ມີຜູ້ອອກແບບບໍ?
ນ້ຳເມືອກຂອງແຮັກຟິຊ
ເປັນເວລາຫຼາຍປີທີ່ນັກວິທະຍາສາດສົນໃຈນ້ຳເມືອກທີ່ມີລັກສະນະຄ້າຍຄືວຸ້ນຫຼືໄຮໂດຣເຈນຂອງແຮັກຟິຊ ເປັນຫຍັງຈຶ່ງໜ້າສົນໃຈ? ຍ້ອນນ້ຳເມືອກຂອງແຮັກຟິຊ ຂຶ້ນຊື່ວ່າເປັນໜຶ່ງໃນ “ວັດສະດຸຊີວະພາບທີ່ຍືດຍຸ່ນຫຼາຍທີ່ສຸດ.”
ລອງຄິດເບິ່ງ: ແຮັກຟິຊເປັນສິ່ງມີຊີວິດຮູບຮ່າງຄ້າຍຄືອ່ຽນທີ່ອາໄສຢູ່ໃຕ້ທະເລເລິກ. ເມື່ອມັນຖືກໂຈມຕີຈາກປານັກລ້າ ມັນຈະປ່ອຍນ້ຳເມືອກຈາກຕ່ອມພິເສດ. ເມືອກປະກອບດ້ວຍໂປຣຕີນທີ່ມີລັກສະນະຄ້າຍຄືວຸ້ນແລະເສັ້ນສາຍໂປຣຕີນອີກເປັນຫຼາຍພັນເສັ້ນ. ໂປຣຕີນເຫຼົ່ານີ້ລວມໂຕກັນແລະປ່ຽນນ້ຳທີ່ຢູ່ຮອບໂຕມັນໃຫ້ກາຍເປັນນ້ຳເມືອກທີ່ມີລັກສະນະຂຸ້ນໜຽວ. ນ້ຳເມືອກນີ້ຈະເຂົ້າໄປອຸດຕັນໃນເຫືອກຂອງປານັກລ່າ ເຮັດໃຫ້ປາໂຕນັ້ນຮີບປ່ອຍມັນແລະໜີໄປທັນທີ.
ນ້ຳເມືອກຂອງແຮັກຟິຊມີລັກສະນະພິເສດຫຼາຍ. ເສັ້ນສາຍໂປຣຕີນແຕ່ລະເສັ້ນມີຄວາມໜາເທົ່າກັບເສັ້ນຜົມຂອງມະນຸດໜຶ່ງຮ້ອຍເສັ້ນ ແລະແຂງແຮງຫຼາຍກວ່າໄນລອນສິບເທົ່າ. ເມື່ອນ້ຳເມືອກແລະເສັ້ນສາຍຖືກປ່ອຍອອກໃນນ້ຳທະເລ ທັງສອງຢ່າງຈະລວມໂຕກັນເປັນໂຄງສ້າງຮູບຮ່າງຄ້າຍຄືກັບກະແຕະສາມມິຕິ. ໂຄງສ້າງນີ້ສາມາດກັກເກັບນ້ຳໄດ້ເຖິງ 26.000 ເທົ່າຂອງນ້ຳໜັກໂຕຂອງມັນ. ແທ້ໆແລ້ວສ່ວນປະກອບຂອງເມືອກນີ້ເປັນນ້ຳເກືອບ 100 ເປີເຊັນ!
ນັກວິທະຍາສາດບໍ່ສາມາດຮຽນແບບນ້ຳເມືອກຂອງແຮັກຟິຊໄດ້. ນັກຄົ້ນຄວ້າຄົນໜຶ່ງບອກວ່າ. “ລະບົບທຳມະຊາດນີ້ມັນຊັບຊ້ອນຫຼາຍເກີນໄປ” ແຕ່ນັກວິທະຍາສາດພະຍາຍາມທີ່ຈະຜະລິດເສັ້ນສາຍໂປຣຕີນທີ່ຕັດຕໍ່ທາງພັນທຸກຳໂດຍໃຊ້ແບັກທີເຣຍ. ເປົ້າໝາຍຂອງເຂົາເຈົ້າຄື ເພື່ອພັດທະນາຜະລິດຕະພັນທີ່ມີນ້ຳໜັກເບົາ ຈີກຂາດໄດ້ຍາກ ຍືດຍຸ່ນ ແລະຍ່ອຍສະຫຼາຍໄດ້. ເສັ້ນສາຍໂປຣຕີນສັງເຄາະນີ້ສາມາດໃຊ້ໃນການພັດທະນາວັດສະດຸທີ່ທົນທານສຳລັບອຸດສາຫະກຳສິ່ງທໍແລະການແພດ. ມັນສາມາດເອົາໄປໃຊ້ໃນຫຼາຍຮູບແບບໄດ້ຢ່າງບໍ່ມີສິ້ນສຸດແທ້ໆ.
ເຈົ້າຄິດແນວໃດ? ໂຄງສ້າງທີ່ສະລັບຊັບຊ້ອນທີ່ຢູ່ໃນນ້ຳເມືອກຂອງແຮັກຟິຊເກີດຈາກວິວັດທະນາການບໍ? ຫຼືມີຜູ້ອອກແບບ?
ເລື່ອງທີ່ເຈົ້າອາດຈະມັກ
ປຶ້ມແລະຈຸນລະສານ
ມີຜູ້ສ້າງສິ່ງທີ່ມີຊີວິດບໍ?
ສິ່ງທີ່ເຈົ້າເຊື່ອກ່ຽວກັບການເລີ່ມຕົ້ນຊີວິດເປັນເລື່ອງທີ່ສຳຄັນ