ເຮັບເຣີ 1:1-14
1 ສະໄໝກ່ອນ ພະເຈົ້າເວົ້າກັບບັນພະບຸລຸດຂອງພວກເຮົາໃນຫຼາຍໂອກາດແລະຫຼາຍວິທີຜ່ານທາງພວກຜູ້ພະຍາກອນ.
2 ມາຮອດຕອນທ້າຍຂອງສະໄໝນີ້ ພະອົງເວົ້າກັບພວກເຮົາຜ່ານທາງລູກທີ່ພະອົງແຕ່ງຕັ້ງໃຫ້ເປັນຜູ້ຮັບມໍລະດົກທັງໝົດ ແລະພະອົງໃຊ້ເພິ່ນຜູ້ນີ້ໃຫ້ສ້າງສິ່ງຕ່າງໆໃນເອກະພົບ.*
3 ເພິ່ນສະທ້ອນຄວາມສະຫງ່າງາມຂອງພະເຈົ້າແລະຖອດແບບມາຈາກພະອົງໄດ້ຢ່າງຄົບຖ້ວນ ເພິ່ນຄ້ຳຈຸນທຸກສິ່ງໄວ້ດ້ວຍຖ້ອຍຄຳທີ່ມີພະລັງຂອງເພິ່ນ ແລະເມື່ອເພິ່ນລົບລ້າງບາບຂອງພວກເຮົາແລ້ວ ເພິ່ນກໍນັ່ງຢູ່ເບື້ອງຂວາມືຂອງພະເຈົ້າອົງຍິ່ງໃຫຍ່ໃນສະຫວັນ.
4 ດັ່ງນັ້ນ ເພິ່ນຈຶ່ງສູງສົ່ງກວ່າພວກທູດສະຫວັນເພາະເພິ່ນໄດ້ຮັບຊື່ທີ່ຍິ່ງໃຫຍ່ກວ່າຊື່ຂອງທູດສະຫວັນທຸກອົງ.
5 ຕົວຢ່າງເຊັ່ນ: ພະເຈົ້າເຄີຍເວົ້າກັບທູດສະຫວັນອົງໃດບໍວ່າ “ລູກພໍ່ ມື້ນີ້ເຮົາໄດ້ເປັນພໍ່ຂອງເຈົ້າແລ້ວ” ແລະເວົ້າອີກວ່າ: “ເຮົາຈະເປັນພໍ່ຂອງລາວແລະລາວຈະເປັນລູກຂອງເຮົາ”?
6 ແລະຕອນທີ່ພະອົງຈະສົ່ງລູກກົກເຂົ້າມາໃນໂລກອີກເທື່ອໜຶ່ງ ພະອົງສັ່ງວ່າ: “ໃຫ້ທູດສະຫວັນທັງໝົດຂອງພະເຈົ້າສະແດງຄວາມເຄົາລົບ*ເພິ່ນ.”
7 ແລະພະເຈົ້າເວົ້າເຖິງພວກທູດສະຫວັນຂອງພະອົງວ່າ: “ພະອົງເຮັດໃຫ້ທູດສະຫວັນຂອງພະອົງມີລິດເດດຫຼາຍ* ແລະເຮັດໃຫ້ພວກຜູ້ຮັບໃຊ້*ຂອງພະອົງເປັນແປວໄຟ.”
8 ແຕ່ພະອົງເວົ້າເຖິງລູກຂອງພະອົງວ່າ: “ພະເຈົ້າເປັນບັນລັງຂອງທ່ານຕະຫຼອດໄປ ແລະຄະທາແຫ່ງການປົກຄອງ*ຂອງທ່ານເປັນຄະທາແຫ່ງຄວາມທ່ຽງທຳ.*
9 ທ່ານຮັກຄວາມຍຸຕິທຳ*ແລະກຽດຊັງຄວາມຊົ່ວ. ຍ້ອນແນວນີ້ ພະເຈົ້າເຊິ່ງເປັນພະເຈົ້າຂອງທ່ານຈຶ່ງເຈີມທ່ານດ້ວຍນ້ຳມັນແຫ່ງຄວາມຍິນດີຫຼາຍກວ່າພວກໝູ່ຂອງທ່ານ.”
10 ແລະພະເຈົ້າຍັງໃຫ້ຂຽນໄວ້ນຳວ່າ: “ທ່ານຜູ້ເປັນນາຍ ໃນຕອນເລີ່ມຕົ້ນ ທ່ານວາງຮາກຖານຂອງໂລກໄວ້ດົນນານມາແລ້ວ ທ້ອງຟ້າເປັນຜົນງານຂອງທ່ານ.
11 ສິ່ງເຫຼົ່ານັ້ນຈະຫາຍສາບສູນໄປ ແຕ່ທ່ານຈະຄົງຢູ່. ພວກມັນຈະເກົ່າຄືເຄື່ອງນຸ່ງ
12 ແລະທ່ານຈະມ້ວນພວກມັນໄວ້ຄືເສື້ອຄຸມ ແລະພວກມັນຈະຖືກປ່ຽນຄືປ່ຽນເສື້ອ ແຕ່ທ່ານຈະເປັນຄືເກົ່າແລະຊີວິດຂອງທ່ານຈະບໍ່ມີວັນສິ້ນສຸດ.”
13 ສ່ວນພວກທູດສະຫວັນນັ້ນ ພະເຈົ້າເຄີຍເວົ້າກັບອົງໃດບໍວ່າ: “ນັ່ງຢູ່ເບື້ອງຂວາມືຂອງເຮົາກ່ອນ ຈົນກວ່າເຮົາຈະປາບພວກສັດຕູຂອງເຈົ້າໃຫ້ເປັນບ່ອນວາງຕີນຂອງເຈົ້າ”?
14 ທູດສະຫວັນເຫຼົ່ານັ້ນທຸກອົງໄດ້ຮັບອຳນາດໃຫ້ຮັບໃຊ້ພະເຈົ້າ*ບໍ່ແມ່ນບໍ? ພະອົງໃຊ້ພວກເຂົາໄປຮັບໃຊ້ຄົນທີ່ຈະໄດ້ຮັບຄວາມລອດ.*
ຂໍ
^ ຫຼື “ສ້າງຍຸກຕ່າງໆ.” ເບິ່ງຄຳວ່າ “ຍຸກ” ໃນສ່ວນອະທິບາຍຄຳສັບ
^ ຫຼື “ຄຳນັບ”
^ ຫຼື “ເປັນຄືລົມ”
^ ຫຼື “ພວກຜູ້ຮັບໃຊ້ສາທາລະນະຊົນ”
^ ຫຼື “ລາຊະອານາຈັກ”
^ ຫຼື “ຄວາມຍຸຕິທຳ”
^ ເບິ່ງຄຳວ່າ “ຖືກຕ້ອງຊອບທຳ” ໃນສ່ວນອະທິບາຍຄຳສັບ
^ ຫຼື “ຮັບໃຊ້ສາທາລະນະຊົນ”
^ ແປຕາມໂຕວ່າ “ໄດ້ຮັບຄວາມລອດເປັນມໍລະດົກ”
