ພະຍານພະເຢໂຫວາເຮັດໃຫ້ຄອບຄົວແຕກແຍກຫຼືເຮັດໃຫ້ໝັ້ນຄົງຫຼາຍຂຶ້ນ?
ພະຍານພະເຢໂຫວາພະຍາຍາມເຮັດໃຫ້ຄອບຄົວໝັ້ນຄົງແລະຮັກກັນຫຼາຍຂຶ້ນ ແລະເຮົາຊ່ວຍຄອບຄົວຂອງເພື່ອນບ້ານໃຫ້ເຮັດແບບນັ້ນນຳ. ເຮົານັບຖືພະເຈົ້າທີ່ເປັນຜູ້ສ້າງສະຖາບັນຄອບຄົວ. (ຕົ້ນເດີມ 2:21-24; ເອເຟໂຊ 3:14, 15) ໃນຄຳພີໄບເບິນ ພະເຈົ້າສອນຫຼັກການທີ່ຊ່ວຍໃຫ້ຜູ້ຄົນທົ່ວໂລກມີຊີວິດຄູ່ທີ່ມີຄວາມສຸກແລະໝັ້ນຄົງ.
ພະຍານພະເຢໂຫວາຊ່ວຍສົ່ງເສີມຄອບຄົວໃຫ້ເຂັ້ມແຂງຂຶ້ນແນວໃດ?
ເຮົາພະຍາຍາມເຮັດຕາມຄຳແນະນຳຈາກຄຳພີໄບເບິນຢ່າງເຕັມທີ ນີ້ຊ່ວຍໃຫ້ເຮົາເປັນຜົວ ເມຍ ແລະລູກທີ່ດີຂຶ້ນ. (ສຸພາສິດ 31:10-31; ເອເຟໂຊ 5:22-6:4; 1 ຕີໂມທຽວ 5:8) ຄຳແນະນຳທີ່ສະຫຼາດໃນຄຳພີໄບເບິນຊ່ວຍຄອບຄົວທີ່ມີຄວາມເຊື່ອທາງສາສະໜາຕ່າງກັນໃຫ້ມີຄວາມສຸກໄດ້ນຳ. (1 ເປໂຕ 3:1, 2) ລອງອ່ານຄວາມຮູ້ສຶກຂອງຄົນເຫຼົ່ານີ້ທີ່ບໍ່ໄດ້ເປັນພະຍານແຕ່ມີຄູ່ແຕ່ງດອງທີ່ປ່ຽນມາເປັນພະຍານພະເຢໂຫວາ.
“ຫົກປີທຳອິດທີ່ເຮົາແຕ່ງດອງກັນມີແຕ່ເລື່ອງຕຶງຄຽດແລະເຮົາກໍຜິດກັນຕະຫຼອດ. ຫຼັງຈາກອິເວຕິເປັນພະຍານພະເຢໂຫວາ ລາວໜ້າຮັກແລະອົດທົນຫຼາຍຂຶ້ນ. ການປ່ຽນແປງຂອງລາວຊ່ວຍຮັກສາຊີວິດຄູ່ຂອງພວກເຮົາໄວ້.”—ຄຼາວເອີ ຈາກປະເທດເບຣຊິນ
“ຕອນທີ່ຊັນຊາ ຜົວຂອງຂ້ອຍເລີ່ມຮຽນຄຳພີໄບເບິນກັບພະຍານພະເຢໂຫວາ ຂ້ອຍບໍ່ເຫັນດີນຳແທ້ໆ ຍ້ອນຄິດວ່າມັນຈະເຮັດໃຫ້ຄອບຄົວເຮົາແຕກແຍກ. ແຕ່ຫຼັງຈາກນັ້ນຂ້ອຍກໍໄດ້ເຫັນວ່າ ແທ້ໆແລ້ວຄຳພີໄບເບິນເປັນປະໂຫຍດຕໍ່ຊີວິດຄູ່ຂອງເຮົາ.”—ແອກເນດສ໌ ຈາກປະເທດຊຳບີ
ເມື່ອເຮັດວຽກປະກາດ ເຮົາສະແດງໃຫ້ເພື່ອນບ້ານເຫັນວ່າການໃຊ້ຄຳແນະນຳທີ່ສະຫຼາດສຸຂຸມໃນຄຳພີໄບເບິນສາມາດຊ່ວຍເຂົາເຈົ້າໃຫ້
ການປ່ຽນສາສະໜາເຮັດໃຫ້ຄອບຄົວແຕກແຍກບໍ?
ທີ່ຈິງ ບາງເທື່ອການປ່ຽນສາສະໜາກໍເຮັດໃຫ້ຄອບຄົວແຕກແຍກ. ຕົວຢ່າງເຊັ່ນ ລາຍງານປີ 1998 ຂອງບໍລິສັດຄົ້ນຄວ້າແຫ່ງໜຶ່ງ (Sofres) ພົບວ່າ 1 ໃນ 20 ຂອງຄູ່ແຕ່ງດອງເຈິບັນຫາຢ່າງໜັກຕອນທີ່ຝ່າຍໃດຝ່າຍໜຶ່ງປ່ຽນມາເປັນພະຍານ.
ພະເຢຊູບອກໄວ້ລ່ວງໜ້າວ່າ ບາງເທື່ອຄົນທີ່ເຮັດຕາມຄຳສອນຂອງເພິ່ນກໍຕ້ອງທົນທຸກກັບບັນຫາໃນຄອບຄົວ. (ມັດທາຍ 10:32-36) ນັກປະຫວັດສາດຊື່ວິວ ດູແຣນຕັ້ງຂໍ້ສັງເກດວ່າ ພາຍໃຕ້ການປົກຄອງຂອງຈັກກະພັດໂຣມ “ສາສະໜາຄລິດຖືກຕັ້ງຂໍ້ກ່າວຫາວ່າເຮັດໃຫ້ຄອບຄົວແຕກແຍກ” a ແລະພະຍານພະເຢໂຫວາບາງຄົນໃນທຸກມື້ນີ້ກໍເຈິຂໍ້ກ່າວຫາແບບດຽວກັນ. ແຕ່ນີ້ໝາຍຄວາມວ່າພະຍານພະເຢໂຫວາເປັນຄົນສ້າງຄວາມແຕກແຍກໃນຄອບຄົວບໍ?
ສານສິດທິມະນຸດແຫ່ງເອີຣົບ
ເມື່ອຕັດສິນຄະດີທີ່ມີການກ່າວຫາພະຍານພະເຢໂຫວາວ່າເປັນຄົນທີ່ເຮັດໃຫ້ຄອບຄົວແຕກແຍກ ສານສິດທິມະນຸດແຫ່ງເອີຣົບບອກວ່າສະມາຊິກຄອບຄົວທີ່ບໍ່ແມ່ນພະຍານພະເຢໂຫວາມັກຈະກໍ່ໃຫ້ເກີດຄວາມຂັດແຍ່ງເລື້ອຍໆໂດຍປະຕິເສດທີ່ຈະ “ຍອມຮັບແລະນັບຖືເສລີພາບຂອງຍາດພີ່ນ້ອງໂຕເອງທີ່ຈະບອກຄົນອື່ນວ່າລາວນັບຖືສາສະໜາຫຍັງແລະເຮັດຕາມສິ່ງທີ່ສາສະໜານັ້ນສອນ.” ສານບອກຕໍ່ໄປວ່າ “ສະຖານະການແບບນີ້ຖືເປັນເລື່ອງທຳມະດາໃນຄອບຄົວທີ່ຄູ່ແຕ່ງດອງມີຄວາມເຊື່ອຕ່າງກັນ ພະຍານພະເຢໂຫວາກໍເຈິບັນຫາຄືກັນກັບຄົນອື່ນ.” b ແມ່ນແຕ່ເມື່ອບາງຄົນບໍ່ຍອມຮັບເຂົາເຈົ້າຍ້ອນສາສະໜາ ພະຍານພະເຢໂຫວາກໍຍັງພະຍາຍາມເຮັດຕາມຄຳແນະນຳໃນຄຳພີໄບເບິນທີ່ວ່າ: “ຢ່າເຮັດຊົ່ວຕອບແທນຄວາມຊົ່ວຕໍ່ຜູ້ໃດ . . . ໃຫ້ພວກເຈົ້າພະຍາຍາມເຕັມທີທີ່ຈະຢູ່ຢ່າງສະຫງົບສຸກກັບທຸກຄົນ.”—ໂຣມ 12:17, 18
ເປັນຫຍັງພະຍານພະເຢໂຫວາເຊື່ອວ່າເຂົາເຈົ້າຄວນແຕ່ງດອງກັບຄົນທີ່ນັບຖືສາສະໜາດຽວກັນເທົ່ານັ້ນ?
ພະຍານພະເຢໂຫວາເອົາໃຈໃສ່ຄຳສັ່ງໃນຄຳພີໄບເບິນທີ່ໃຫ້ແຕ່ງດອງກັບຜູ້ທີ່ “ເຊື່ອໃນຜູ້ເປັນນາຍ” ເຊິ່ງໝາຍເຖິງໃຫ້ແຕ່ງດອງກັບຄົນທີ່ມີຄວາມເຊື່ອຄືກັນ. (1 ໂກຣິນໂທ 7:39) ຄຳສັ່ງນີ້ເປັນໄປຕາມຫຼັກການຂອງຄຳພີໄບເບິນແລະໃຊ້ໄດ້ແທ້ນຳ. ຕົວຢ່າງເຊັ່ນ ບົດຄວາມໃນປີ 2010 ຂອງວາລະສານເພື່ອຊີວິດແຕ່ງດອງແລະຄອບຄົວ (ພາສາອັງກິດ) ບອກວ່າ “ຄູ່ແຕ່ງດອງທີ່ນັບຖືສາສະໜາດຽວກັນ ມີຄວາມເຊື່ອ ແລະເຮັດຕາມຄຳສອນຂອງສາສະໜາດຽວກັນ” ມັກຈະມີສາຍສຳພັນທີ່ດີຕໍ່ກັນຫຼາຍກວ່າ. c
ແຕ່ພະຍານບໍ່ສະໜັບສະໜູນໝູ່ຮ່ວມຄວາມເຊື່ອຂອງເຂົາເຈົ້າໃຫ້ປະກັບຄູ່ແຕ່ງດອງທີ່ບໍ່ໄດ້ເປັນພະຍານ. ຄຳພີໄບເບິນບອກວ່າ: “ຂ້ອຍຂໍບອກວ່າ ຖ້າພີ່ນ້ອງຄົນໃດມີເມຍທີ່ບໍ່ມີຄວາມເຊື່ອແລະເມຍພໍໃຈຈະຢູ່ກັບຜົວ ກໍຢ່າໃຫ້ຜົວຖິ້ມເມຍ ແລະຖ້າຜູ້ຍິງຄົນໃດມີຜົວທີ່ບໍ່ມີຄວາມເຊື່ອແລະຜົວພໍໃຈຈະຢູ່ກັບເມຍ ກໍຢ່າໃຫ້ເມຍຖິ້ມຜົວ.” (1 ໂກຣິນໂທ 7:12, 13) ພະຍານພະເຢໂຫວາເຮັດຕາມຄຳສັ່ງຂໍ້ນີ້.
a ເບິ່ງປຶ້ມເຊຊາແລະພະຄລິດ (ພາສາອັງກິດ) ໜ້າ 647.
b ເບິ່ງເອກະສານຄະດີຄວາມທີ່ຊື່ເຢໂຫວາສ໌ວິດເນດສິດສ໌ອອບຟ໌ມອດສ໌ກາວແອນອາເດີສ໌ເວີຊັດສ໌ຣັດເຊຍ (Jehovah’s Witnesses of Moscow and Others v. Russia) ໜ້າ 26-27 ຫຍໍ້ໜ້າ 111.
c ເບິ່ງວາລະສານເພື່ອຊີວິດແຕ່ງດອງແລະຄອບຄົວ (ພາສາອັງກິດ) ປີທີ 72 ເຫຼັ້ມ 4 (ສິງຫາ 2010) ໜ້າ 963.
ເລື່ອງທີ່ເຈົ້າອາດຈະມັກ
ກ່ຽວກັບເຮົາ
ຂໍໃຫ້ມີຄົນມາສອນ
ເບິ່ງວ່າຄຳພີໄບເບິນສອນຫຍັງ ຫຼືມາຮູ້ຈັກພະຍານພະເຢໂຫວາຫຼາຍຂຶ້ນ.