Biblia elobi nini na likambo ya kobala moto ya mposo mosusu?
Eyano ya Biblia
Nzambe andimaka ete mobali ná mwasi oyo bakeseni mposo bábalana mpo na miso na ye, bato ya mposo nyonso bazali ndenge moko. Biblia elobi: “Nzambe aponaka bilongi te.”—Misala 10:34, 35.
Talá bavɛrsɛ mosusu ya Biblia oyo emonisi ete bato, ata ya mposo nini, bazali ndenge moko mpe ete bakoki kobalana.
Bato nyonso bautá na moto moko
Bato nyonso bazali bankɔkɔ ya mobali ya liboso Adama, ná mwasi na ye Eva, oyo Biblia ebengi “mama ya moto nyonso oyo azali na bomoi.” (Ebandeli 3:20) Yango wana Biblia elobi mpo na Nzambe ete: “Na moto moko asalaki bikólo nyonso ya bato.” (Misala 17:26) Ata soki mposo ya bato ekeseni, bazali kaka libota moko. Kasi, mwasi ná mobali bakoki kosala nini soki na esika bafandi bato bakaniselaka mposo mosusu mabe to baponaponaka bikólo?
Bato ya bwanya to ya mayele “bapesanaka makanisi”
Kobalana na moto ya mposo mosusu ezali ata mabe moke te na miso ya Nzambe; kasi bato mosusu bakanisaka bongo te. (Yisaya 55:8, 9) Soki ozali kokanisa kobala moto ya mposo mosusu, yo ná moto oyo akokóma molongani na yo bosengeli kolobela makambo oyo elandi:
Bokosala nini soki bato ya esika bofandi to bandeko na bino bazali kolobela bino mabe?
Ndenge nini bokosalisa bana na bino báyeba kokanga motema soki basusu bakaniseli bango mabe?
‘Kopesana makanisi’ ndenge wana ekoki kosalisa mpo libala na bino ezala malamu.—Masese 13:10; 21:5.
Talá mpe...
LAMUKÁ!
Kokanisela baninga mabe—Luká kokóma na baninga ebele
Talá bolamu oyo okozwa soki ozali na baninga oyo bazali na loposo mpe mimeseno ekeseni na oyo ya yo.
LAMUKÁ!
Biblia elobi nini na likambo etali koyina bato ya mposo mosusu?
Mposo nyonso ya bato ezali ndenge moko? Ezaleli ya koyina bato ya mposo mosusu ekosila mokolo mosusu?
OLINGI KOYEBA BISO?
Sɛngá moto moko aya kotala yo
Kolobela motuna moko ya Biblia, to koyekola makambo mingi na ntina etali Batatoli ya Yehova.