Nabotamá na Montreal, engumba oyo eleki monene na Quebec, na Canada. Baboti na ngai babɔkɔlaki ngai ná bandeko na ngai misato, na Rosemont, kartye moko kitoko. Biso nyonso tozalaki na bomoi moko kitoko mpe na kimya.

 Ntango nazalaki elenge mpenza, nazalaki kosepela na Biblia. Nabosanaka te ndenge nazalaki kotánga makambo etali bomoi ya Yesu na Testama ya Sika ntango nazalaki na mbula 12. Lokola bolingo mpe motema mawa ya Yesu esimbaki motema na ngai, nazalaki na mposa ya kozala lokola ye. Likambo ya mawa, mposa yango esilaki ntango nakómaki kokola mpe kozala elongo na baninga mabe.

 Papa azalaki mobɛti-miziki mpe apesaki ngai ebɛtɛli na ye ya miziki mpe mposa ya kobɛta miziki ekómaki likambo ya liboso na bomoi na ngai. Lokola nalingaki miziki mingi mpenza, nayekolaki kobɛta gitare. Na nsima, nasalaki etuluku ya miziki ya rock elongo na mwa baninga mpe tobɛtaki miziki na bisika mingi. Mwa bato oyo babimisaka miziki, oyo bayebani mingi basepelaki na miziki na biso mpe bayebisaki ngai ete balingi kotombola miziki na ngai. Nasalaki kɔntra ná kompanyi moko monene ya kobimisa miziki. Miziki na ngai ekómaki koyebana mpe kobɛta mbala na mbala na baradio na Québec.

 Namonaki lokola nazalaki na eloko nyonso oyo nazalaki na mposa na yango. Nazalaki elenge mpe vɛdɛti, mpe nazalaki kozwa mbongo mingi na mosala oyo nalingaki. Soki ntɔngɔ etani, nazalaki kokende kosala ngalasisi, koyanola na mituna ya bapanzi-nsango, kotya basinyatire mpe koleka na televizyo. Soki butu ekɔti, nazalaki kobɛta miziki mpe kokende bafɛti. Mpo na kolongola mitungisi oyo nazalaki na yango mpo na ebele ya bato oyo bazalaki kolinga miziki na ngai, nakómaki komɛla masanga na bolenge mpe mokemoke nakómaki mpe kosalela drɔgɛ. Nakómaki mafumafu mpe na bomoi ya mbindo.

 Bato mosusu bazalaki kolula lolenge ya bomoi oyo nazalaki na yango mpo ezalaki komonana lokola nazali na esengo. Kasi na nse ya motema, nazalaki komiyoka lokola nazangi eloko moko, mingimingi ntango nazali ngai moko. Nazalaki kotungisama na makanisi mpe kobanga. Likambo ya mawa, ntango lokumu na ngai emataki mpenza, bato mibale oyo bazalaki kobimisa miziki na ngai bakufaki na maladi ya sida. Ebangisaki ngai mpenza! Atako nalingaki miziki, nayinaki lolenge ya bomoi ya baalangá-nzembo.

 Atako nazalaki na lokumu, nayebaki ete eloko moko ya mabe mpenza ezali kosalema na mokili. Ndenge nini makambo ya kozanga bosembo ekoki kozala mingi boye? Nazalaki komituna mpo na nini Nzambe azali kosala eloko te. Kutu, mbala mingi nazalaki kobondela Nzambe apesa ngai eyano. Ntango nazalaki kopema nsima ya kosala vizite moko, nazongelaki kotánga Biblia. Atako nazalaki kokanga mpenza ntina te ya makambo mingi oyo natángaki, namonaki ete nsuka ya mokili ezali lisusu mosika te.

 Ntango nazalaki kotánga Biblia, nayaki komona ete na libaku moko, Yesu alyaki eloko te na boumeli ya mikolo 40 na esobe. (Matai 4:1, 2) Namilobelaki boye, soki nasali bongo, mbala mosusu Nzambe akomimonisa epai na ngai, yango wana natyaki dati oyo nakobanda kokila bilei. Pɔsɔ mibale liboso nabanda yango, Batatoli ya Yehova mibale babɛtaki porte na ngai mpe nakɔtisaki bango na ndako lokola nde nazalaki kozela bango. Natalaki moko na bango mpenza na miso, oyo nkombo na ye ezali Jacques, mpe natunaki ye, “ndenge nini tokoki koyeba ete tozali kobika na mikolo ya nsuka ya mokili oyo?” mpo na koyanola, afungolaki Biblia na ye mpe atángaki 2 Timote 3:1-5. Nasopelaki bango mibale ebele ya mituna mosusu mpe nakamwaki na biyano oyo bapesaki ngai mpo ezalaki ntango nyonso kouta na Biblia. Nsima ya mwa bavizite na bango, nayaki komona ete ntina ya kokila bilei ezali te.

 Bakómaki koyekola na ngai Biblia mbala na mbala mpe nsukansuka, nakataki nsuki milai oyo nazalaki na yango mpe nakómaki koyangana na makita nyonso na Ndako ya Bokonzi. Koyamba oyo bayambaki ngai na makita yango endimisaki ngai lisusu ete namoni lingomba ya solo.

 Kasi, mpo nasalela makambo oyo nazalaki koyekola na Biblia, esɛngaki nabongola mpenza bomoi na ngai. Esɛngaki natika drɔgɛ mpe bomoi ya mbindo oyo nazalaki na yango. Esɛngaki mpe natika ezaleli ya koluka kaka matomba na ngai moko mpe kotyela basusu likebi. Lokola nazalaki kobɔkɔla bana ngai moko, nasengelaki koyekola ndenge ya kosalisa bana na ngai mibale bámiyoka malamu mpe bákóma baninga ya Yehova. Yango wana, natikaki mosala ya miziki mpe nazwaki mosala ya mbongo mingi te na izini moko.

 Kosala mbongwana wana nyonso ezalaki pɛtɛɛ te. Ntango nazalaki kosala makasi natika drɔgɛ, nakómaki koyoka lokola nazangi eloko moko boye, mpe na nsima nakweaki moke na motambo ya drɔgɛ. (Baroma 7:19, 21-24) Kotika bomoi na ngai ya mbindo nde ezalaki mpasi koleka. Longola yango, mosala na ngai ya sika ezalaki kosilisa ngai makasi mpe salɛrɛ wana ya moke ezalaki kolɛmbisa ngai nzoto. Ezalaki kozwa ngai sanza misato mobimba mpo nazwa mbongo oyo nazalaki kozwa na boumeli ya ngonga mibale mpamba na mosala na ngai ya miziki.

 Libondeli esalisaki ngai nakoba kosala mbongwana wana atako ezalaki pɛtɛɛ te. Namonaki mpe ete kotánga Biblia mbala na mbala ezali na ntina. Bavɛrsɛ ya sikisiki elendisaki ngai mpenza. Moko na yango ezali 2 Bakorinti 7:1, oyo esɛngi bakristo ‘bámipɛtola na mbindo nyonso ya mosuni mpe ya elimo.’ Vɛrsɛ mosusu oyo endimisaki ngai ete nakoki kotika bizaleli na ngai ya mabe ezali Bafilipi 4:13, oyo elobi: “Na makambo nyonso nazali na makasi na lisalisi ya moto oyo apesaka ngai nguya.” Yehova Nzambe ayanolaki mabondeli na ngai mpe asalisaki ngai nakanga ntina mpe nasalela makambo oyo ezali na Biblia. Yango etindaki ngai namipesa epai na ye. (1 Petro 4:1, 2) Nazwaki batisimo mpe nakómaki Motatoli ya Yehova na 1997.

 Nandimaka mpenza ete soki nakobaki na lolenge ya bomoi oyo nazalaki na yango liboso, mbɛlɛ lelo nazali na bomoi te. Kutu, nazali sikoyo na bomoi ya esengo! Elvie, mwasi malamu oyo nazwá, azali mpenza lipamboli mpo na ngai. Ngai ná ye tosepelaka koteya basusu Biblia mpe tolekisaka ngonga mingi na mosala yango. Yango epesaka ngai esengo mpenza. Nazali mpenza na botɔndi epai ya Yehova ndenge abendaki ngai epai na ye.​—Yoane 6:44.