Te, toyinaka te Batatoli ya Yehova oyo bazwá batisimo kasi batiká kosakola, to mpe koyangana na makita na biso. Kutu, tolukaka nde kosalisa bango mpo bákóma lisusu kosepela na makambo ya Nzambe.

 Soki moto asali lisumu ya monene, tobimisaka ye na lisangá mbala moko te. Kasi, soki Motatoli oyo azwá batisimo akómi na momeseno ya kobuka mibeko ya Biblia mpe aboyi kobongola motema, tokobimisa ye na lisangá. Biblia elobi polele ete: “Bólongola moto mabe na kati na bino.”​—1 Bakorinti 5:13.

 Mobali oyo abimisami na lisangá kasi mwasi ná bana na ye bazali kaka Batatoli ya Yehova akosala nini? Bakosala lisusu makambo ya losambo elongo te, kasi boyokani na bango na kati ya libota ekozala kaka. Libala mpe bomoi ya libota ekokoba mpe bakotika kolingana te.

 Bato oyo babimisami na lisangá bakoki koyangana na makita. Soki basepeli, bakoki koluka toli epai ya bankulutu ya lisangá mpo bázonga Batatoli ya Yehova. Soki moto oyo abimisaki na lisangá atiki bizaleli ya mabe mpe amonisi ete alingi mpenza kotambwisa bomoi na ye ndenge Biblia esɛngi, akoki kozongisama na lisangá.