Lingomba ya Batatoli ya Yehova na mokili mobimba (“lingomba”) etosaka ntomo ya moto na moto ya kobomba makambo oyo etali ye moko mpe ya komona ete makambo yango ezali kobatelama malamu. Lingomba eyebi ete esengeli koyokana malamu mpo na kozwa makambo ya moto, ata mpe makambo na ye oyo ebongi te moto nyonso ayeba, mpo na kokokisa bamposa ya Motatoli ya Yehova mokomoko mpe mpo na kokokisa misala na yango ya makambo ya losambo mpe ya kosalisa bato. Eyebi mpe ete esengeli koyebisa makambo yango na moto nyonso te mpe kosala ete makambo yango ebatelama malamu. (Masese 15:22; 25:9) Tozwaka na lisɛki te likambo ya kobatela makambo ya moto.​—Masese 20:19.

Bikólo mingi ezali na mibeko etali kobatela makambo ya moto mpo na kotosa ntomo na ye. Banda kala, liboso kutu mibeko wana ebima, lingomba na biso, ná bafiliale na yango, etosaka ntomo yango mpe ebimisaka makambo ya moto te. Lingomba na biso ekokoba kobatela makambo ya moto oyo ayebisi biso ndenge esalaka banda kala.

Mitinda etali kobatela makambo ya moto. Lingomba na biso etalelaka makambo nyonso ya moto na boyokani na mitinda oyo:

1. Makambo ya moto ekotalelama na bosembo mpe ndenge mibeko esɛngi.

2. Makambo ya moto ekozwama, ekotalelama mpe ekosalelama kaka mpo na kokokisa mikano ya lingomba na biso: losambo mpe kosalisa bato.

3. Makambo ya moto ekozala ya sikisiki mpe ekoyokanisama na bomoi na ye ya mikolo oyo. Soki libunga moko emonani, lingomba na biso ekosembola yango mbala moko ntango kaka eyebi yango.

4. Makambo ya moto ekobombama kaka na boumeli ya ntango oyo mokano to mikano oyo lingomba na biso ezwaki makambo wana ekosɛnga.

5. Tokolandela na ndenge esengeli mpenza likambo ya kotosa ntomo ya bato mpo na makambo na bango oyo tozwi.

6. Tokosalela mayele mpe tokozwa bibongiseli oyo esengeli mpo moto oyo azali na ndingisa te ayeba makambo ya moto te mpe epanzana te na ndenge oyo mibeko epekisi. Makambo nyonso ya moto ebombami na baordinatɛrɛ oyo esɛngi kozala na kode mpo na kofungola yango, oyo kaka bato oyo bapesami ndingisa bazali na yango. Tokangaka babiro na biso soki mosala esili mpe kaka bato oyo bazali na ndingisa nde bakoki kokɔta.

7. Makambo ya moto oyo ezali na filiale moko ekotindama na filiale mosusu te, longola soki lingomba na biso esengeli kosala bongo mpo na kokokisa mikano na yango etali losambo mpe kosalisa bato. Motatoli ya Yehova mokomoko andimá likambo yango ntango azwaki ekateli ya kokóma Motatoli ya Yehova mpe kobengama bongo.

Mitinda oyo ya kobatela makambo ya moto esimbi ndenge ya kosalela makambo ya moto oyo elobelami na buku Tobongisami mpo na kosala mokano ya Yehova, oyo bapesaka Motatoli ya Yehova nyonso ntango akómi mosakoli. Mpo na koyeba makambo mosusu, tángá Tobongisami mpo na kosala mokano ya Yehova.

Lingomba ya Batatoli ya Yehova etosaka lotomo ya moto ete makambo na ye moko, ezala makambo na ye oyo ebongi te moto nyonso ayeba, ebatelama, esembolama to ebomama, ndenge emonisami na motó ya likambo moke “Ntomo na yo” ya “Ndenge na biso ya kosalela makambo ya moto.”

Ndenge oyo lingomba ya Batatoli ya Yehova ebatelaka makambo ya moto, oyo touti kolobela, emonisi mwa moke ndenge oyo lingomba ya Batatoli ya Yehova na mokili mobimba etalelaka makambo ya moto.