Virginia, oyo azali Motatoli ya Yehova, azali kobɛla maladi babengi syndrome d’enfermement. Asalaka ata bamuvema te. Ata bongo, akoki komona mpe koyoka, kofungola miso, kokanga yango mpe koningisa mwa moke motó. Akoki koloba te to kolya te. Liboso, azalaki na sante ya malamu mpe nzoto makasi. Kasi na mokolo moko na ntɔngɔ na 1997, ayokaki mpasi makasi mpe oyo ezalaki kosila te na motó na ye. Mobali na ye amemaki ye na lopitalo, mpe na mpokwa ya mokolo yango kaka azalaki lisusu komiyeba te. Alamukaki pɔsɔ mibale na nsima na esika oyo batyaka bato oyo babɛlaka makasi, azalaki kosala muvema te mpe azalaki kopema na lisalisi ya masini. Na boumeli ya mwa mikolo, azalaki koyeba eloko te mpe azalaki komiyeba te.

 Virginia alobeli makambo oyo esalemaki na nsima. Alobi boye: “Makanisi na ngai ekómaki kozonga malɛmbɛmalɛmbɛ. Nabondelaki Yehova mingi. Nalingaki kokufa te mpe kotika mwana na ngai ya mobali ya mbula 9 akola kozanga mama. Mpo na kozwa mpiko, nabandaki kokanisa na bavɛrsɛ ya Biblia oyo nayebaki.

 “Na nsima, babimisaki ngai na esika oyo batyaka bato oyo babɛlaka makasi. Nsima ya kolekisa sanza 6 na balopitalo ndenge na ndenge, nazongaki na ndako. Nazalaki kaka kosala bamuvema te mpe nakokaki te kosala likambo moko ngai moko. Nalɛmbaki mpenza nzoto. Nazalaki komiyoka ete nakoki kosala eloko te mpo na basusu, ezala mpe mpo na Yehova. Nazalaki mpe komitungisa mpo nazalaki te na likoki ya kobatela mwana na ngai.

 “Nabandaki kotánga masolo ya bandeko oyo bazalaki konyokwama na maladi makasi lokola ngai mpe nakamwaki komona nyonso oyo bakokaki kosala mpo na Yehova. Yango wana, nasalaki makasi nazala na makanisi malamu mpe natya makanisi na oyo nakoki kosala. Liboso nabɛla makasi, nazalaki na ntango mingi te mpo na makambo ya elimo. Sikoyo mokolo nyonso, nazali na mokolo mobimba mpo na kosala makambo ya elimo. Mpo na yango, na esika nabungisa elikya na ngai, nasalaka makasi natya likebi na boyokani na ngai ná Yehova.

 “Nayekolaki kosalela ordinatɛrɛ. Nasalelaka programɛ moko ya ordinatɛrɛ oyo ekomaka makambo oyo nasalaka ntango nazali koningisa motó. Atako elɛmbisaka, teknoloji yango esalisaka ngai nayekola Biblia mpe nayebisa bato mosusu elikya oyo nazali na yango na nzela ya mikanda to ya bamesaje. Mpo na kosolola na bandeko mpe baninga na ngai, nasalelaka tablo moko oyo ezali na balɛtrɛ na likoló. Moto oyo azali elongo na ngai alakisaka ngai lɛtrɛ mokomoko, soki aponi lɛtrɛ ya mabe, nafungolaka mbuma ya miso na ngai, mpe soki aponi lɛtrɛ ya malamu nakangaka miso na ngai. Tosalelaka tekiniki yango tii tokobimisa maloba to bafraze. Bandeko basi mingi oyo balekisaka ntango mingi elongo na ngai, bayebaka malamu soki nalingi koloba nini. Ntango bayebaka te soki nalingi koloba nini, tosɛkaka elongo.

 “Nasepelaka mingi kopesa mabɔkɔ na misala ya lisangá. Nazangisaka makita te mpe sikoyo tozali kosala yango na nzela ya video. Nakomaka biyano na ngai, mpe ndeko mosusu atángaka yango ntango tosalaka lisolo mituna mpe biyano. Nalandaka mpe programɛ ya TV JW * elongo na bandeko ya etuluku na biso ya mosala ya kosakola.

 “Esali sikoyo mbula 23 banda nakóma kobɛla. Na bantango mosusu, nayokaka mawa. Kasi kobondela, kozala mbala na mbala na bandeko ya lisangá mpe komipesa na makambo ya elimo, esalisaka ngai nalongola mawa. Kutu, na lisalisi ya bandeko ya lisangá, esali sikoyo mbula 6 banda nazali mobongisi-nzela mosungi. Nazali kosala makasi nazala ndakisa malamu mpo na mwana na ngai Alessandro, oyo abalá mpe azali nkulutu. Ye ná mwasi na ye bazali babongisi-nzela ya ntango nyonso.

 “Nakanisaka mbala mingi na makambo oyo nakokoka kosala na paradiso. Likambo ya liboso oyo nazalaka na mposa ya kosala ezali ya kosalela mongongo na ngai mpo na kolobela Yehova. Nakosepela kokende na zamba mpe penepene ya mai mpo na kosepela na bozalisi. Mpe lokola esali sikoyo mbula koleka 20, nalyaka kaka na nzela ya masini oyo babengi sonde, nakozala na mposa makasi ya kobuka pɔme mpe kolya yango. Na ntembe te lokola nazali moto ya Italie, nakozela na motema moko kolamba mpe kolya bilei oyo bato ya Italie balingaka mingi, na ndakisa pizza!

 “‘Elikya ya lobiko’ esalisi ngai nabatela makanisi na ngai. (1 Batesaloniki 5:8) Kokanisa mokili ya sika epesaka ngai esengo atako nazali na likoki te ya kosala makambo mingi, mpe nazali na elikya ete na mokili ya sika nakozala na makoki wana nyonso. Nazali kozela na motema likoló ‘bomoi ya solosolo’ oyo Yehova alaki kopesa biso na nzela ya Bokonzi na ye.”​—1 Timote 6:19; Matai 6:9, 10.