NDENGE BAVƐRSƐ YA BIBLIA ELIMBOLAMI
Masese 16:3—“Na nyonso oyo okosala tyelá NKOLO motema”
“Na nyonso oyo okosala tyelá Yehova motema, mpe makambo oyo ozali kokana ekolonga.”—Masese 16:3, Biblia—Libongoli ya Mokili ya Sika.
“Na nyonso oyo okosala tyelá NKOLO motema, mpe makambo oyo ozali kokana ekolonga.”—Masese 16:3, New International Version.
Ndenge Masese 16:3 elimbolami
Masese oyo esalisi basambeli ya Nzambe ya solo báyeba ete makambo nyonso oyo bakosala ekolonga soki batyeli Nzambe motema mpe soki balandi litambwisi na Ye.
“Na nyonso oyo okosala tyelá Yehova motema.” Liboso ya kozwa bikateli, na komikitisa nyonso, basambeli ya Yehova a balukaka litambwisi na ye. (Yakobo 1:5) Mpo na nini? Ya liboso, mbala mingi bato bayebaka te makambo oyo ekokómela bango na bomoi. (Mosakoli 9:11; Yakobo 4:13-15) Longola yango, bakoki kozanga bwanya mpo na kokokisa makambo nyonso oyo balingi. Mpo na bantina yango, bato mingi bamonisaka bwanya ndenge batikaka makambo na bango na mabɔkɔ ya Nzambe. Basalaka bongo ndenge babondelaka Nzambe mpo na kosɛnga Ye atambwisa bango mpe na ndenge basalaka na boyokani na mokano ya Nzambe oyo ekomami na Liloba na Ye Biblia.—Masese 3:5, 6; 2 Timote 3:16, 17.
Maloba “Na nyonso oyo okosala tyelá NKOLO b motema” elimboli “talelá NKOLO na makambo nyonso oyo ozali kosala.” Na kotalela mokanda moko oyo elimbolaka maloba ya Biblia, maloba yango ezali komonisa “mobali moko oyo akitisi mokumba moko ya kilo oyo azalaki komema mpe apesi yango na moto moko oyo aleki ye na makasi mpe oyo azali na likoki ya komema yango.” Baoyo batyelaka Nzambe motema na komikitisa nyonso, bayebaka ete akosalisa mpe akosunga bango.—Nzembo 37:5; 55:22.
Maloba “na nyonso oyo okosala” elakisi te ete Nzambe akondima to akopambola makambo nyonso oyo bato bazali kokana kosala. Mpo Yehova apambola bango, makambo oyo bazali kokana kosala esengeli koyokana na mibeko mpe na mokano na Ye. (Nzembo 127:1; 1 Yoane 5:14) Nzambe apambolaka te moto oyo aboyaka kotosa Ye. Kutu, “abebisaka mikano ya bato mabe” (Nzembo 146:9) Na ngámbo mosusu, asalisaka baoyo bamikitisaka epai na ye na ndenge batosaka mibeko na ye oyo ekomami na Biblia.—Nzembo 37:23.
“Mpe makambo oyo ozali kokana ekolonga.” Mabongoli mosusu ya Biblia elobi ete “makambo oyo ozali kokana ekosimba.” Na Makomami ya Ebre, to oyo bato babengaka Kondimana ya Kala, liloba oyo ebongolami na lingala “ekosimba” epesi likanisi ya kotya moboko, mpe mbala mingi elobelaka biloko oyo Nzambe akelá. (Masese 3:19; Yirimia 10:12) Ndenge moko mpe, Nzambe akopika makasi misala ya bato oyo basalaka makambo ya sembo na miso na ye, akosala ete bázala na bomoi moko ya kimya mpe ya esengo.—Nzembo 20:4; Masese 12:3.
Mpo na nini Masese 16:3 ekomamaki?
Mokonzi Salomo nde akomaki lisese yango, mpe ye nde akomaki biteni mingi ya mokanda ya Masese. Abimisaki masese ebele mpenza mpo na bwanya oyo Nzambe apesaki ye.—1 Bakonzi 4:29, 32; 10:23, 24.
Na mokapo 16, Salomo abandi naino na kokumisa bwanya ya Nzambe mpe amonisi ndenge oyo Nzambe ayinaka mpenza bato ya lolendo. (Masese 16:1-5) Mokapo yango ezali kosalisa motángi akanga ntina ya makambo oyo mokanda ya Masese elobeli: Bato bakoki kokóma na bwanya mpe kolonga kaka soki bazali na komikitisa, mpe soki bazali kotika ete Nzambe atambwisa bango. (Masese 16:3, 6-8, 18-23) Mateya yango ya solo ezongelami mbala mingi na Biblia.—Nzembo 1:1-3; Yisaya 26:3; Yirimia 17:7, 8; 1 Yoane 3:22.
Talá mwa video oyo ya mokuse mpo na koyeba makambo oyo mokanda ya Masese elobeli.
a Yehova ezali nkombo ya Nzambe. (Nzembo 83:18) Talá lisolo “Yehova azali nani?”
b Maloba ya ebandeli na Biblia New International Version Study Bible elobi ete Biblia yango esaleli titre “NKOLO” (na “NKOLO” oyo ekomami na makomi ya minene) na esika ya nkombo ya Nzambe. Mpo na koyeba ntina oyo likanisi ya bongo ekoki kobulunganisa batángi ya Biblia, talá lisolo oyo ezali na molɔngɔ ya masolo “Yisaya 42:8—‘Ngai nazali NKOLO.’”
Talá mpe...
NDENGE BAVƐRSƐ YA BIBLIA ELIMBOLAMI
Masese 3:5, 6 elimbolami—“Kondimela mayele na yo moko te”
Ndenge nini okoki komonisa ete otyelaka Nzambe motema koleka?
LINƆ́NGI YA MOSƐNZƐLI
Mateya ya Biblia ezali na bwanya oyo esilaka ngala te
Lokola mayele ya siansi ya lelo oyo ekoli mingi, na esika ete Biblia emonana ete esilá ngala, mateya na yango ezali na batoli oyo ebongi mpe esilaka ngala te.
BIYANO NA MITUNA YA BIBLIA
Nzambe alingi nasala nini na bomoi na ngai?
Esengeli Nzambe apesa yo vision, omona emonaneli to olɔta ndɔtɔ mpo oyeba mokano ya Nzambe? Talá eyano ya Biblia.
NDENGE BAVƐRSƐ YA BIBLIA ELIMBOLAMI
Ndenge Yirimia 29:11 elimbolami—“Nayebi malamu makanisi oyo nazali kokanisa mpo na bino”
Nzambe azali na makambo ya sikisiki oyo abongisá mpo na moto na moto?
MATEYA YA BIBLIA
Bisaleli mpo na koyekola Biblia
Poná masolo to biloko mosusu oyo ekosalisa yo oyekola Biblia na ndenge oyo ekosepelisa yo mpe ekosimba motema na yo.
MATEYA YA BIBLIA
Meká boyekoli na biso ya Biblia
Bandá boyekoli ya Biblia ofele mpe talá makambo oyo esengeli kosala.
