ກິດຈະການຂອງອັກຄະສາວົກ 3:1-26
3 ມີມື້ໜຶ່ງ ຕອນບ່າຍ 3 ໂມງ*ເຊິ່ງເປັນເວລາສຳລັບອະທິດຖານ ເປໂຕກັບໂຢຮັນໄດ້ເຂົ້າໄປໃນວິຫານ.
2 ມີຄົນຫາມຜູ້ຊາຍຄົນໜຶ່ງທີ່ເປັນລ່ອຍຕັ້ງແຕ່ເກີດມາປະໄວ້ໃກ້ປະຕູວິຫານທີ່ຄົນເອີ້ນວ່າປະຕູງາມ. ເຂົາເຈົ້າເຮັດແບບນີ້ທຸກມື້ເພື່ອໃຫ້ຄົນເປັນລ່ອຍຄົນນັ້ນຂໍທານນຳຄົນທີ່ເຂົ້າໄປໃນວິຫານ.
3 ເມື່ອຄົນທີ່ເປັນລ່ອຍເຫັນເປໂຕກັບໂຢຮັນກຳລັງຈະເຂົ້າໄປໃນວິຫານ ລາວກໍຂໍທານນຳ 2 ຄົນນີ້.
4 ເປໂຕກັບໂຢຮັນແນມເບິ່ງລາວ ແລ້ວເປໂຕກໍເວົ້າວ່າ: “ແນມເບິ່ງພວກເຮົາແມ້.”
5 ລາວກໍແນມເບິ່ງທັງສອງຄົນແລະຄິດວ່າຄືຊິໄດ້ບາງຢ່າງນຳເຂົາເຈົ້າ.
6 ແຕ່ເປໂຕເວົ້າວ່າ: “ເງິນຄຳຫັ້ນຂ້ອຍບໍ່ມີດອກ ແຕ່ຂ້ອຍມີແນວອື່ນຊິໃຫ້. ໃນນາມຂອງພະເຢຊູຄລິດຄົນນາຊາເຣັດ ໃຫ້ເຈົ້າລຸກຂຶ້ນແລະຍ່າງໄປ!”+
7 ແລ້ວເປໂຕກໍຈັບມືເບື້ອງຂວາຂອງຄົນທີ່ເປັນລ່ອຍແລະໂຈມລາວລຸກຂຶ້ນ.+ ຕີນແລະຂໍ້ຕີນຂອງລາວກໍມີແຮງຂຶ້ນມາທັນທີ.+
8 ແລ້ວລາວກໍໂດດເຕັ້ນ+ແລະຍ່າງເຂົ້າໄປໃນວິຫານກັບ 2 ຄົນນັ້ນ. ລາວທັງໂດດທັງເຕັ້ນພ້ອມກັບສັນລະເສີນພະເຈົ້າ.
9 ເມື່ອທຸກຄົນທີ່ຢູ່ຫັ້ນເຫັນລາວທັງຍ່າງທັງສັນລະເສີນພະເຈົ້າໄປນຳ
10 ເຂົາເຈົ້າກໍເລີ່ມຈື່ໄດ້ວ່າຜູ້ນີ້ເຄີຍນັ່ງຂໍທານຢູ່ປະຕູງາມຂອງວິຫານ.+ ເຂົາເຈົ້າຈຶ່ງຮູ້ສຶກງຶດແລະຕື່ນເຕັ້ນຫຼາຍແທ້ໆໃນສິ່ງທີ່ເກີດຂຶ້ນກັບຂໍທານຜູ້ນີ້.
11 ຕອນທີ່ຜູ້ຊາຍຄົນນີ້ຍັງຈັບມືເປໂຕກັບໂຢຮັນຢູ່ ທຸກຄົນທີ່ຢູ່ຫັ້ນກໍແປກໃຈຫຼາຍແລະແລ່ນມາຫາເຂົາເຈົ້າຢູ່ຕາມທາງຍ່າງທີ່ມີເສົາລຽນກັນທີ່ໂຊໂລໂມນໄດ້ສ້າງໄວ້.+
12 ເມື່ອເປໂຕເຫັນແບບນັ້ນກໍເວົ້າກັບເຂົາເຈົ້າວ່າ: “ຄົນອິດສະຣາເອນເອີ້ຍ ເປັນຫຍັງຈຶ່ງແປກໃຈ? ເປັນຫຍັງແນມເບິ່ງພວກເຮົາຄືກັບວ່າພວກເຮົາເປັນຄົນເຮັດໃຫ້ລາວຍ່າງໄດ້ດ້ວຍອຳນາດຂອງພວກເຮົາເອງ ຫຼືເປັນຍ້ອນພວກເຮົາຮັບໃຊ້ພະເຈົ້າສຸດຫົວໃຈ?
13 ຕອນນີ້ ພະເຈົ້າຂອງປູ່ຍ່າຕານາຍຂອງພວກເຮົາທີ່ເປັນພະເຈົ້າຂອງອັບຣາຮາມ ອີຊາກ ແລະຢາໂຄບ+ໄດ້ຍົກຖານະຂອງພະເຢຊູແລ້ວ.+ ເພິ່ນເປັນຜູ້ຮັບໃຊ້ຂອງພະເຈົ້າ+ຜູ້ທີ່ພວກເຈົ້າບໍ່ຍອມຮັບແລະສົ່ງໄປໃຫ້ປີລາດຂ້າ+ ທັງໆທີ່ລາວຕັດສິນໃຈຈະປ່ອຍເພິ່ນ.
14 ພວກເຈົ້າປະຕິເສດພະເຢຊູທີ່ເປັນຜູ້ບໍລິສຸດແລະເປັນຄົນທີ່ເຊື່ອຟັງພະເຈົ້າ* ແລະຂໍໃຫ້ປ່ອຍຄົນທີ່ຂ້າຄົນແທນ.+
15 ພວກເຈົ້າຂ້າຜູ້ນຳຄົນສຳຄັນທີ່ໃຫ້ຊີວິດ+ ແຕ່ພະເຈົ້າປຸກເພິ່ນໃຫ້ຄືນມາຈາກຕາຍ. ພວກເຮົາເປັນພະຍານຮູ້ເຫັນເລື່ອງນີ້.+
16 ຄົນເປັນລ່ອຍຜູ້ນີ້ທີ່ພວກເຈົ້າຮູ້ຈັກມີແຮງຂຶ້ນມາຍ້ອນຊື່ຂອງເພິ່ນຜູ້ນີ້ແລະຍ້ອນພວກເຮົາເຊື່ອໃນເພິ່ນ.* ຄວາມເຊື່ອທີ່ເຮົາມີໂດຍທາງເພິ່ນນີ້ແຫຼະເຮັດໃຫ້ຜູ້ຊາຍຄົນນີ້ດີເປັນປົກກະຕິແບບທີ່ພວກເຈົ້າທຸກຄົນເຫັນ.
17 ພີ່ນ້ອງເອີ້ຍ ຂ້ອຍຮູ້ວ່າພວກເຈົ້າເຮັດແບບນັ້ນຍ້ອນບໍ່ຮູ້ວ່າພະເຢຊູແມ່ນໃຜ+ ຄືກັບທີ່ພວກຜູ້ນຳຂອງພວກເຈົ້າກໍບໍ່ຮູ້ແລະເຮັດຄືກັນ.+
18 ແຕ່ພະເຈົ້າຍອມໃຫ້ສິ່ງນັ້ນເກີດຂຶ້ນກໍເພື່ອໃຫ້ເປັນໄປຕາມທີ່ເພິ່ນບອກໄວ້ລ່ວງໜ້າຜ່ານທາງພວກຜູ້ພະຍາກອນຂອງເພິ່ນທີ່ວ່າ ພະຄລິດທີ່ເພິ່ນສົ່ງມານັ້ນຈະຕ້ອງທົນທຸກທໍລະມານ.+
19 ດັ່ງນັ້ນ ໃຫ້ກັບໃຈ+ແລະປ່ຽນແປງຊີວິດໃໝ່*+ເພື່ອຄວາມຜິດຂອງພວກເຈົ້າຈະຖືກລົບລ້າງ+ ແລ້ວຈາກນີ້ໄປພວກເຈົ້າຈະໄດ້ຮັບຄວາມສົດຊື່ນຈາກພະເຢໂຫວາ*
20 ແລະເພິ່ນຈະສົ່ງພະຄລິດມາເຊິ່ງເປັນຜູ້ທີ່ເພິ່ນແຕ່ງຕັ້ງໄວ້ເພື່ອພວກເຈົ້າ. ຜູ້ນັ້ນແມ່ນພະເຢຊູ.
21 ເພິ່ນຕ້ອງຢູ່ໃນສະຫວັນຈົນຮອດຕອນທີ່ທຸກສິ່ງຈະໄດ້ຮັບການຟື້ນຟູ ເຊິ່ງເປັນໄປຕາມທີ່ພະເຈົ້າບອກໄວ້ຜ່ານທາງພວກຜູ້ພະຍາກອນທີ່ສັດຊື່ຂອງເພິ່ນຕັ້ງແຕ່ສະໄໝບູຮານ.
22 ໂມເຊກໍບອກໄວ້ວ່າ ‘ພະເຢໂຫວາ*ພະເຈົ້າຂອງພວກເຈົ້າຈະແຕ່ງຕັ້ງຄົນໜຶ່ງໃນພວກເຈົ້າໃຫ້ເປັນຜູ້ພະຍາກອນຄືກັບຂ້ອຍ.+ ພວກເຈົ້າຕ້ອງຟັງທຸກສິ່ງທີ່ລາວບອກ.+
23 ຜູ້ທີ່ບໍ່ຍອມຟັງຜູ້ພະຍາກອນຄົນນັ້ນຈະຖືກທຳລາຍໃຫ້ດັບສູນໄປຈາກປະຊາຊົນຂອງພະເຈົ້າ.’+
24 ຜູ້ພະຍາກອນທຸກຄົນນັບຕັ້ງແຕ່ຊາມູເອນເປັນຕົ້ນມາກໍບອກເລື່ອງນີ້*ໄວ້ຄືກັນ.+
25 ພວກເຈົ້າເປັນລູກຫຼານຂອງພວກຜູ້ພະຍາກອນ ແລະເປັນລູກຫຼານຕາມສັນຍາທີ່ພະເຈົ້າເຮັດໄວ້ນຳປູ່ຍ່າຕານາຍຂອງພວກເຈົ້າ.+ ເພິ່ນເວົ້າກັບອັບຣາຮາມວ່າ ‘ທຸກຄອບຄົວຈະໄດ້ຮັບພອນໂດຍທາງລູກຫຼານຂອງເຈົ້າ.’+
26 ເມື່ອພະເຈົ້າແຕ່ງຕັ້ງຜູ້ຮັບໃຊ້ຄົນນັ້ນຂອງເພິ່ນແລ້ວ ເພິ່ນກໍສົ່ງລາວມາຫາພວກເຈົ້າກ່ອນ+ເພື່ອປະໂຫຍດຂອງພວກເຈົ້າ ໂດຍໃຫ້ພວກເຈົ້າແຕ່ລະຄົນຖິ້ມຄວາມຊົ່ວ.”
ຂໍ
^ ແປຕາມໂຕວ່າ “ຊົ່ວໂມງທີ 9”
^ ຫຼື “ຄົນທີ່ເຮັດສິ່ງທີ່ຖືກຕ້ອງ”
^ ແປຕາມໂຕວ່າ “ເຊື່ອໃນຊື່ເພິ່ນ”
^ ແປຕາມໂຕວ່າ “ຫັນກັບ”
^ ເບິ່ງພາກຜະໜວກ ກ5
^ ເບິ່ງພາກຜະໜວກ ກ5
^ ຫຼື “ບອກກ່ຽວກັບສະໄໝນີ້”
