Bryn, oyo afandaka na Caroline du Nord, na États-Unis, azali moko ya bandeko ya Komite ya boyokani na minganga. Asalaka elongo na balopitalo mingi mpo na kopesa Batatoli ya Yehova oyo bazali na maladi lisalisi ya monganga.

 Mpo na maladi mabe ya coronavirus, balopitalo mingi ezali kopekisa bato báyaka kotala baoyo bazali kobɛla. Bryn abengaki na telefone mosali moko na lopitalo moko ya mboka mpo na koyeba soki ndenge nini bakoki kosalisa Batatoli ya Yehova oyo bazali kobɛla.

 Mosali yango alekisaki mesaje ya Bryn epai ya monganga mosungi ya lopitalo yango. Lokola bapekisaki bato bákende kotala bato na lopitalo, Bryn asɛngaki ete bápesa nimero na ye ya telefone epai ya Batatoli oyo bazali kobɛla mpo akoka kosolola na bango. Bandimaki bosɛnga na ye.

 Na nsima, Bryn akanisaki basali oyo basalaka na lopitalo. Alobaki na monganga mosungi ya lopitalo yango ete akamwaki na misala nyonso oyo ezalaki kosalema na lopitalo, mpe ete azalaki na elikya ete moto nyonso azalaki na sante malamu. Alobaki lisusu ete atángaki ete bato mingi, mingimingi basali na lopitalo, bazalaki kotungisama mingi mpo na maladi mabe oyo ya coronavirus.

 Monganga mosungi ayebisaki ye ete coronavirus esalaki ete bomoi ekóma lisusu mpasi na lopitalo.

 Bryn ayanolaki ye boye: “Site Internet na biso ezali na makambo mingi ya ntina mpo na koyeba ndenge ya kobunda na mitungisi ya makanisi. Soki okɔti na site Internet jw.org mpe obɛti liloba ‘mitungisi’ na elembo ya kosala bolukiluki, okomona masolo ya kolendisa mpo na basali na bino.”

 Kaka ntango bazalaki kosolola, monganga mosungi akɔtaki na site na biso, abɛtaki liloba “mitungisi” na elembo ya kosala bolukiluki mpe amonaki masolo ndenge na ndenge. Akamwaki mpe alobaki boye: “Nakolakisa yango monganga mokambi. Ekozala na ntina mpo na basali na biso mpe mpo na bato mosusu. Nakobimisa masolo yango mosusu ya papye mpe nakopesa yango bato mosusu.”

 Mwa bapɔsɔ na nsima, Bryn asololaki na monganga mokambi, mpe monganga mokambi ayebisaki ye ete akɔtaki na site Internet na biso, mpe akamwaki komona masolo oyo elobeli mitungisi mpe masolo mosusu ya ndenge wana. Bakabolelaki minganga mpe basali mosusu ya lopitalo masolo oyo babimisaki na papye.

 Bryn alobaki boye: “Monganga mokambi apesaki ngai matɔndi mpo na mosala na biso mpe mpo na masolo oyo ekomamaki malamu mpenza, oyo esalisaki bango mpenza.”