bango mpo bázala na kimya mpe bomoi na bango ekóma malamu koleka.” Abakisi boye: “Na ndakisa, Ministere oyo ekambaka makambo etali bana-mboka mpe kobatela bato esalelaki lisolo ‘Ndenge ya koboya maloba mabe’ oyo ebimaki na zulunalo Lamuká! mpo na koteya bakonzi ya kartye. Tomoni ete lisolo yango ezali na ntina mingi mpo na formasyo na bango.” Na yango, Chaiwat asɛngaki Batatoli ya Yehova bátya mikanda na bango ntango likita na bango oyo babengi “SMART Leader” ezalaki kosalema, likita oyo esangisaki bakonzi ya kartye 100 mpe balakisi 20 oyo bautaki na bitúká 28 ya ekólo yango, bango nyonso bazwaki formasyo etali mokumba ya baoyo bazali kokamba mpe ndenge oyo bakoki kosalisa bana-mboka na bango bákende liboso. Na fɔtɔ Batatoli ya Yehova bazali pene ya Chaiwat.

Anthony Petratyotin, molobeli ya Batatoli ya Yehova na Thaïlande, alobi boye: “Tozali na esengo ya koyeba ete bakonzi ya Leta bazali kosalela malamu batoli ya Biblia oyo ezali na mikanda na biso. Tokokoba kopesa bakonzi yango mikanda na biso. Tokoki mpe kopesa bango yango ntango tosakwelaka bato nyonso nsango malamu.”

Bato oyo bapanzi-nsango bakoki kobenga:

Na mokili mobimba: David Semonian, Biro ya kozwa bansango, +1-845-524-3000

Thaïlande: Anthony Petratyotin, +66-2-375-2200