1 ໂກຣິນໂທ 16:1-24
16 ໃນເລື່ອງການລວບລວມເງິນເພື່ອຊ່ວຍພວກຜູ້ບໍລິສຸດນັ້ນ ຂໍໃຫ້ພວກເຈົ້າເຮັດຄືກັບທີ່ຂ້ອຍໄດ້ສັ່ງປະຊາຄົມຕ່າງໆໃນແຂວງຄາລາເຕຍ.
2 ໃນມື້ທຳອິດຂອງທຸກໆອາທິດ ໃຫ້ແຕ່ລະຄົນແບ່ງເງິນໄວ້ຕາມຄວາມສາມາດຂອງຕົວເອງ ເພື່ອຈະບໍ່ຕ້ອງລວບລວມເງິນຕອນທີ່ຂ້ອຍມາ.
3 ເມື່ອໄປຮອດ ຂ້ອຍຈະໃຫ້ຄົນທີ່ມີໜັງສືຮັບຮອງຈາກພວກເຈົ້າ ເອົາເງິນທີ່ພວກເຈົ້າມີນ້ຳໃຈບໍລິຈາກໄປສົ່ງຢູ່ເມືອງເຢຣູຊາເລັມ.
4 ແຕ່ຖ້າເຫັນວ່າຂ້ອຍຄວນໄປນຳ ຂ້ອຍກໍຈະໄປກັບພວກເຂົາ.
5 ຂ້ອຍຈະໄປຫາພວກເຈົ້າເມື່ອເດີນທາງຜ່ານແຂວງມາເກໂດເນຍແລ້ວ ເພາະຂ້ອຍຕັ້ງໃຈຈະຜ່ານທາງແຂວງມາເກໂດເນຍ
6 ແລະຂ້ອຍອາດຈະພັກຢູ່ກັບພວກເຈົ້າໄລຍະໜຶ່ງ ຖ້າເປັນແນວນັ້ນ ຂ້ອຍອາດຈະພັກຈົນແລ້ວລະດູໜາວ ເພື່ອວ່າຕອນທີ່ຂ້ອຍເດີນທາງໄປຕໍ່ພວກເຈົ້າຈະໄປສົ່ງຂ້ອຍຈັກໄລຍະໜຶ່ງ.
7 ຂ້ອຍຍັງບໍ່ຢາກໄປຫາພວກເຈົ້າຕອນນີ້ ແລ້ວຢູ່ໄດ້ບຶດດຽວ ແຕ່ຢາກຈະຢູ່ກັບພວກເຈົ້າດົນໆ ຖ້າພະເຢໂຫວາຕ້ອງການ.
8 ຕອນນີ້ ຂ້ອຍຈະຢູ່ເມືອງເອເຟໂຊກ່ອນຈົນກວ່າຈະຮອດເທດສະການເພັນເຕກອດ
9 ເພາະຢູ່ນີ້ມີໂອກາດ*ເປີດກວ້າງໃຫ້ຂ້ອຍໄດ້ເຮັດວຽກແລ້ວ ແຕ່ກໍມີຜູ້ຕໍ່ຕ້ານຫຼາຍຄືກັນ.
10 ຖ້າຕີໂມທຽວໄປຮອດ ຕອນທີ່ລາວຢູ່ກັບພວກເຈົ້າຢ່າໃຫ້ລາວກັງວົນຫຍັງ ເພາະລາວເຮັດວຽກຂອງພະເຢໂຫວາຄືກັບຂ້ອຍ.
11 ດັ່ງນັ້ນ ຢ່າໃຫ້ຜູ້ໃດດູຖູກລາວ ແລະຕອນທີ່ລາວກັບ ຂໍໃຫ້ໄປສົ່ງລາວຈັກໄລຍະໜຶ່ງເພື່ອລາວຈະກັບມາຫາຂ້ອຍຢ່າງປອດໄພ ເພາະຂ້ອຍກັບພວກພີ່ນ້ອງລໍຖ້າລາວຢູ່.
12 ສ່ວນອາໂປໂລພີ່ນ້ອງຂອງພວກເຮົາ ຂ້ອຍຂໍຮ້ອງລາວຫຼາຍແທ້ໆເພື່ອໃຫ້ໄປຫາພວກເຈົ້າພ້ອມກັບພວກພີ່ນ້ອງ ແຕ່ລາວຍັງບໍ່ຢາກໄປຕອນນີ້ ລາວຈະໄປເມື່ອມີໂອກາດ.
13 ໃຫ້ພວກເຈົ້າຕື່ນຕົວສະເໝີ ມີຄວາມເຊື່ອທີ່ໝັ້ນຄົງ ມີໃຈກ້າ ແລະເຂັ້ມແຂງ.
14 ໃຫ້ເຮັດທຸກສິ່ງດ້ວຍຄວາມຮັກ.
15 ພວກເຈົ້າກໍຮູ້ວ່າຊະເຕຟານາກັບຄົນໃນເຮືອນຂອງລາວເປັນລູກສິດກຸ່ມທຳອິດໃນແຂວງອະຂາຢາ ແລະພວກເຂົາທຸ່ມເທຕົວເພື່ອຊ່ວຍເຫຼືອ*ພວກຜູ້ບໍລິສຸດ. ດັ່ງນັ້ນ ພີ່ນ້ອງເອີຍ ຂ້ອຍຂໍຮ້ອງວ່າ:
16 ໃຫ້ພວກເຈົ້າຍອມເຊື່ອຟັງຄົນແບບນັ້ນ ລວມທັງຜູ້ຮ່ວມງານທຸກຄົນທີ່ເຮັດວຽກໜັກ.
17 ຂ້ອຍດີໃຈທີ່ຊະເຕຟານາ ຟໍຕູນາໂຕ ແລະອະຂາອີໂກໄດ້ມາຫາຂ້ອຍ ພວກເຂົາເຮັດໃຫ້ຂ້ອຍຮູ້ສຶກຄືກັບວ່າພວກເຈົ້າທັງໝົດກໍຢູ່ນີ້ຄືກັນ.
18 ພວກເຂົາເຮັດໃຫ້ຂ້ອຍແລະພວກເຈົ້າໄດ້ກຳລັງໃຈ. ຂໍໃຫ້ນັບຖືແລະຂອບໃຈຄົນແບບນັ້ນ.
19 ປະຊາຄົມຕ່າງໆໃນແຂວງອາຊີ*ຝາກຄວາມຄິດຮອດໄປເຖິງພວກເຈົ້າ. ອາກີລາແລະປີຊະກາກັບປະຊາຄົມທີ່ປະຊຸມກັນໃນເຮືອນຂອງພວກເຂົາກໍຝາກຄວາມຮັກທີ່ອົບອຸ່ນແບບຄລິດສະຕຽນມາໃຫ້ຄືກັນ.
20 ພີ່ນ້ອງທຸກຄົນກໍຝາກຄວາມຄິດຮອດໄປເຖິງພວກເຈົ້າ. ຂໍໃຫ້ຈູບທັກທາຍກັນແບບພີ່ນ້ອງ.
21 ຂ້ອຍໂປໂລຂຽນຄຳທັກທາຍສ່ວນນີ້ດ້ວຍຕົວຂ້ອຍເອງ.
22 ຖ້າຜູ້ໃດບໍ່ຮັກຜູ້ເປັນນາຍ ກໍໃຫ້ຜູ້ນັ້ນຖືກສາບແຊ່ງ. ຂໍໃຫ້ຜູ້ເປັນນາຍຂອງພວກເຮົາມາໄວໆ!
23 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຢຊູຜູ້ເປັນນາຍ.
24 ຂ້ອຍຂໍຝາກຄວາມຮັກໃຫ້ທຸກຄົນທີ່ເປັນລູກສິດຂອງພະຄລິດເຢຊູ.
