Kobanda mokolo ya 22 tii 28/08/2016, Batatoli ya Yehova na Botswana, mboka oyo ezali na esika oyo batimolaka diama oyo eleki ntalo mingi na mokili mobimba, balakisaki biloko ya motuya ya ndenge mosusu na fware oyo efungwamaki kuna. Mesa na bango ezalaki na mikanda oyo elimbolaka Biblia, site jw.org mpe bavideo oyo elendisaka boyokani malamu na libota.

Bavideo Kómá moninga ya Yehova oyo elendisaka kosalela mateya ya Biblia, ebendaki likebi ya baboti mpe bana oyo bayaki na mesa yango. Lokola bavideo ezalaka mingi te na Setswana, monɔkɔ ya Leta ya Botswana, bato mingi oyo bayaki na fware yango batunaki soki bakoki kozwa bavideo yango ndenge nini.

Bato na Botswana mobimba oyo bayaki na fware yango bazwaki mikanda soki 10000 mpe bato 120 basɛngaki ete Batatoli ya Yehova báyekola na bango Biblia. Mingi bakamwaki ndenge Batatoli ya Yehova oyo balobaka Setswana mpe Anglais bazalaki kosala elongo na fware yango.

Ntango bakambi ya fware yango batalaki bamesa mpe biloko oyo bato balakisaki na fware yango, Batatoli ya Yehova babimaki bato ya liboso ya kozwa mbano.