Na 2011, mobali moko akimaki mboka na ye Érythrée mpo na kokende kofanda na Norvège. Mokolo moko, ntango Batatoli ya Yehova bayaki kotala ye mpo na kosolola na ye makambo ya Biblia, ayebisaki bango ete akutanaki na Batatoli ya Yehova na Érythrée. Alobaki ete, ntango azalaki soda, amonaki ndenge Batatoli ya Yehova oyo bakangamaki mpo na kondima na bango bawanganaki te kondima na bango mpo na mbamba oyo bazalaki kotya bango mpo na mosala ya soda, ntango bazalaki konyokola bango.

 Lokola likambo ebongwanaki na mbalakaka, mobali yango akɔtaki bolɔkɔ. Na bolɔkɔ, akutanaki na Batatoli ya Yehova misato: Paulos Eyasu, Negede Teklemariam, mpe Isaac Mogos, oyo bakangamaki mpo na kondima na bango banda na 1994.

 Na bolɔkɔ, mobali yango amonaki na miso na ye moko ndenge Batatoli ya Yehova basalaka makambo oyo bateyaka. Amonaki ete baninga na ye bato ya bolɔkɔ bazali sembo mpe ete bazalaki kobengisa basusu mpo bálya esika moko bilei na bango. Amonaki ndenge Batatoli ya Yehova bazali koyekola Biblia elongo mokolo na mokolo mpe bazalaki kobengisa basusu báya kosangana na bango. Ntango basɛngaki bango bátya sinyatire na mokanda moko mpo na komonisa ete bawangani kondima na bango, baboyaki kotya sinyatire.

 Ndakisa ya bandeko na biso wana ekamwisaki mobali wana ya motema sembo. Nsima ya kokende kofanda na Norvège, alingaki koyeba ntina oyo Batatoli ya Yehova bazalaka na kondima makasi boye. Na yango, ntango Batatoli ya Yehova bayaki kotala ye, andimaki koyekola Biblia mpe abandaki koyangana na makita na bango.

 Na sanza ya 09/2018, azwaki batisimo mpe akómaki Motatoli ya Yehova. Lelo oyo, azali koluka libaku ya kosolola na bato ya Érythrée mpe ya Soudan, mpo na kolendisa bango báyekola Biblia mpe bakómisa kondima na bango makasi.