1 ເປໂຕ 4:1-19
4 ໃນເມື່ອພະຄລິດທົນທຸກມາແລ້ວຕອນທີ່ເປັນມະນຸດ ກໍໃຫ້ພວກເຈົ້າກຽມຕົວໃຫ້ພ້ອມເພື່ອຈະຄິດ*ແບບດຽວກັບເພິ່ນ ເພາະຄົນທີ່ທົນທຸກໃນຮ່າງກາຍນີ້ກໍເຊົາເຮັດບາບແລ້ວ
2 ລາວຈະບໍ່ໃຊ້ຊີວິດທີ່ເຫຼືອຢູ່ໃນຮ່າງກາຍນີ້ຕາມຄວາມຕ້ອງການຂອງມະນຸດອີກຕໍ່ໄປ ແຕ່ຕາມຄວາມຕ້ອງການຂອງພະເຈົ້າ.
3 ຜ່ານມາ ພວກເຈົ້າໃຊ້ຊີວິດຕາມໃຈຜູ້ຄົນໃນໂລກຫຼາຍພໍແລ້ວ ຕອນນັ້ນພວກເຈົ້າປະພຶດແບບບໍ່ມີຢາງອາຍ* ປ່ອຍຕົວໄປກັບຄວາມຕ້ອງການຜິດໆ ດື່ມເຫຼົ້າຫຼາຍເກີນໄປ ກິນລ້ຽງເຮຮາຈົນສຸດຂີດ ແຂ່ງຂັນກັນດື່ມເຫຼົ້າ ແລະຂາບໄຫວ້ຮູບບູຊາທີ່ໜ້າລັງກຽດ.
4 ແຕ່ເມື່ອພວກເຈົ້າເຊົາເຮັດສິ່ງຊົ່ວຮ້າຍຄືກັບທີ່ພວກເຂົາເຮັດ ພວກເຂົາກໍແປກໃຈແລະເວົ້າດູຖູກຢຽດຫຍາມພວກເຈົ້າ.
5 ຄົນພວກນີ້ຈະຕ້ອງໃຫ້ການຕໍ່ພະຄລິດເຊິ່ງພ້ອມຈະພິພາກສາຄົນເປັນແລະຄົນຕາຍ.
6 ທີ່ຈິງ ນີ້ເປັນເຫດຜົນທີ່ມີການປະກາດຂ່າວດີແກ່ຄົນຕາຍນຳ* ເພາະເຖິງວ່າພວກເຂົາຖືກຕັດສິນຕາມແງ່ຄິດຂອງມະນຸດ ແຕ່ສຳລັບພະເຈົ້າແລ້ວ ພວກເຂົາອາດຈະໃຊ້ຊີວິດຕາມການຊີ້ນຳຈາກພະລັງຂອງພະເຈົ້າກໍໄດ້.
7 ຈຸດຈົບຂອງທຸກສິ່ງມາໃກ້ແລ້ວ ດັ່ງນັ້ນ ຂໍໃຫ້ມີສະຕິ ແລະຕື່ນຕົວສະເໝີທີ່ຈະອະທິດຖານຢູ່ເລື້ອຍໆ.
8 ສຳຄັນທີ່ສຸດແມ່ນ ໃຫ້ຮັກກັນຫຼາຍໆ ເພາະຄວາມຮັກປົກຄຸມບາບໄດ້ຢ່າງຫຼວງຫຼາຍ.
9 ໃຫ້ຍິນດີຕ້ອນຮັບກັນໂດຍບໍ່ຈົ່ມ.
10 ແຕ່ລະຄົນໄດ້ຮັບຄວາມສາມາດ*ຕາມຄວາມກະລຸນາທີ່ຍິ່ງໃຫຍ່ເຊິ່ງພະເຈົ້າສະແດງອອກໃນຫຼາຍໆທາງ ດັ່ງນັ້ນ ໃຫ້ໃຊ້ຄວາມສາມາດຕາມຂະໜາດທີ່ໄດ້ຮັບມາເພື່ອຮັບໃຊ້ກັນໃນຖານະຄົນຮັບໃຊ້ທີ່ດີ.
11 ຖ້າຜູ້ໃດມີຄວາມສາມາດໃນການເວົ້າກໍໃຫ້ລາວເວົ້າຄືກັບກຳລັງຖ່າຍທອດຖ້ອຍຄຳຂອງພະເຈົ້າ. ຖ້າຜູ້ໃດຮັບໃຊ້ກໍໃຫ້ລາວຮັບໃຊ້ໂດຍເພິ່ງກຳລັງທີ່ມາຈາກພະເຈົ້າ ເພື່ອພະອົງຈະໄດ້ຮັບການຍ້ອງຍໍສັນລະເສີນໃນທຸກເລື່ອງໂດຍທາງພະເຢຊູຄລິດ. ຂໍໃຫ້ພະເຈົ້າມີກຽດແລະລິດເດດຕະຫຼອດໄປ. ອາແມນ.
12 ພີ່ນ້ອງທີ່ຮັກ ຢ່າແປກໃຈກັບການທົດສອບທີ່ເປັນຄືໄຟເຊິ່ງພວກເຈົ້າເຈິຢູ່ ຄືກັບວ່າມີເລື່ອງແປກເກີດຂຶ້ນກັບພວກເຈົ້າ.
13 ແຕ່ໃຫ້ດີໃຈສະເໝີທີ່ພວກເຈົ້າຕ້ອງທົນທຸກຮ່ວມກັບພະຄລິດເຖິງຂະໜາດນີ້ ເພາະເມື່ອເພິ່ນມາປາກົດໃນຖານະທີ່ສູງສົ່ງ ພວກເຈົ້າກໍຈະຊົມຊື່ນຍິນດີນຳກັນກັບເພິ່ນ.
14 ຖ້າພວກເຈົ້າຖືກດ່າ*ຍ້ອນເປັນລູກສິດຂອງພະຄລິດ ພວກເຈົ້າກໍມີຄວາມສຸກ ເພາະນັ້ນສະແດງວ່າພວກເຈົ້າມີພະລັງຂອງພະເຈົ້າເຊິ່ງເປັນພະລັງທີ່ເຮັດໃຫ້ມີກຽດ.
15 ຢ່າໃຫ້ຜູ້ໃດໃນພວກເຈົ້າຕ້ອງທົນທຸກຍ້ອນເປັນຄາຕະກອນ ເປັນຂີ້ລັກ ເປັນຄົນເຮັດຊົ່ວ ຫຼືເປັນຄົນທີ່ມັກຫຍຸ້ງກັບເລື່ອງຂອງຄົນອື່ນ.
16 ແຕ່ຖ້າຜູ້ໃດຕ້ອງທົນທຸກຍ້ອນເປັນຄລິດສະຕຽນ ກໍຢ່າອາຍເລີຍ ຂໍໃຫ້ລາວຍ້ອງຍໍສັນລະເສີນພະເຈົ້າດ້ວຍການໃຊ້ຊີວິດແບບຄລິດສະຕຽນຕໍ່ໆໄປ.
17 ຕອນນີ້ເຖິງເວລາສຳລັບການພິພາກສາແລ້ວ ການພິພາກສາຈະເລີ່ມຕົ້ນກັບຄອບຄົວຂອງພະເຈົ້າກ່ອນ. ຖ້າການພິພາກສາເລີ່ມກັບພວກເຮົາກ່ອນ ແລ້ວຈະເກີດຫຍັງຂຶ້ນກັບຄົນທີ່ບໍ່ເຊື່ອຟັງຂ່າວດີຂອງພະເຈົ້າ?
18 “ຖ້າຄົນດີຍັງລອດໄດ້ຢ່າງຍາກລຳບາກ ແລ້ວຄົນທີ່ໝິ່ນປະໝາດພະເຈົ້າແລະຄົນບາບຈະເປັນແນວໃດ?”
19 ດັ່ງນັ້ນ ໃຫ້ຄົນທີ່ທົນທຸກຍ້ອນເຮັດສິ່ງທີ່ພະເຈົ້າຕ້ອງການນັ້ນຝາກຊີວິດຕົວເອງໄວ້ກັບພະອົງເຊິ່ງເປັນຜູ້ສ້າງທີ່ສັດຊື່ ແລະໃຫ້ລາວເຮັດດີຕໍ່ໆໄປ.
ຂໍ
^ ຫຼື “ມີຄວາມຕັ້ງໃຈ”
^ ເບິ່ງສ່ວນອະທິບາຍຄຳສັບ
^ ໝາຍເຖິງຄົນທີ່ຄືກັບວ່າຕາຍໄປແລ້ວເພາະການເຮັດບາບ
^ ແປຕາມໂຕວ່າ “ຂອງຂວັນ”
^ ຫຼື “ຖືກດູຖູກ”
