ກິດຈະການຂອງອັກຄະສາວົກ 24:1-27
24 ຫ້າມື້ຕໍ່ມາ ປະໂລຫິດໃຫຍ່ອານາເນຍ+ກັບຜູ້ນຳຄົນຢິວບາງຄົນແລະທະນາຍຄວາມຊື່ເຕຕູໂລກໍເດີນທາງໄປແຈ້ງຂໍ້ກ່າວຫາໂປໂລຕໍ່ເຈົ້າແຂວງ.+
2 ເມື່ອເຕຕູໂລຖືກເອີ້ນ ລາວກໍເລີ່ມກ່າວຫາໂປໂລວ່າ:
“ທ່ານເຟລິກທີ່ນັບຖື ພວກເຮົາມີຄວາມສະຫງົບສຸກຫຼາຍກໍຍ້ອນທ່ານ ແລະປະເທດຊາດຂອງພວກເຮົາພັດທະນາຂຶ້ນກໍຍ້ອນທ່ານເບິ່ງການໄກ.
3 ພວກເຮົາທຸກຄົນບໍ່ວ່າຢູ່ໃສກໍຮູ້ສຶກຂອບໃຈຫຼາຍສຳລັບສິ່ງຕ່າງໆທີ່ທ່ານໄດ້ເຮັດເພື່ອພວກເຮົາມາຕະຫຼອດ.
4 ຂ້ອຍບໍ່ຢາກລົບກວນເວລາທ່ານຫຼາຍກວ່ານີ້ ຂ້ອຍຂໍເວົ້າສັ້ນໆ. ຂໍໃຫ້ທ່ານອົດທົນຟັງຂ້ອຍ.
5 ພວກເຮົາເຫັນວ່າຜູ້ຊາຍຄົນນີ້ເປັນຄົນສ້າງບັນຫາ+ທີ່ປຸກລະດົມ+ຄົນຢິວຢູ່ທຸກບ່ອນ.* ລາວເປັນຫົວໜ້າຂອງນິກາຍທີ່ຊື່ ‘ຄົນນາຊາເຣັດ’+
6 ແລະເຮັດສິ່ງທີ່ລົບລູ່ວິຫານນຳອີກ ພວກເຮົາຈຶ່ງຈັບລາວໄວ້.+
7 *——
8 ຂໍໃຫ້ທ່ານສອບສວນລາວເອງ ແລ້ວທ່ານຈະໄດ້ຮູ້ວ່າເລື່ອງທັງໝົດທີ່ພວກເຮົາຟ້ອງລາວນັ້ນເປັນຄວາມຈິງ.”
9 ພວກຢິວກໍຮ່ວມກ່າວຫາໂປໂລຄືກັນໂດຍຢືນຢັນວ່າເລື່ອງທີ່ຟ້ອງໂປໂລເປັນຄວາມຈິງ.
10 ເມື່ອເຈົ້າແຂວງງຶກຫົວໃສ່ໂປໂລ ໂປໂລກໍເວົ້າວ່າ:
“ເນື່ອງຈາກຂ້ອຍຮູ້ດີວ່າທ່ານເປັນຜູ້ພິພາກສາໃຫ້ຊາດນີ້ມາຫຼາຍປີແລ້ວ ຂ້ອຍຈຶ່ງດີໃຈທີ່ໄດ້ເວົ້າແກ້ຄະດີຂອງຂ້ອຍຕໍ່ໜ້າທ່ານ.+
11 ຕັ້ງແຕ່ຂ້ອຍໄປນະມັດສະການຢູ່ເມືອງເຢຣູຊາເລັມຈົນຮອດຕອນນີ້ກໍຍັງບໍ່ກາຍ 12 ມື້.+ ຖ້າທ່ານຢາກຮູ້ຄວາມຈິງ ທ່ານກໍຖາມເບິ່ງໄດ້.
12 ເຂົາເຈົ້າບໍ່ເຄີຍເຫັນຂ້ອຍຖຽງກັບຜູ້ໃດຢູ່ວິຫານ ຫຼືປຸກລະດົມຜູ້ໃດໃຫ້ກໍ່ຄວາມວຸ່ນວາຍ ບໍ່ວ່າຢູ່ໃນບ່ອນປະຊຸມຂອງເຂົາເຈົ້າຫຼືຢູ່ບ່ອນອື່ນໆໃນເມືອງ.
13 ຈົນຮອດຕອນນີ້ ເຂົາເຈົ້າກໍບໍ່ມີຫຼັກຖານທີ່ພິສູດໃຫ້ທ່ານເຫັນວ່າຂ້ອຍເຮັດຜິດຕາມທີ່ເຂົາເຈົ້າກ່າວຫາ.
14 ແຕ່ຂ້ອຍຍອມຮັບເລື່ອງໜຶ່ງ. ຂ້ອຍເຮັດວຽກຮັບໃຊ້ທີ່ສັກສິດໃຫ້ພະເຈົ້າຂອງປູ່ຍ່າຕານາຍຂອງຂ້ອຍ+ຕາມແນວທາງທີ່ເຂົາເຈົ້າເອີ້ນວ່ານິກາຍໜຶ່ງ ຍ້ອນຂ້ອຍເຊື່ອທຸກສິ່ງທີ່ຂຽນໄວ້ໃນກົດໝາຍຂອງໂມເຊແລະໃນຄຳສອນຂອງພວກຜູ້ພະຍາກອນ.*+
15 ຂ້ອຍມີຄວາມຫວັງໃນພະເຈົ້າຄືກັບທີ່ເຂົາເຈົ້າມີ. ຄວາມຫວັງຂອງຂ້ອຍແມ່ນທັງຄົນດີແລະຄົນຊົ່ວ+ຈະຄືນມາຈາກຕາຍ.+
16 ຂ້ອຍພະຍາຍາມຕະຫຼອດທີ່ຈະບໍ່ເຮັດຜິດຕໍ່ພະເຈົ້າຫຼືຕໍ່ມະນຸດ ເພື່ອຈະບໍ່ມີຫຍັງລົບກວນໃຈຮູ້ຜິດຮູ້ຖືກຂອງຂ້ອຍ.+
17 ຫຼັງຈາກທີ່ຂ້ອຍບໍ່ຢູ່ເມືອງເຢຣູຊາເລັມຫຼາຍປີ ຂ້ອຍກໍກັບໄປຫັ້ນເພື່ອເອົາເງິນໄປຊ່ວຍ+ຄົນໃນຊາດຂອງຂ້ອຍແລະເອົາເຄື່ອງບູຊາໄປໃຫ້ພະເຈົ້າ.
18 ຕອນທີ່ກຳລັງເຮັດແບບນັ້ນ ພວກຢິວກໍເຫັນຂ້ອຍຢູ່ວິຫານຫຼັງຈາກທີ່ເຮັດໃຫ້ໂຕເອງສະອາດຕາມພິທີກຳ.+ ຂ້ອຍບໍ່ໄດ້ຢູ່ກັບຄົນກຸ່ມໃຫຍ່ຫຼືກໍ່ຄວາມວຸ່ນວາຍຫຍັງເລີຍ. ຕອນນັ້ນ ຄົນຢິວບາງຄົນຈາກແຂວງອາຊີ*ກໍຢູ່ຫັ້ນຄືກັນ.
19 ຖ້າພວກນັ້ນມີຫຍັງຈະກ່າວຫາຂ້ອຍ ເຂົາເຈົ້າກໍຄວນຈະມາຟ້ອງຂ້ອຍຕໍ່ໜ້າທ່ານມື້ນີ້.+
20 ຄັນບໍ່ຊັ້ນກໍໃຫ້ຄົນທີ່ຢູ່ນີ້ບອກມາວ່າຂ້ອຍເຮັດຫຍັງຜິດຕອນທີ່ຂ້ອຍຢືນຢູ່ຕໍ່ໜ້າສານຊັນເຮດຣິນ.
21 ມີແຕ່ເລື່ອງດຽວທີ່ເຂົາເຈົ້າຈະກ່າວຫາຂ້ອຍໄດ້ກໍແມ່ນຕອນທີ່ຢືນຢູ່ກາງສານ ຂ້ອຍຮ້ອງຂຶ້ນວ່າ ‘ຂ້ອຍຖືກຕັດສິນຄະດີຕໍ່ໜ້າພວກເຈົ້າໃນມື້ນີ້ກໍຍ້ອນເລື່ອງການຄືນມາຈາກຕາຍ.’”+
22 ເຟລິກຮູ້ດີກ່ຽວກັບເລື່ອງທາງນັ້ນ*+ ລາວຈຶ່ງໃຫ້ເລື່ອນການພິຈາລະນາອອກໄປກ່ອນແລະເວົ້າວ່າ: “ຂ້ອຍຈະຕັດສິນຄະດີຂອງພວກເຈົ້າຕອນທີ່ນາຍພັນລີເຊຍມາຮອດ.”
23 ແລ້ວເຟລິກກໍສັ່ງນາຍຮ້ອຍໃຫ້ຂັງໂປໂລໄວ້ ແຕ່ໃຫ້ມີອິດສະຫຼະຢູ່ແດ່ ແລະສັ່ງວ່າບໍ່ຕ້ອງຫ້າມຖ້າມີພວກຂອງໂປໂລມາເບິ່ງແຍງລາວ.
24 ບໍ່ເທົ່າໃດມື້ຕໍ່ມາ ເຟລິກມາກັບເມຍທີ່ຊື່ດູຊີນລາທີ່ເປັນຄົນຢິວ. ເຟລິກໃຫ້ຄົນໄປເອີ້ນໂປໂລມາເພື່ອຈະໄດ້ຟັງໂປໂລເວົ້າເຖິງຄວາມເຊື່ອເລື່ອງພະຄລິດເຢຊູ.+
25 ແຕ່ເມື່ອໂປໂລເວົ້າເຖິງເລື່ອງການເຮັດສິ່ງທີ່ຖືກຕ້ອງ ການຮູ້ຈັກຄວບຄຸມໂຕເອງ ແລະການຕັດສິນທີ່ຈະເກີດຂຶ້ນ+ ເຟລິກກໍຢ້ານແລະບອກວ່າ: “ຕອນນີ້ ເຈົ້າໄປໄດ້ແລ້ວ. ຖ້າມີໂອກາດຂ້ອຍຈະເອີ້ນເຈົ້າມາອີກ.”
26 ທີ່ຈິງ ເຟລິກຫວັງວ່າຈະໄດ້ເງິນຈາກໂປໂລ ລາວຈຶ່ງເອີ້ນໂປໂລມາລົມນຳເລື້ອຍໆ.
27 ແຕ່ເຟລິກຍັງໃຫ້ໂປໂລຢູ່ໃນຄຸກຕໍ່ໄປຍ້ອນຢາກເອົາໃຈຄົນຢິວ.+ ສອງປີຜ່ານໄປ ໂປກີໂອເຟຊະໂຕກໍມາຮັບຕຳແໜ່ງຕໍ່ຈາກເຟລິກ.
ຂໍ
^ ຫຼື “ທົ່ວໂລກ”
^ “ກົດໝາຍຂອງໂມເຊແລະໃນຄຳສອນຂອງພວກຜູ້ພະຍາກອນ” ໃນນີ້ໝາຍເຖິງພະຄຳພີພາກພາສາເຮັບເຣີທັງໝົດ
^ ແຂວງໜຶ່ງຂອງຈັກກະວັດໂຣມ
^ ໝາຍເຖິງແນວທາງຊີວິດແລະຄຳສອນຂອງຄລິດສະຕຽນ
