Momekano ya lisano ya velo mpo na mbala ya 103 ya Tour de France oyo esalemaki kobanda mokolo ya 2 tii 24/07/2016 elekaki na kimya mpenza. Na mbula oyo elekaki, bateroriste basalaki mobulu mingi mpe bato koleka 100 bazwaki likama. Na mokolo ya 14/07/2016, na engumba Nice, na fɛti moko ya ekólo, motuka moko ya monene ekɔtelaki ebele ya bato oyo bazalaki kotala ndenge miletwale (feu d’artifice) ezalaki kopanzana. Motuka yango ebomaki bato 86 mpe ebele ya bato bazokaki.

Na ntango wana oyo bato bakómaki kobanga mpe kolela, Batatoli ya Yehova basepelaki komemela bato ya France elikya mpe libɔndisi. Yango wana batyaki bashario ya mikanda na engumba mokomoko oyo basani ya Tour de France bazalaki kotɛlɛma. Batatoli ya Yehova koleka 1400 bamipesaki mpo na kosala na bashario yango mpe bakabolaki mikanda koleka 2000 epai ya bato oyo bazalaki na mposa ya kozwa biyano na mituna minene etali bomoi.

Bato oyo bazalaki kolanda bakumbi velo na engumba mokomoko bakamwaki ntango bamonaki Batatoli ya Yehova na bisika mingi. Mbala mingi, bakonzi ya Leta bapesaki Batatoli ya Yehova longonya ndenge babongisaka makambo malamu mpenza. Bazalaki koloba boye: “Bozali bisika nyonso na etape mokomoko ya lisano oyo!” Bato mingi bazalaki koloba: “Batatoli ya Yehova bazali mpe awa!” Mikolo mingi na nsima, sofɛlɛ moko aboyaki trakte oyo bapesaki ye mpo alobaki ete así azwaki batrakte minei mobimba!

Lokola bakamwaki ndenge Batatoli ya Yehova bazalaki bisika nyonso, bato mosusu bazwaki mikanda mpo na mbala ya liboso. Na ndakisa, moto moko oyo asalaka na shɛni moko ya televizyo alobaki así amoná Batatoli ya Yehova na momekano ya Tour de France ya mbula oyo elekaki. Na mbula oyo azwaki ekateli ya kopusana na shario mpe aponaki buku Sekele ya libota ya esengo mpo elobelaki likambo oyo ezalaki na ntina mpo na ye. Nsima ya kotánga yango mwa ndambo na motuka na ye, ayebisaki baninga na ye ya mosala mpo na bashario yango mpe bango mpe bayaki na bashario koluka mikanda oyo ezalaki kolobela mitó ya makambo ndenge na ndenge.

Baleki-nzela mosusu basololaki na Batatoli ya Yehova mpe bayebisaki bango makambo oyo ezalaki na motema. Elenge mwasi moko ayebisaki bango ete azalaki lisusu na elikya te, yango wana azalaki na mposa ya komikɔtisa na nse ya engbunduka na mokolo yango. Kasi nsima ya koyoka nsango ya Biblia oyo elobeli avenire kitoko na Bokonzi ya Nzambe, abɔndisamaki mpe alobaki ete akomiboma lisusu te. Mwasi mosusu ayebisaki Batatoli ya Yehova boye: “Bókoba na mosala na bino oyo ya malamu!”

Mobali moko oyo azalaki kotambola na ba-béquille mpe azalaki kobangabanga bato, andimaki lisalisi ya mwasi moko oyo ayebi te ntango ayebaki na molato na ye ete mwasi yango azalaki Motatoli ya Yehova. Mobali yango alobaki boye: “Mersi na boboto na bino mpe ndenge bolati kitoko. Mwaye moto akanisela bino mabe ezali te.”