Madián ná Marcela bazalaki na mbongo mingi na Medellín, engumba moko na ekólo Colombie. Madián azalaki na mosala oyo ezalaki kofuta ye malamu mpe yango esalaki ete báfanda na apartema moko ya kitoko. Kasi lokola bazali basaleli ya Yehova, likambo moko etindaki bango bátalela lisusu malamu makambo oyo basengeli kotya na esika ya liboso na bomoi na bango. Balobi boye: “Na 2006, tolandaki liyangani ya mokolo moko oyo ezalaki na motó ya likambo: ‘Batelá liso na yo alima.’ Badiskur mingi ya liyangani yango emonisaki ntina ya kozala na bomoi oyo ezangi mindɔndɔ mpo na kosalela Nzambe lisusu mingi. Ntango tozongaki na ndako, tomonaki ete biso tozalaki kolanda toli yango te. Toyaki komona ete tozalaki se kosomba biloko ebele mpe tozalaki na banyongo mingi.”

 Mateya oyo Madián ná Marcela bayokaki na liyangani yango esalisaki bango bákómisa bomoi na bango pɛpɛlɛ. Balobi boye: “Tobandaki naino na kosalela mbongo na mayele. Tolongwaki na ndako ya monene mpe tokómaki kofanda na ndako ya moke, totɛkaki motuka na biso mpe tosombaki tukutuku.” Lisusu, batikaki kokende na bisika oyo ezalaki kotinda bango básomba biloko mingi. Bakómaki kolekisa ngonga mingi na mosala ya koteya bato Biblia. Mpe bakómaki baninga ya bato oyo bazalaki kosalela Yehova na molende, lokola babongisi-nzela monene. *

 Eumelaki te Madián ná Marcela bazwaki ekateli ya kosalela Yehova lisusu mingi. Bakendaki kofanda na mwa engumba moko ya moke na lisangá moko oyo mposa ya basakoli ezalaki mingi. Mpo na kokende kofanda kuna, Madián asengelaki kotika mosala na ye. Patrɔ na ye akanisaki ete abɛli motó. Na yango, Madián asololaki na patrɔ na ye, atunaki ye boye: “Ozwaka mbongo mingi, kasi ozali na esengo?” Madián andimaki ete azalaka na esengo te mpo azalaki na mikakatano mingi oyo azalaki kokoka kosilisa yango te. Na nsima, Madián alobaki na ye boye: “Likambo ya ntina ezali te mbongo boni moto azali kozwa. Kasi ezali nde koluka koyeba nini epesaka mpenza esengo. Koteya bato makambo ya Nzambe ezali kopesa ngai ná mwasi na ngai esengo. Mpe tolingi kolekisa lisusu ngonga mingi na mosala Nzambe mpo tókóma lisusu na esengo mingi.”

 Madián ná Marcela bazali sikoyo na esengo ya solosolo mpenza mpamba te kosalela Nzambe ezali likambo eleki ntina na bomoi na bango. Na boumeli ya mbula 13 oyo eleki, bapesaki mabɔkɔ na masangá oyo mposa ezalaki mingi na nɔrdi-wɛsti ya ekólo Colombie. Lelo oyo, bazali na esengo ya kosala lokola babongisi-nzela monene.