Balakisi na ekólo Philippines bamoni matomba ya kosalela site JW.ORG
Na 2016, Batatoli ya Yehova bazwaki libaku ya kolakisa etuluku ya balakisi ya etúká ya Zamboanga del Norte, na Philippines ndenge bavideo mpe masolo oyo ezali na site jw.org epesaka mateya. Liboso, Batatoli ya Yehova basalaki vizite na Departema ya makambo etali kelasi na engumba Dipolog. Bakambi ya departema yango bakamwaki ntango bamonaki makambo oyo ezali na site jw.org yango wana babengisaki Batatoli ya Yehova básala elakiseli ya miniti 30 na baseminɛrɛ misato oyo elingaki kosalema mpo na balakisi na bisika mingi ya etúká ya Zamboanga del Norte.
Ndenge nini basalaki elakiseli yango?
Batatoli ya Yehova balakisaki mwa bavideo mpe masolo oyo ezali na site yango epai ya balakisi 300 na seminɛrɛ yango mokomoko. Baoyo bayanganaki na seminɛrɛ yango basepelaki mingimingi na lisolo “Ndenge ya kofuta banyongo.” Mingi ya balakisi yango bamonaki ete elakiseli yango ekosalisa kaka bana-kelasi te kasi mpe bango moko. Bango nyonso bandimaki kozwa traktɛ Epai wapi tokoki kozwa biyano na mituna minene etali bomoi? Oyo elobeli ebele ya makambo oyo ezali na site jw.org. Balakisi mosusu bazwaki bavideo na site yango.
Lokola bilakiseli yango misato elekaki malamu mpenza, Departema yango esɛngaki lisusu básala bilakiseli mosusu mpo na kosalisa bapesi-toli ya makambo etali kelasi mpe balakisi mosusu soki 600. Awa mpe, mingi bamonisaki botɔndi mpo na bilakiseli yango.
“Site yango esalisaka mpenza”
Na nsima bato mosusu oyo bayanganaki na baseminɛrɛ yango balobelaki ndenge bilakiseli yango mpe site yango esalisaki bango. Molakisi moko alobaki boye: “Nalingi komonisa botɔndi mpenza. Namoni ete site yango ezali kosalisa ngai na koteya bana-kelasi na ngai.” Molakisi mosusu alobaki mpe boye: “Nazali na makambo mingi ya koyekola, mingimingi na ndenge ya kosala ntango nazali na mitungisi. Site Internet yango ezali kosalisa mpenza, kaka bilenge te kasi mpe mikóló.”
Balakisi koleka 350 oyo bayanganaki na baseminɛrɛ yango balukaki koyeba makambo mingi mosusu. Batatoli ya Yehova bapesaki bango mikanda mosusu mpe balakisaki batoli ya Biblia epai ya baoyo nyonso basɛngaki.
Batatoli ya Yehova basepeli ndenge balakisi koleka 1000 balandaki bilakiseli etali site jw.org na Zamboanga del Norte mpe bamonaki ndenge site yango ekoki kosalisa bango mpenza bázwa makambo ya koteya. Esaleli yango ya malamu mpenza mpo na koteya ekoki kosalisa balakisi na mokili mobimba bázwa litambwisi na makambo etali bizaleli malamu mpe boyokani na Nzambe. *
^ par. 9 Bibongiseli ya makambo etali kelasi na Philippines ezwá mokumba ya kopesa bana-kelasi boyebi mpe ya “kolendisa bizaleli malamu mpe makambo ya Nzambe [mpe ya] kokolisa bizaleli malamu mpe disiplini epai ya bana-kelasi.”—Mobeko Likonzí (constitution) ya 1987 ya ekólo Philippines, Artikle 14, Eteni 3.2.
Talá mpe...
KOSALISA BATO
JW.ORG—Ebongisi bomoi ya bato
Bato ya ndenge nyonso mpe ya bisika ndenge na ndenge bamonisi ndenge oyo batoli ya Biblia oyo ezali na jw.org esalisi bango bábongisa bomoi na bango.
LIBALA MPE LIBOTA
Ndenge ya kosalisa mwana na yo azwaka bapwɛ ya malamu na kelasi
Talá ndenge ya koyeba likambo mpenza oyo ezali kosala ete azwa bapwɛ ya mabe mpe lendisá ye ayekolaka.
LAMUKÁ!
Mitungisi—Oyo okoki kosala mpo elekela yo motó te
Batoli ya Biblia ekoki kosalisa yo mpo mitungisi oyo eutaka na makambo minei oyo bato mingi bakutanaka na yango elekela yo motó te.