ກິດຈະການຂອງອັກຄະສາວົກ 6:1-15
6 ໃນໄລຍະນັ້ນພວກລູກສິດມີຫຼາຍຂຶ້ນເລື້ອຍໆ. ມີເທື່ອໜຶ່ງ ລູກສິດຄົນຢິວທີ່ເວົ້າພາສາກຣີກໄດ້ຈົ່ມໃຫ້ລູກສິດຄົນຢິວທີ່ເວົ້າພາສາເຮັບເຣີ ຍ້ອນພວກແມ່ໝ້າຍທີ່ເວົ້າພາສາກຣີກບໍ່ໄດ້ຮັບການເອົາໃຈໃສ່ໃນການແຈກຢາຍຂອງກິນແຕ່ລະມື້.+
2 ອັກຄະສາວົກ* 12 ຄົນຈຶ່ງເອີ້ນພວກລູກສິດທັງໝົດມາປະຊຸມກັນແລ້ວເວົ້າວ່າ: “ພວກເຮົາຊິປະການສອນຄຳສອນຂອງພະເຈົ້າ ແລ້ວໄປແຈກຢາຍຂອງກິນ ມັນກະບໍ່ແມ່ນແນວເຮັດຕີ້.+
3 ດັ່ງນັ້ນ ພີ່ນ້ອງເອີ້ຍ ໃຫ້ເລືອກຜູ້ຊາຍ 7 ຄົນໃນພວກເຈົ້າທີ່ມີຊື່ສຽງດີ+ທີ່ໄດ້ຮັບພະລັງຂອງພະເຈົ້າແລະມີສະຕິປັນຍາ+ ແລ້ວພວກເຮົາຈະແຕ່ງຕັ້ງເຂົາເຈົ້າໃຫ້ເບິ່ງແຍງວຽກທີ່ຈຳເປັນນີ້.+
4 ພວກເຮົາຈະໄດ້ທຸ່ມເທໂຕໃນການອະທິດຖານແລະສອນຄຳສອນຂອງພະເຈົ້າ.”
5 ໝົດທຸກຄົນກໍເຫັນດີກັບຂໍ້ສະເໜີນີ້ ເຂົາເຈົ້າຈຶ່ງເລືອກຊະເຕຟາໂນເຊິ່ງເປັນຄົນທີ່ມີຄວາມເຊື່ອເຂັ້ມແຂງແລະໄດ້ຮັບພະລັງບໍລິສຸດ ແລະເລືອກຟີລິບ+ ໂປຣໂຄໂຣ ນີກາໂນ ຕີໂມນ ປາເມນາ ແລະນີໂກລາໂອຄົນເມືອງອັນຕີໂອເຂຍທີ່ເຄີຍເຂົ້າສາສະໜາຢິວ.
6 ແລ້ວເຂົາເຈົ້າໃຫ້ 7 ຄົນນັ້ນມາຢູ່ຕໍ່ໜ້າພວກອັກຄະສາວົກ. ເມື່ອພວກອັກຄະສາວົກອະທິດຖານແລ້ວກໍວາງມືເທິງເຂົາເຈົ້າ.+
7 ຜົນກໍຄືຄຳສອນຂອງພະເຈົ້າແພ່ອອກໄປ+ ພວກລູກສິດມີຫຼາຍຂຶ້ນເລື້ອຍໆ+ໃນເມືອງເຢຣູຊາເລັມ ແລະມີປະໂລຫິດກຸ່ມໃຫຍ່ເຂົ້າມາເຊື່ອຖືຄືກັນ.+
8 ມີລູກສິດຜູ້ໜຶ່ງຊື່ຊະເຕຟາໂນທີ່ພະເຈົ້າພໍໃຈຫຼາຍແລະລາວໄດ້ຮັບພະລັງຈາກເພິ່ນ. ລາວເຮັດການອັດສະຈັນແລະສະແດງປາຕິຫານຫຼາຍຢ່າງຕໍ່ໜ້າປະຊາຊົນ.
9 ມີບາງຄົນມາຖຽງກັບຊະເຕຟາໂນ. ບາງຄົນໃນພວກນີ້ມາຈາກກຸ່ມທີ່ຄົນເອີ້ນວ່າ “ທາດທີ່ໄດ້ຮັບອິດສະຫຼະ” ບາງຄົນມາຈາກກີເຣເນແລະອາເລັກຊັນເດຍ ບາງຄົນມາຈາກກີລີເກຍແລະແຂວງອາຊີ.*
10 ແຕ່ພວກນີ້ບໍ່ສາມາດຫັກລ້າງຄຳເວົ້າຂອງຊະເຕຟາໂນໄດ້ ຍ້ອນລາວເວົ້າດ້ວຍສະຕິປັນຍາແລະພະລັງຈາກພະເຈົ້າ.+
11 ພວກນີ້ກໍເລີຍໄປຍົວະບາງຄົນແບບລັບໆໃຫ້ເວົ້າວ່າ: “ພວກເຮົາໄດ້ຍິນຜູ້ນີ້ເວົ້າໝິ່ນປະໝາດໂມເຊແລະພະເຈົ້າ.”
12 ເຂົາເຈົ້າໄດ້ຍົວະປະຊາຊົນ ພວກຜູ້ນຳ ແລະພວກຄູສອນສາສະໜາໃຫ້ມາຈັບຊະເຕຟາໂນໄປຂຶ້ນສານຊັນເຮດຣິນ.
13 ເຂົາເຈົ້າເອົາພະຍານຕົວະມາໃຫ້ການວ່າ: “ຜູ້ນີ້ເວົ້າໝິ່ນປະໝາດບ່ອນບໍລິສຸດນີ້ແລະໝິ່ນປະໝາດກົດໝາຍຂອງໂມເຊນຳ.
14 ພວກເຮົາໄດ້ຍິນລາວເວົ້າວ່າ ເຢຊູຄົນນາຊາເຣັດຜູ້ນັ້ນຈະທຳລາຍບ່ອນທີ່ສັກສິດນີ້ ແລະຈະປ່ຽນທຳນຽມທີ່ພວກເຮົາໄດ້ຮັບສືບທອດມາຈາກໂມເຊ.”
15 ທຸກຄົນທີ່ຢູ່ໃນສານຊັນເຮດຣິນກໍແນມໄປເບິ່ງຊະເຕຟາໂນ ແລະເຫັນວ່າໜ້າຂອງລາວສະຫງົບຄືກັບໜ້າທູດສະຫວັນ.