ຟີລິບປອຍ 1:1-30
1 ຂ້ອຍໂປໂລກັບຕີໂມທຽວທາດຂອງພະຄລິດເຢຊູ ຂຽນເຖິງຜູ້ບໍລິສຸດທຸກຄົນໃນເມືອງຟີລິບປອຍເຊິ່ງເປັນລູກສິດຂອງພະຄລິດເຢຊູ ລວມທັງພວກຜູ້ດູແລກັບຜູ້ຊ່ວຍວຽກຮັບໃຊ້.
2 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ແລະສັນຕິສຸກຈາກພະເຈົ້າຜູ້ເປັນພໍ່ຂອງພວກເຮົາ ແລະຈາກພະເຢຊູຄລິດຜູ້ເປັນນາຍ.
3 ຂ້ອຍຂອບໃຈພະເຈົ້າຂອງຂ້ອຍທຸກຄັ້ງເມື່ອຄິດຮອດພວກເຈົ້າ
4 ໃນຄຳອະທິດຖານອ້ອນວອນເພື່ອພວກເຈົ້າ. ຂ້ອຍອ້ອນວອນດ້ວຍຄວາມຍິນດີ
5 ເພາະພວກເຈົ້າສະໜັບສະໜູນ*ຂ່າວດີຕັ້ງແຕ່ມື້ທຳອິດຈົນເຖິງມື້ນີ້.
6 ພະເຈົ້າໄດ້ເລີ່ມວຽກທີ່ດີໃນທ່າມກາງພວກເຈົ້າໄວ້ແລ້ວ ແລະຂ້ອຍໝັ້ນໃຈວ່າພະອົງຈະເຮັດວຽກນັ້ນຕໍ່ໄປໃຫ້ສຳເລັດຈົນເຖິງວັນຂອງພະຄລິດເຢຊູ.
7 ການທີ່ຂ້ອຍຄິດຮອດພວກເຈົ້າທຸກຄົນແບບນີ້ກໍບໍ່ແມ່ນເລື່ອງແປກເພາະພວກເຈົ້າຢູ່ໃນໃຈຂ້ອຍສະເໝີ ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຮ່ວມກັບຂ້ອຍ ທັງພ້ອມທີ່ຈະຊ່ວຍເຫຼືອສະໜັບສະໜູນຕອນທີ່ຂ້ອຍຖືກກັກຂັງ ແລະຕອນທີ່ຂ້ອຍປົກປ້ອງຂ່າວດີແລະພະຍາຍາມເຮັດໃຫ້ການປະກາດຂ່າວດີເປັນທີ່ຍອມຮັບຕາມກົດໝາຍ.
8 ພະເຈົ້າເປັນພະຍານໄດ້ວ່າ ຂ້ອຍຄິດຮອດພວກເຈົ້າທຸກຄົນຫຼາຍສ່ຳໃດ ຂ້ອຍຮັກພວກເຈົ້າຄືກັບທີ່ພະຄລິດເຢຊູຮັກ.
9 ຂ້ອຍອະທິດຖານຢູ່ສະເໝີ ຂໍໃຫ້ພວກເຈົ້າມີຄວາມຮັກຫຼາຍຂຶ້ນເລື້ອຍໆພ້ອມກັບມີຄວາມຮູ້ທີ່ຖືກຕ້ອງແລະຄວາມເຂົ້າໃຈທີ່ເລິກເຊິ່ງ
10 ແລະຂໍໃຫ້ພວກເຈົ້າເບິ່ງໃຫ້ອອກວ່າສິ່ງໃດສຳຄັນກວ່າ ເພື່ອພວກເຈົ້າຈະບໍ່ມີບ່ອນຕິແລະບໍ່ເປັນອຸປະສັກຂັດຂວາງຄວາມເຊື່ອຂອງຄົນອື່ນຈົນເຖິງວັນຂອງພະຄລິດ
11 ແລະຂໍໃຫ້ພວກເຈົ້າເກີດຜົນທີ່ດີງາມໃນຊີວິດໂດຍທາງພະເຢຊູຄລິດ ເຊິ່ງເຮັດໃຫ້ພະເຈົ້າໄດ້ຮັບການຍ້ອງຍໍສັນລະເສີນ.
12 ພີ່ນ້ອງເອີຍ ຂ້ອຍຢາກໃຫ້ພວກເຈົ້າຮູ້ວ່າເລື່ອງທີ່ເກີດຂຶ້ນກັບຂ້ອຍນັ້ນແຮ່ງເຮັດໃຫ້ຂ່າວດີແພ່ອອກໄປ
13 ຕອນນີ້ ເລື່ອງທີ່ຂ້ອຍຖືກກັກຂັງຍ້ອນຄວາມເຊື່ອໃນພະຄລິດເປັນທີ່ຮູ້ຈັກໄປທົ່ວໃນທ່າມກາງທະຫານຄຸ້ມກັນຈັກກະພັດແລະຄົນອື່ນນຳ.
14 ແລະພີ່ນ້ອງສ່ວນຫຼາຍທີ່ຮັບໃຊ້ຜູ້ເປັນນາຍກໍເຂັ້ມແຂງຂຶ້ນເມື່ອໄດ້ຍິນຂ່າວເລື່ອງທີ່ຂ້ອຍຖືກກັກຂັງ ພວກເຂົາມີໃຈກ້າຫຼາຍຂຶ້ນແລະບໍ່ຢ້ານທີ່ຈະປະກາດຄຳສອນຂອງພະເຈົ້າ.
15 ແມ່ນຢູ່ ບາງຄົນປະກາດເລື່ອງພະຄລິດຍ້ອນຄວາມອິດສາແລະຢາກຊີງດີຊີງເດັ່ນ ແຕ່ກໍມີຄົນທີ່ປະກາດດ້ວຍເຈຕະນາດີ.
16 ພວກເຂົາປະກາດເລື່ອງພະຄລິດດ້ວຍຄວາມຮັກ ແລະຮູ້ວ່າຂ້ອຍໄດ້ຮັບມອບໝາຍໃຫ້ປົກປ້ອງຂ່າວດີ
17 ສ່ວນພວກທີ່ປະກາດຍ້ອນມັກຊີງດີຊີງເດັ່ນນັ້ນບໍ່ໄດ້ເຮັດດ້ວຍຄວາມບໍລິສຸດໃຈ ພວກເຂົາຄິດຈະສ້າງບັນຫາໃຫ້ຂ້ອຍລະຫວ່າງທີ່ຖືກກັກຂັງຢູ່ນີ້.
18 ແລ້ວຜົນເປັນແນວໃດ? ບໍ່ວ່າຈະປະກາດດ້ວຍເຈຕະນາແບບໃດ ຈະເຮັດແບບທຳທ່າຫຼືດ້ວຍຄວາມຈິງໃຈ ກໍເຮັດໃຫ້ຜູ້ຄົນຮູ້ເລື່ອງພະຄລິດຄືກັນ ນັ້ນເຮັດໃຫ້ຂ້ອຍດີໃຈ ແລະຈະດີໃຈແບບນີ້ຕໍ່ໄປເລື້ອຍໆ
19 ເພາະຂ້ອຍຮູ້ວ່າສຸດທ້າຍແລ້ວຂ້ອຍຈະລອດ ຍ້ອນການອ້ອນວອນຂອງພວກເຈົ້າແລະຍ້ອນພະລັງຂອງພະເຈົ້າທີ່ຂ້ອຍໄດ້ຮັບຜ່ານທາງພະເຢຊູຄລິດ.
20 ຂ້ອຍໝັ້ນໃຈແລະຫວັງວ່າບໍ່ມີຫຍັງຈະເຮັດໃຫ້ຂ້ອຍຕ້ອງອາຍ ຂ້ອຍຈະກ້າເວົ້າເພື່ອເຮັດໃຫ້ພະຄລິດໄດ້ຮັບການຍົກຍ້ອງຄືທີ່ຜ່ານມາ ແລະຂ້ອຍ*ຈະເຮັດແບບນັ້ນບໍ່ວ່າຈະຢູ່ຫຼືຕາຍ.
21 ສຳລັບຂ້ອຍແລ້ວ ຂ້ອຍມີຊີວິດຢູ່ເພື່ອພະຄລິດ ແລະເຖິງຈະຕາຍກໍຍັງໄດ້ກຳໄລ.
22 ຖ້າຂ້ອຍຍັງມີຊີວິດຢູ່ໃນຮ່າງກາຍນີ້ ຂ້ອຍກໍຈະມີຜົນງານຫຼາຍຂຶ້ນ ແຕ່ເຖິງວ່າຂ້ອຍຈະເລືອກໄດ້ ຂ້ອຍກໍຄືຊິບໍ່ບອກໃຜ.
23 ທັງສອງທາງເຮັດໃຫ້ຂ້ອຍລຳບາກໃຈ ເພາະໃຈໜຶ່ງຂ້ອຍກໍຢາກໄດ້ຮັບການປົດປ່ອຍເພື່ອໄປຢູ່ກັບພະຄລິດ ເຊິ່ງແທ້ໆແລ້ວກໍດີກວ່າຫຼາຍ.
24 ແຕ່ຂ້ອຍຍັງຕ້ອງຢູ່ໃນຮ່າງກາຍນີ້ໄປກ່ອນເພື່ອຊ່ວຍພວກເຈົ້າ.
25 ເມື່ອໝັ້ນໃຈແບບນີ້ແລ້ວ ຂ້ອຍຈຶ່ງຮູ້ວ່າຂ້ອຍຈະມີຊີວິດຢູ່ຕໍ່ໄປເພື່ອຊ່ວຍພວກເຈົ້າໃຫ້ກ້າວໜ້າແລະມີຄວາມສຸກທີ່ເກີດຈາກຄວາມເຊື່ອຂອງພວກເຈົ້າ
26 ແລະເມື່ອຂ້ອຍກັບໄປຫາພວກເຈົ້າອີກ ຂ້ອຍຈະເຮັດໃຫ້ພວກເຈົ້າທີ່ເປັນລູກສິດຂອງພະຄລິດເຢຊູດີໃຈຫຼາຍ.
27 ໃຫ້ຮູບແບບຊີວິດຂອງພວກເຈົ້າ*ສອດຄ່ອງກັບຂ່າວດີເລື່ອງພະຄລິດ ເມື່ອເປັນແນວນັ້ນບໍ່ວ່າຂ້ອຍຈະໄດ້ໄປຫາພວກເຈົ້າຫຼືບໍ່ກໍຕາມ ຂ້ອຍຈະໄດ້ຍິນຂ່າວກ່ຽວກັບພວກເຈົ້າແລະຮູ້ວ່າພວກເຈົ້າຢືນຢັດເປັນນ້ຳໜຶ່ງໃຈດຽວກັນ ຕໍ່ສູ້ຄຽງບ່າຄຽງໄຫຼ່ກັນຄືກັບຄົນໆດຽວເພື່ອຮັກສາຄວາມເຊື່ອໃນຂ່າວດີໄວ້
28 ແລະຮູ້ວ່າພວກຜູ້ຕໍ່ຕ້ານບໍ່ໄດ້ເຮັດໃຫ້ພວກເຈົ້າຢ້ານເລີຍ ທັງໝົດນີ້ເປັນຫຼັກຖານຢືນຢັນວ່າພວກເຂົາຈະຕ້ອງພິນາດ ແຕ່ພວກເຈົ້າຈະລອດ ພະເຈົ້າຈະໃຫ້ຫຼັກຖານຢືນຢັນເລື່ອງນີ້.
29 ພວກເຈົ້າມີສິດທິພິເສດໄດ້ເປັນລູກສິດຂອງພະຄລິດ ບໍ່ແມ່ນແຕ່ໃຫ້ມາເຊື່ອໃນພະຄລິດເທົ່ານັ້ນ ແຕ່ໃຫ້ທົນທຸກເພື່ອເພິ່ນນຳ.
30 ພວກເຈົ້າກຳລັງຕໍ່ສູ້ຄືກັບທີ່ເຄີຍເຫັນຂ້ອຍຕໍ່ສູ້ມາແລ້ວ ແລະພວກເຈົ້າຮູ້ວ່າຕອນນີ້ຂ້ອຍກໍຍັງສູ້ຢູ່.
ຂໍ
^ ຫຼື “ພວກເຈົ້າມີສ່ວນຮ່ວມໃນການສົ່ງເສີມ”
^ ແປຕາມໂຕວ່າ “ຮ່າງກາຍຂອງຂ້ອຍ”
^ ຫຼື “ໃຫ້ເຮັດຕົວເປັນພົນລະເມືອງທີ່”
