Balataki elembo ya langi ya violɛ
Maud afandaka na France mpe asalaka na eteyelo moko esika abatelaka bana oyo bazali bibɔsɔnɔ ntango bazali na kelasi. Mokolo moko, bana kelasi bazalaki koyekola makambo etali bakaa ya bakangami ya Banazi mpe ndenge basoda ya Nazi babomaki ebele ya Bayuda. Bato ya bolɔkɔ na kaa bazalaki kolata iniforme oyo ezalaki na elembo moko oyo bapakolá langi. Langi mpe ndenge ya elembo yango ezalaki komonisa ntina oyo moto yango akangami na bolɔkɔ.
Mpo na bakangami oyo balataki iniforme oyo batyá elembo ya violɛ, molakisi ayebisaki bana kelasi boye: “Nakanisi bakangaki bango mpo bazalaki bato oyo basangisaka nzoto basi na basi to mibali na mibali.” Nsima ya kelasi, Maud asololaki na molakisi mpe ayebisaki ye ete Banazi bazalaki kosalela elembo ya langi ya violɛ mpo na koyeba Batatoli ya Yehova. * Alakaki molakisi yango ete akoyela ye buku oyo ezali kolobela likambo yango. Molakisi andimaki mpe asɛngaki Maud alimbolela bana kelasi makambo yango.
Na kelasi mosusu molakisi asalelaki karte moko mpo na kotángisa bana kelasi bilembo ndenge na ndenge oyo bazalaki kolatisa bakangami. Karte yango emonisaki malamu ete elembo ya violɛ ezalaki komonisa Batatoli ya Yehova. Nsima ya kelasi, Maud alakisaki molakisi yango makambo mosusu mpo na likambo yango. Molakisi andimaki mpe asɛngaki ete Maud ayebisa bana kelasi makambo mosusu.
Maud asimbi mikanda oyo asalelaki
Maud abongisaki mwa lisolo ya miniti 15 mpo na kelasi ya liboso, kasi ntango ekomaki ngala ya kosala yango, molakisi yango ayebisaki ye ete: “Okoki kosala ngonga moko.” Maud alakisaki video oyo emonisaki ndenge Banazi banyokolaki Batatoli ya Yehova. Ntango ekómaki esika video emonisi ndenge Banazi bazwaki bana ya Batatoli ya Yehova 800 mpe bakabolaki bango na baboti na bango, Maud atɛlɛmisaki video mpe atángaki bandakisa ya bana misato na kati ya bana yango. Ntango video esilaki, Maud atángaki mokanda moko ya 1940 oyo elenge moko ya Autriche ya mbula 19 akomelaki baboti na ye mwa bangonga liboso baboma ye na Banazi. *
Maud ayebisaki makambo yango na bana kelasi mosusu. Mpiko ya Maud esali ete balakisi wana mibale bábosanaka te kolobela Batatoli ya Yehova ntango bazali koteya bana kelasi makambo etali bato oyo bazalaki na bakaa ya bakangami ya Banazi.
^ Na etumba ya mibale ya mokili mobimba, Batatoli ya Yehova na Allemagne oyo bazalaki kobenga bango Bibelforscher (Bayekoli ya Biblia), bakangamaki mpo baboyaki kopesa boyangeli ya Banazi mabɔkɔ.
^ Bakatelaki Gerhard Steinacher etumbu ya liwa mpo aboyaki kokɔta na mosala ya soda na mampinga ya Allemagne. Na mokanda na ye ya nsuka, Gerhard akomaki boye: “Nazali naino mwana. Nakotikala sembo kaka soki Nkolo apesi ngai makasi, mpe nazali kosɛnga ye apesa ngai yango.” Na ntɔngɔ ya mokolo elandaki babomaki Gerhard. Na lilita na ye bakomaki: “Akufá mpo na nkembo ya Nzambe.”
Talá mpe...
MITUNA OYO BATO BATUNAKA MINGI
Makambo nini Batatoli ya Yehova bakutanaki na yango na eleko ya Banazi?
Eyano ekoki kokamwisa yo.
BIYANO NA MITUNA YA BIBLIA
Mpo na nini Nzambe atikaki Banazi báboma ebele ya Bayuda?
Bato mingi balukaka koyeba ntina oyo Nzambe ya bolingo akoki kotika bampasi nyonso oyo tomonaka. Biblia epesi biyano ya malamu!