ONU esalaki likita babengi Conférence de Paris sur les changements climatiques (COP21) kobanda 30/11 tii 12/12/2015, oyo esangisaki bato ya mikili 195 na Paris, na France, mpo na kolobela ndenge bato bakoki kotika kosala ete klima ebeba. Bato soki 38 000, na kati na bango bakonzi ya baguvɛrnema, bato ya siansi, bato oyo bayekolaka mabele mpe bato ya mombongo, bazalaki na likita yango. Mingi na bango bakendaki na esika oyo ezalaki pene wana, oyo babongisá mpo na kopesa bansango etali klima mpo báyeba makambo mingi mosusu etali mbongwana ya klima.

Atako Batatoli ya Yehova bakɔtaki likita yango te, kasi bakipaka mpe makambo etali mabele. Mingi na bango basalaki kampanye na Paris mpo na kolobela elikya oyo Biblia epesi ya kozala na bomoi na mabele oyo mopɛpɛ ezali kitoko.

Na bisi, Motatoli ya Yehova moko asololaki na mobali moko oyo autaki na ekólo Pérou mpe alataki bilamba ya bonkɔkɔ ya mboka na bango. Mobali yango alobaki ete atako azali nzoto malamu mpe asepelaka ndenge afandaka na ngomba moko kitoko, kasi amitungisaka kaka mpo na avenire ya planɛti na biso. Asepelaki mingi na elikya kitoko oyo ayokaki mpe na mwa kosɛka azwaki karte ya site na biso www.pr418.com, oyo ndeko yango apesaki ye.

Na train, Batatoli ya Yehova mibale basololaki na moto moko ya Amerika oyo ayekolaka mabele. Akamwaki ntango ayokaki ete ebongiseli moko (Green Building Initiative) epesaki Batatoli ya Yehova certificat babengi Four Green Globe mpo na mbala ya mibale mpo bandimaki kotonga na ndenge oyo ekobebisa mabele te bandako mibale ya sika na Wallkill, na New York. Ye mpe asepelaki kozwa karte ya site na biso.

Bato mingi balakaki ete bakokɔta na site na biso mpo bakamwaki ndenge Batatoli ya Yehova bakipaka mpe makambo etali kobatela mabele. Ntango moto moko ya Canada, oyo ayanganaki na likita yango ayokaki ete Batatoli ya Yehova babatelaki bazumbu ya bandɛkɛ oyo ezalaka na langi ya bulé ntango bazalaki kotonga Biro na bango ya sika na Warwick, na New York; alobaki boye: “Liboso nakóma kubundela likambo etali kobatela mabele, nazalaki liboso koyekola bandɛkɛ. Nayebaki te ete Batatoli ya Yehova mpe bazalaka na limemya mpo na banyama. Nakotánga mikanda na bino mpe nakokɔta na site na bino mpo nayeba makambo mosusu etali bino!”