ກິດຈະການ 23:1-35
23 ໂປໂລແນມເບິ່ງສະມາຊິກສານຊັນເຮດຣິນແລ້ວເວົ້າວ່າ: “ພີ່ນ້ອງທັງຫຼາຍ ຂ້ອຍເວົ້າຕໍ່ໜ້າພະເຈົ້າໄດ້ເລີຍວ່າໃຈຮູ້ຜິດຮູ້ຖືກບອກຂ້ອຍວ່າ ຜ່ານມາຂ້ອຍບໍ່ໄດ້ເຮັດຫຍັງຜິດ.”
2 ເມື່ອມະຫາປະໂລຫິດອານາເນຍໄດ້ຍິນແບບນັ້ນ ລາວກໍສັ່ງຄົນທີ່ຢືນຢູ່ໃກ້ໆໂປໂລໃຫ້ຕົບປາກໂປໂລ.
3 ໂປໂລເວົ້າວ່າ: “ເຈົ້າຄົນໜ້າຊື່ໃຈຄົດ.* ຂໍໃຫ້ພະເຈົ້າຕົບເຈົ້າ ເຈົ້ານັ່ງພິພາກສາຂ້ອຍຕາມກົດໝາຍແຕ່ເຈົ້າເອງພັດເຮັດຜິດກົດໝາຍໂດຍສັ່ງຄົນໃຫ້ຕົບຂ້ອຍແບບນີ້ບໍ?”
4 ຄົນທີ່ຢືນຢູ່ໃກ້ໆເວົ້າວ່າ: “ເວົ້າຫຍາບຄາຍກັບມະຫາປະໂລຫິດຂອງພະເຈົ້າແບບນີ້ຫວາ?”
5 ໂປໂລເວົ້າວ່າ: “ຂໍໂທດພີ່ນ້ອງ ຂ້ອຍບໍ່ຮູ້ວ່າລາວເປັນມະຫາປະໂລຫິດ. ເພາະມີຄຳຂຽນໄວ້ໃນພະຄຳພີວ່າ: ‘ຢ່າເວົ້າໝິ່ນປະໝາດຄົນທີ່ເຮັດໜ້າທີ່ປົກຄອງພວກເຈົ້າ.’”
6 ໂປໂລຮູ້ວ່າສານຊັນເຮດຣິນກຸ່ມໜຶ່ງເປັນພວກຊາດູກາຍ ແລະອີກກຸ່ມໜຶ່ງເປັນພວກຟາຣິຊາຍ ໂປໂລຈຶ່ງຮ້ອງຂຶ້ນວ່າ: “ພີ່ນ້ອງທັງຫຼາຍ ຂ້ອຍເປັນຟາຣິຊາຍແລະເປັນລູກຂອງຟາຣິຊາຍ. ຂ້ອຍຖືກຕັດສິນຄະດີກໍຍ້ອນຂ້ອຍເຊື່ອເລື່ອງການຄືນມາຈາກຕາຍ.”
7 ເມື່ອໂປໂລເວົ້າແບບນີ້ ພວກຟາຣິຊາຍກັບພວກຊາດູກາຍກໍເລີ່ມຖຽງກັນແລະບ່ອນປະຊຸມກໍແຍກເປັນ 2 ຝ່າຍ.
8 ພວກຊາດູກາຍບອກວ່າບໍ່ມີການຄືນມາຈາກຕາຍ ແລະບໍ່ມີທູດສະຫວັນຫຼືຮ່າງກາຍສຳລັບສະຫວັນ ແຕ່ພວກຟາຣິຊາຍເຊື່ອວ່າທັງໝົດນັ້ນມີຈິງ.
9 ແລ້ວບ່ອນປະຊຸມກໍມີສຽງວຸ່ນວາຍ ມີຄູສອນສາສະໜາບາງຄົນທີ່ເປັນຟາຣິຊາຍລຸກຂຶ້ນຖຽງຢ່າງດຸເດືອດ ແລະບອກວ່າ: “ພວກເຮົາບໍ່ເຫັນວ່າຜູ້ນີ້ມີຄວາມຜິດຫຍັງ ຜູ້ທີ່ເຮົາເບິ່ງບໍ່ເຫັນຫຼືທູດສະຫວັນອາດຈະມາເວົ້າກັບລາວແທ້ໆກໍໄດ້.”
10 ເມື່ອຄວາມຂັດແຍ່ງຮຸນແຮງຂຶ້ນ ຜູ້ບັງຄັບກອງພັນຢ້ານວ່າໂປໂລຈະຖືກພວກເຂົາຈີກເປັນຕ່ອນໆ ລາວຈຶ່ງສັ່ງທະຫານໃຫ້ຟ້າວໄປເອົາໂປໂລອອກມາຈາກພວກນັ້ນ ແລ້ວພາໄປໄວ້ໃນຄ້າຍທະຫານ.
11 ໃນຄືນນັ້ນ ຜູ້ເປັນນາຍມາຢືນຢູ່ທາງຂ້າງໂປໂລແລະບອກວ່າ: “ໃຫ້ກ້າຫານ! ເຈົ້າໄດ້ປະກາດກ່ຽວກັບຂ້ອຍຢ່າງທົ່ວເຖິງໃນເມືອງເຢຣູຊາເລັມແລ້ວ ເຈົ້າຕ້ອງປະກາດແບບນັ້ນໃນເມືອງໂຣມຄືກັນ.”
12 ເມື່ອຮອດຕອນເຊົ້າ ພວກຢິວໄດ້ຮ່ວມຫົວກັນວາງແຜນແລະສາບານຕົວ*ວ່າຈະບໍ່ກິນບໍ່ດື່ມຫຍັງຈົນກວ່າຈະໄດ້ຂ້າໂປໂລ.
13 ຄົນທີ່ຮ່ວມຫົວກັນວາງແຜນແລະສາບານຕົວນັ້ນມີຫຼາຍກວ່າ 40 ຄົນ.
14 ພວກເຂົາໄປບອກພວກປະໂລຫິດໃຫຍ່ກັບພວກຜູ້ນຳວ່າ: “ພວກເຮົາພາກັນສາບານໄວ້ແລ້ວວ່າຈະບໍ່ກິນຫຍັງຈັກຄຳຈົນກວ່າຈະຂ້າໂປໂລໄດ້ກ່ອນ.
15 ຂໍໃຫ້ພວກທ່ານກັບສະມາຊິກສານຊັນເຮດຣິນຂໍຜູ້ບັງຄັບກອງພັນໃຫ້ສົ່ງໂປໂລມາໃຫ້ພວກທ່ານ ເຮັດຄືກັບວ່າຢາກຈະຊັກຖາມເລື່ອງຂອງລາວໃຫ້ຊັດເຈນຂຶ້ນ ແລ້ວພວກເຮົາຈະລັດຂ້າລາວກ່ອນທີ່ລາວໃກ້ຈະຮອດ.”
16 ແຕ່ຫຼານຊາຍຂອງໂປໂລໄດ້ຍິນເລື່ອງທີ່ພວກເຂົາວາງແຜນຮ້າຍນັ້ນ ລາວຈຶ່ງເຂົ້າໄປບອກໂປໂລໃນຄ້າຍທະຫານ.
17 ໂປໂລເອີ້ນນາຍຮ້ອຍຄົນໜຶ່ງເຂົ້າມາແລະບອກວ່າ: “ຂໍໃຫ້ພາຊາຍໜຸ່ມຄົນນີ້ໄປຫາຜູ້ບັງຄັບກອງພັນ ເພາະລາວມີເລື່ອງຈະບອກ.”
18 ນາຍຮ້ອຍຄົນນັ້ນກໍພາຊາຍໜຸ່ມໄປຫາຜູ້ບັງຄັບກອງພັນແລະບອກວ່າ: “ໂປໂລທີ່ຖືກຂັງຄຸກຢູ່ນັ້ນເອີ້ນຂ້ອຍໄປຫາແລະຂໍໃຫ້ພາຊາຍໜຸ່ມຄົນນີ້ມາຫາທ່ານ ຍ້ອນລາວມີບາງຢ່າງຈະບອກໃຫ້ທ່ານຮູ້.”
19 ຜູ້ບັງຄັບກອງພັນກໍຈູງມືຊາຍໜຸ່ມຄົນນັ້ນໄປຖາມເປັນສ່ວນຕົວວ່າ: “ເຈົ້າມີຫຍັງຈະບອກຂ້ອຍບໍ?”
20 ຊາຍໜຸ່ມບອກວ່າ: “ພວກຢິວຕົກລົງກັນວ່າຈະຂໍໃຫ້ທ່ານສົ່ງຕົວໂປໂລໄປທີ່ສານຊັນເຮດຣິນມື້ອື່ນ ໂດຍເຮັດຄືກັບວ່າຢາກຮູ້ເລື່ອງຂອງລາວຫຼາຍຂຶ້ນ.
21 ແຕ່ທ່ານຢ່າຫຼົງເຊື່ອ ເພາະພວກເຂົາຫຼາຍກວ່າ 40 ຄົນຈະຖ້າລັດທຳຮ້າຍໂປໂລ ພວກເຂົາໄດ້ພາກັນສາບານໄວ້ວ່າຈະບໍ່ກິນບໍ່ດື່ມຫຍັງຈົນກວ່າຈະຂ້າໂປໂລໄດ້ກ່ອນ ແລະຕອນນີ້ພວກເຂົາກຽມການໄວ້ພ້ອມແລ້ວ ມີແຕ່ລໍຖ້າໃຫ້ທ່ານອະນຸມັດເທົ່ານັ້ນ.”
22 ຜູ້ບັງຄັບກອງພັນສັ່ງຊາຍໜຸ່ມວ່າ: “ຢ່າໃຫ້ຜູ້ໃດຮູ້ວ່າເຈົ້າມາບອກຂ້ອຍເລື່ອງນີ້.” ແລ້ວກໍໃຫ້ລາວໄປ.
23 ແລ້ວຜູ້ບັງຄັບກອງພັນກໍເອີ້ນນາຍຮ້ອຍ 2 ຄົນມາສັ່ງວ່າ: “ໄປກຽມທະຫານ 200 ຄົນໄວ້ໃຫ້ພ້ອມ ແລະກຽມທະຫານມ້າ 70 ຄົນກັບທະຫານຖືຫອກ 200 ຄົນ ແລ້ວໃຫ້ເດີນທາງໄປເມືອງກາຍຊາເຣຍຕອນ 9 ໂມງ*ກາງຄືນ.
24 ກຽມມ້າໃຫ້ໂປໂລຂີ່ ແລ້ວພາລາວໄປສົ່ງໃຫ້ເຈົ້າແຂວງເຟລິກຢ່າງປອດໄພ.”
25 ແລ້ວຜູ້ບັງຄັບກອງພັນກໍຂຽນຈົດໝາຍທີ່ມີຂໍ້ຄວາມວ່າ:
26 “ຂ້ອຍກລາວດີໂອລີເຊຍ ຂໍຮຽນທ່ານເຈົ້າແຂວງເຟລິກທີ່ນັບຖື!
27 ຜູ້ຊາຍຄົນນີ້ຖືກພວກຢິວຈັບຕົວແລະເກືອບຈະຖືກຂ້າ ແຕ່ເມື່ອຂ້ອຍຮູ້ວ່າລາວເປັນພົນລະເມືອງໂຣມ ຂ້ອຍກໍຟ້າວພາທະຫານໄປຊ່ວຍລາວ.
28 ຂ້ອຍຢາກຮູ້ວ່າເປັນຫຍັງພວກຢິວກ່າວຫາລາວ ຂ້ອຍຈຶ່ງສົ່ງຕົວລາວໄປທີ່ສານຊັນເຮດຣິນຂອງພວກຢິວ.
29 ແລ້ວຂ້ອຍກໍໄດ້ຮູ້ວ່າລາວຖືກກ່າວຫາຍ້ອນຄວາມຂັດແຍ່ງກ່ຽວກັບກົດໝາຍຂອງພວກເຂົາເອງ ແຕ່ບໍ່ມີຂໍ້ຫາຫຍັງເລີຍທີ່ເຮັດໃຫ້ລາວສົມຄວນຕາຍຫຼືຖືກຂັງຄຸກ.
30 ແລະຂ້ອຍໄດ້ຮັບແຈ້ງວ່າມີການວາງແຜນຈະທຳຮ້າຍລາວ ຂ້ອຍຈຶ່ງສົ່ງຕົວລາວມາໃຫ້ທ່ານທັນທີແລະສັ່ງໃຫ້ພວກທີ່ກ່າວຫາລາວມາຟ້ອງລາວຕໍ່ໜ້າທ່ານ.”
31 ພວກທະຫານກໍເຮັດຕາມຄຳສັ່ງ ໂດຍເອົາຕົວໂປໂລໄປເມືອງອັນຕີປາຕີໃນຕອນກາງຄືນ.
32 ໃນມື້ຕໍ່ມາ ພວກເຂົາໃຫ້ທະຫານມ້າໄປກັບໂປໂລ ສ່ວນພວກເຂົາກໍກັບໄປຄ້າຍທະຫານ.
33 ພວກທະຫານມ້າກໍເຂົ້າໄປໃນເມືອງກາຍຊາເຣຍ ແລ້ວເອົາຈົດໝາຍໄປໃຫ້ເຈົ້າແຂວງພ້ອມກັບສົ່ງຕົວໂປໂລໃຫ້ລາວຄືກັນ.
34 ເຈົ້າແຂວງອ່ານຈົດໝາຍນັ້ນແລ້ວຖາມໂປໂລວ່າເປັນຄົນແຂວງໃດ ແລະກໍໄດ້ຮູ້ວ່າໂປໂລມາຈາກແຂວງກີລີເກຍ.
35 ເຈົ້າແຂວງເວົ້າວ່າ: “ຖ້າພວກທີ່ກ່າວຫາເຈົ້າມາພ້ອມໜ້າກັນຕອນໃດ ຂ້ອຍຈະຟັງຄຳໃຫ້ການຂອງເຈົ້າຢ່າງລະອຽດ.” ແລ້ວລາວກໍສັ່ງໃຫ້ຄຸມຕົວໂປໂລໄວ້ໃນວັງຂອງເຮໂຣດ.
ຂໍ
^ ແປຕາມໂຕວ່າ “ເຈົ້າເປັນຝາທີ່ທາດ້ວຍນ້ຳປູນຂາວ”
^ ໝາຍເຖິງພວກເຂົາເຊື່ອວ່າ ຖ້າບໍ່ເຮັດຕາມທີ່ສາບານໄວ້ຈະມີແນວເປັນໄປ
^ ແປຕາມໂຕວ່າ “ຊົ່ວໂມງທີ 3”
