ຢາໂກໂບ 1:1-27
1 ຂ້ອຍຢາໂກໂບ ທາດຂອງພະເຈົ້າແລະຂອງພະເຢຊູຄລິດຜູ້ເປັນນາຍ ຂຽນເຖິງ 12 ຕະກູນທີ່ຢູ່ກະຈັດກະຈາຍໃນບ່ອນຕ່າງໆ.
ສະບາຍດີ!
2 ພີ່ນ້ອງຂອງຂ້ອຍ ເມື່ອພວກເຈົ້າເຈິຄວາມຍາກລຳບາກ* ໃຫ້ຖືວ່າເປັນເລື່ອງໜ້າຍິນດີ
3 ເພາະພວກເຈົ້າຮູ້ວ່າເມື່ອຄວາມເຊື່ອຂອງພວກເຈົ້າຜ່ານການທົດສອບແລ້ວ ຈະເຮັດໃຫ້ເກີດຄວາມອົດທົນ.
4 ແລະໃຫ້ອົດທົນຈົນເຖິງທີ່ສຸດເພາະນັ້ນຈະເປັນການຝຶກພວກເຈົ້າ ເພື່ອພວກເຈົ້າຈະເປັນຄົນດີພ້ອມບໍ່ຂາດຕົກບົກພ່ອງຫຍັງເລີຍ.
5 ຖ້າຜູ້ໃດໃນພວກເຈົ້າຂາດສະຕິປັນຍາ ໃຫ້ລາວພະຍາຍາມຂໍຈາກພະເຈົ້າຕໍ່ໆໄປ ແລ້ວລາວຈະໄດ້ຮັບຈາກພະອົງ ເພາະພະເຈົ້າເຕັມໃຈໃຫ້ທຸກຄົນຢ່າງໃຈກວ້າງແລະບໍ່ເຄີຍຕຳໜິ.
6 ແຕ່ໃຫ້ລາວຂໍຢູ່ເລື້ອຍໆດ້ວຍຄວາມເຊື່ອ ຢ່າສົງໄສເລີຍ ເພາະຄົນທີ່ສົງໄສກໍເປັນຄືຄື້ນໃນທະເລທີ່ຖືກລົມພັດຊັດໄປຊັດມາ.
7 ທີ່ຈິງ ຄົນແບບນັ້ນບໍ່ຕ້ອງຫວັງຈະໄດ້ຫຍັງຈາກພະເຢໂຫວາ.
8 ລາວເປັນຄົນໂລເລ ບໍ່ແນ່ບໍ່ນອນຈັກຢ່າງ.
9 ພີ່ນ້ອງຄົນໃດທີ່ຕ່ຳຕ້ອຍ* ຂໍໃຫ້ຊື່ນຊົມຍິນດີເພາະເຈົ້າໄດ້ຮັບການຍົກຖານະຂຶ້ນແລ້ວ
10 ສ່ວນພີ່ນ້ອງທີ່ຮັ່ງມີກໍໃຫ້ຊື່ນຊົມຍິນດີຍ້ອນເຈົ້າໄດ້ຮຽນຮູ້ທີ່ຈະເປັນຄົນຕ່ຳຕ້ອຍ ເພາະຄົນຮັ່ງມີຈະເສື່ອມສູນໄປຄືດອກໄມ້ໃນທົ່ງ.
11 ເມື່ອຕາເວັນຂຶ້ນແລະແດດຮ້ອນແຜດເຜົາ ພືດກໍຫ່ຽວແຫ້ງໄປ ດອກຂອງມັນກໍຫຼົ່ນແລະຄວາມງາມກໍໝົດໄປ ຄົນຮັ່ງມີກໍຄືກັນ ລາວຈະເສື່ອມສູນໄປໃນຕອນທີ່ກຳລັງໃຊ້ຊີວິດຕາມແນວທາງຂອງຕົວເອງ.
12 ຄົນທີ່ອົດທົນກັບຄວາມຍາກລຳບາກ*ຢູ່ສະເໝີກໍມີຄວາມສຸກ ເພາະເມື່ອພະເຢໂຫວາຍອມຮັບລາວ ພະອົງຈະໃຫ້ຊີວິດແກ່ລາວເປັນລາງວັນ*ຕາມທີ່ພະອົງສັນຍາໄວ້ກັບຄົນທີ່ຮັກພະອົງ.
13 ເມື່ອເຈິຄວາມຍາກລຳບາກ*ຢ່າເວົ້າວ່າ: “ພະເຈົ້າທົດລອງຂ້ອຍ.” ເພາະພະອົງບໍ່ເຄີຍທົດລອງຜູ້ໃດດ້ວຍຄວາມຊົ່ວແລະບໍ່ມີຜູ້ໃດທົດລອງພະເຈົ້າດ້ວຍຄວາມຊົ່ວໄດ້.
14 ແຕ່ທຸກຄົນຖືກທົດລອງເມື່ອຄວາມຕ້ອງການຂອງຕົວເອງຊັກຈູງແລະລໍ້ລວງລາວ.
15 ເມື່ອຄວາມຕ້ອງການເພີ່ມຂຶ້ນຈົນເຕັມທີແລ້ວກໍເຮັດໃຫ້ເກີດບາບ ແລະເມື່ອມີການເຮັດບາບແລ້ວ ບາບນັ້ນກໍເຮັດໃຫ້ເກີດຄວາມຕາຍ.
16 ພີ່ນ້ອງເອີຍ ຢ່າຫຼອກລວງຕົວເອງເລີຍ.
17 ສິ່ງດີໆແລະສົມບູນທຸກຢ່າງມາຈາກທາງເທິງ ມາຈາກພະເຈົ້າຜູ້ເຮັດໃຫ້ເກີດດວງດາວທີ່ສ່ອງແສງໃນທ້ອງຟ້າ ພະອົງບໍ່ເຄີຍປ່ຽນແປງຄືກັບເງົາທີ່ປ່ຽນໄປເລື້ອຍໆ.
18 ພະອົງຕ້ອງການທີ່ຈະເຮັດໃຫ້ພວກເຮົາເກີດດ້ວຍຄວາມຈິງ ເພື່ອພວກເຮົາຈະເປັນໝາກຜົນທຳອິດຈາກທ່າມກາງມະນຸດ.
19 ພີ່ນ້ອງທີ່ຮັກ ໃຫ້ຈື່ໄວ້ວ່າ ທຸກຄົນຕ້ອງໄວໃນການຟັງ ຊ້າໃນການເວົ້າ ຊ້າໃນການຮ້າຍ
20 ເພາະຄວາມຮ້າຍຂອງຄົນເຮົາບໍ່ໄດ້ຊ່ວຍໃຫ້ຜູ້ໃດເຮັດສິ່ງທີ່ຖືກຕ້ອງໃນສາຍຕາພະເຈົ້າ.
21 ດັ່ງນັ້ນ ໃຫ້ກຳຈັດຄວາມຂີ້ດຽດແລະການເຮັດຊົ່ວທຸກຮູບແບບອອກໄປ ແລ້ວຍອມຮັບຢ່າງອ່ອນນ້ອມເມື່ອພະເຈົ້າປູກຝັງຄຳສອນຂອງພະອົງໄວ້ໃນຕົວພວກເຈົ້າ ເພາະຄຳສອນນັ້ນຊ່ວຍຊີວິດພວກເຈົ້າໄດ້.
22 ໃຫ້ເຮັດຕາມຄຳສອນຂອງພະເຈົ້າສະເໝີ ຢ່າເປັນພຽງຜູ້ຟັງທີ່ລໍ້ລວງຕົວເອງດ້ວຍການຄິດຫາເຫດຜົນແບບຜິດໆ.
23 ຖ້າຜູ້ໃດຟັງຄຳສອນຂອງພະເຈົ້າແລ້ວບໍ່ເຮັດຕາມ ລາວກໍເປັນຄືກັບຄົນທີ່ສ່ອງເບິ່ງໜ້າຕົວເອງໃນແວ່ນ.
24 ເມື່ອເບິ່ງແລ້ວລາວກໍໄປ ແລະລືມທັນທີວ່າໜ້າຕາຕົວເອງເປັນແນວໃດ.
25 ແຕ່ຄົນທີ່ເບິ່ງເລິກເຂົ້າໄປໃນກົດໝາຍທີ່ສົມບູນແບບເຊິ່ງໃຫ້ເສລີພາບແລະຍຶດໝັ້ນກັບກົດໝາຍນັ້ນ ລາວບໍ່ແມ່ນຄົນທີ່ຟັງແລ້ວກໍລືມ ແຕ່ລາວເຮັດຕາມຄຳສອນຂອງພະເຈົ້າແລະຈະມີຄວາມສຸກທີ່ເຮັດແບບນັ້ນ.
26 ຖ້າຜູ້ໃດຄິດວ່າຕົວເອງນະມັດສະການພະເຈົ້າຢູ່* ແຕ່ບໍ່ໄດ້ຄວບຄຸມລີ້ນຂອງຕົນ ລາວກຳລັງຫຼອກລວງຕົວເອງ* ແລະການນະມັດສະການຂອງລາວກໍບໍ່ມີປະໂຫຍດ.
27 ການນະມັດສະການ*ແບບທີ່ສະອາດແລະບໍລິສຸດຕາມຄວາມຄິດຂອງພະເຈົ້າຜູ້ເປັນພໍ່ຂອງພວກເຮົາແມ່ນ ການເບິ່ງແຍງລູກກຳພ້າກັບແມ່ໝ້າຍທີ່ມີຄວາມທຸກລຳບາກ ແລະຮັກສາຕົວໃຫ້ພົ້ນຈາກແນວທາງທີ່ບໍ່ສະອາດຂອງໂລກນີ້.
ຂໍ
^ ຫຼື “ການທົດສອບ”
^ ອາດໝາຍເຖິງຄົນທີ່ຕ່ຳຕ້ອຍໃນສັງຄົມຫຼືຄົນທຸກຍາກ
^ ຫຼື “ການທົດສອບ”
^ ແປຕາມໂຕວ່າ “ໃຫ້ມົງກຸດຊີວິດແກ່ລາວ”
^ ຫຼື “ການທົດສອບ”
^ ຫຼື “ເຄັ່ງສາສະໜາ”
^ ແປຕາມໂຕວ່າ “ຫຼອກລວງໃຈຕົວເອງ”
^ ຫຼື “ການປະຕິບັດສາສະໜາ”
