Biblia elobi nini mpo na nyama babengi dinosaure?
Eyano ya Biblia
Ezali ata na vɛrsɛ moko te ya Biblia oyo elobeli nyama yango polele. Kasi, Biblia elobi ete Nzambe nde ‘azalisaki biloko nyonso,’ boye ezali polele ete ba-dinosaure ezali moko ya biloko oyo akelá. a (Emoniseli 4:11) Atako Biblia elobeli nyama yango polele te, kasi elobeli etuluku ya bikelamu oyo ekoki kozala ete nyama yango mpe ezali na kati ya etuluku yango:
“Nzambe abandaki kozalisa banyama ya nsɔmɔ ya mineneminene ya mbu.”—Ebandeli 1:21.
“Nyama mikemike nyonso ya nse.”—Ebandeli 1:25.
“Nyama ya zamba oyo ezali na mabele.”—Ebandeli 1:25.
Banyama mosusu nde ebimisaki ba-dinosaure?
Na esika banyama yango ebima mokemoke ndenge evolisyo esɛngaka, ba-dinosaure ebimaki na mbalakaka ndenge mikuwa ya banyama ya kala emonisi yango. Yango eyokani na maloba ya Biblia oyo elobi ete Nzambe akelaki banyama nyonso. Na ndakisa, Nzembo 146:6 elobeli Nzambe lokola “Mokeli ya likoló ná mabele, ya mbu, mpe ya nyonso oyo ezali na kati na yango.”
Ba-dinosaure ezalaki na bomoi na eleko nini?
Biblia emonisi ete banyama ya mbu mpe ya mokili ekelamaki na mokolo ya mitano mpe ya motoba ya eleko ya bozalisi. b (Ebandeli 1:20-25, 31) Boye, na kotalela Biblia, ba-dinosaure babimaki mpe bazalaki na bomoi na boumeli ya eleko moko molai.
Behemote mpe Leviatana ezalaki ba-dinosaure?
Te. Atako banyama yango oyo mokanda ya Yobo elobeli eyebani mpenza te soki ezali nyama nini, balobaka ete Behemote ezali nde ngubu mpe Leviatana ezali nde ngando. Yango eyokani na makambo Biblia elobi mpo na ndenge oyo nyama yango ezalaka. (Yobo 40:15-23; 41:1, 14-17, 31) Ezala ndenge nini, nkombo “Behemote” mpe “Leviatana” ekoki kozala ba-dinosaure te. Nzambe ayebisaki Yobo atala banyama yango mpe Yobo azalaki na bomoi na eleko oyo ba-dinosaure basilaki kolimwa.—Yobo 40:16; 41:8.
Nini ekómelaki ba-dinosaure?
Biblia elobeli likambo moko te oyo etali kolimwa ya ba-dinosaure. Kasi elobi ete biloko nyonso ekelamaki “mpo na mokano ya [Nzambe],” boye emonani polele ete Nzambe akelaki ba-dinosaure mpamba te. (Emoniseli 4:11) Ntango mokano yango ekokisamaki, Nzambe apesaki nzela ete ba-dinosaure elimwa.
a Mikuwa ya banyama ya kala emonisi ete ba-dinosaure ezalaká. Kutu, mikuwa yango emonisi ete na eleko moko boye, nyama yango ezalaká ebele mpe ya mitindo ndenge na ndenge; ezala ya minene to ya mike.
b Na Biblia, liloba “mokolo” ekoki komonisa eleko moko oyo ezali koumela bankoto ya bambula.—Ebandeli 1:31; 2:1-4; Baebre 4:4, 11.
Talá mpe...
BIYANO NA MITUNA YA BIBLIA
Biblia eyokani na siansi?
Na bisika mosusu, Biblia elobi lokuta na makambo ya siansi?
MATEYA YA NTINA MINGI YA BIBLIA
Molɔ́ngɔ́ ekelamaki?
Bato mingi bandimaka te lisolo oyo Biblia elobi mpo na bozalisi to bamonaka yango lokola lisapo mpamba. Makambo oyo Biblia elobi ekoki kotyelama motema?
MATEYA MPENZA YA BIBLIA
Mpo na nini Nzambe akelaki mabele?
Mabele etondi na biloko kitoko mpenza. Akabolá yango na moi na ntaka oyo ebongi mpenza, atyá na ndenge etɛngamá malamu mpe atyá yango ebalukaka na vitɛsi oyo ebongi. Mpo na nini Nzambe asalaki milende mingi ndenge wana mpo na kokela mabele kitoko oyo?
LAMUKÁ!
Lisolo ya bozalisi oyo bato mingi bayebaka te
Lisolo ya Biblia oyo elobeli bozalisi eyokani mpenza na makambo oyo bato ya siansi bamoni?
OLINGI KOYEBA BISO?
Sɛngá moto moko aya kotala yo
Kolobela motuna moko ya Biblia, to koyekola makambo mingi na ntina etali Batatoli ya Yehova.