ຈົດເຊັນບັນຊີ 27:1-23
27 ພວກລູກສາວຂອງເຊໂລເຟຂາດ+ໄດ້ມາຫາໂມເຊ. ເຊໂລເຟຂາດເປັນລູກຊາຍຂອງເຮເຟ ເຮເຟເປັນລູກຊາຍຂອງກິລຽດ ກິລຽດເປັນລູກຊາຍຂອງມາກີ ມາກີເປັນລູກຊາຍຂອງມານາເຊ. ຄົນເຫຼົ່ານີ້ຢູ່ໃນຕະກູນມານາເຊທີ່ເປັນລູກຊາຍຂອງໂຢເຊັບ. ພວກລູກສາວຂອງເຊໂລເຟຂາດຊື່ ມາລາ ໂນອາ ໂຮກລາ ມີລະກາ ແລະຕີຣະຊາ.
2 ເຂົາເຈົ້າມາຢືນຢູ່ທາງເຂົ້າເຕັ້ນຂໍການຊີ້ນຳຕໍ່ໜ້າໂມເຊ ປະໂລຫິດເອເລອາຊາ ພວກຜູ້ນຳຂອງອິດສະຣາເອນ+ ແລະພວກອິດສະຣາເອນ. ເຂົາເຈົ້າເວົ້າວ່າ:
3 “ພໍ່ຂອງພວກເຮົາຕາຍຢູ່ໃນບ່ອນກັນດານ ແຕ່ພໍ່ບໍ່ໄດ້ຢູ່ນຳພວກຂອງໂກຣາ+ທີ່ຕໍ່ຕ້ານພະເຢໂຫວາ. ພໍ່ຕາຍຍ້ອນບາບຂອງພໍ່ເອງ ແລະພໍ່ບໍ່ມີລູກຊາຍຈັກຄົນ.
4 ຍ້ອນພໍ່ຂອງພວກເຮົາບໍ່ມີລູກຊາຍ ຊື່ຂອງພໍ່ກໍຊິຖືກລຶບອອກຈາກຕະກູນເລີຍບໍ? ຂໍໃຫ້ພວກເຮົາໄດ້ດິນມູນນຳກັນກັບພວກອ້າຍນ້ອງຂອງພໍ່ເຮົາໄດ້ບໍ?”
5 ໂມເຊຈຶ່ງໄປຖາມພະເຢໂຫວາກ່ຽວກັບເລື່ອງນີ້.+
6 ພະເຢໂຫວາບອກໂມເຊວ່າ:
7 “ພວກລູກສາວຂອງເຊໂລເຟຂາດເວົ້າຖືກແລ້ວ. ເຈົ້າຕ້ອງໃຫ້ເຂົາເຈົ້າໄດ້ດິນມູນນຳກັນກັບອ້າຍນ້ອງຂອງພໍ່ເຂົາເຈົ້າ. ໃຫ້ຍົກດິນມູນຂອງພໍ່ເຂົາເຈົ້າໃຫ້ເຂົາເຈົ້າ+
8 ແລະໃຫ້ບອກພວກອິດສະຣາເອນວ່າ ‘ຖ້າຜູ້ຊາຍຄົນໃດຕາຍແລະບໍ່ມີລູກຊາຍ ໃຫ້ຍົກດິນມູນຂອງລາວໃຫ້ລູກສາວ.
9 ຖ້າລາວບໍ່ມີລູກສາວ ໃຫ້ຍົກດິນມູນໃຫ້ອ້າຍຫຼືນ້ອງຊາຍຂອງລາວ.
10 ຖ້າລາວບໍ່ມີອ້າຍຫຼືນ້ອງຊາຍ ໃຫ້ຍົກດິນມູນໃຫ້ລຸງຫຼືອາວຂອງລາວ.
11 ຖ້າລາວບໍ່ມີລຸງຫຼືອາວ ກໍໃຫ້ຍົກດິນມູນໃຫ້ພີ່ນ້ອງທີ່ໃກ້ຊິດທີ່ສຸດທີ່ເປັນສາຍເລືອດດຽວກັນໃນຕະກູນຂອງລາວ. ຜູ້ນັ້ນຈະໄດ້ຮັບດິນມູນຂອງຄົນທີ່ຕາຍ. ນີ້ເປັນກົດໝາຍສຳລັບພວກອິດສະຣາເອນຕາມທີ່ພະເຢໂຫວາໄດ້ສັ່ງໂມເຊ.’”
12 ພະເຢໂຫວາເວົ້າກັບໂມເຊວ່າ: “ໃຫ້ເຈົ້າຂຶ້ນໄປເທິງພູນີ້ທີ່ຢູ່ໃນເຂດອາບາຣີມ+ ແລະເບິ່ງແຜ່ນດິນທີ່ເຮົາຈະເອົາໃຫ້ພວກອິດສະຣາເອນ.+
13 ເມື່ອເຈົ້າໄດ້ເຫັນແຜ່ນດິນນັ້ນແລ້ວ ເຈົ້າຈະຕາຍແລະໄປຢູ່ນຳປູ່ຍ່າຕານາຍ*+ຄືກັບອາໂຣນອ້າຍຂອງເຈົ້າ.+
14 ຍ້ອນຕອນທີ່ພວກອິດສະຣາເອນໄດ້ຖຽງເຮົາຢູ່ບ່ອນກັນດານຊິນ ເຈົ້າບໍ່ໄດ້ເຊື່ອຟັງຄຳສັ່ງຂອງເຮົາ ແລະບໍ່ໄດ້ໃຫ້ກຽດເຮົາຕອນທີ່ເຮົາເອົານ້ຳໃຫ້ເຂົາເຈົ້າ.+ ນ້ຳນັ້ນຢູ່ເມຣິບາ+ທີ່ຢູ່ກາເດັດ+ໃນບ່ອນກັນດານຊິນ.”+
15 ໂມເຊເວົ້າກັບພະເຢໂຫວາວ່າ:
16 “ຂໍໃຫ້ພະເຢໂຫວາພະເຈົ້າຜູ້ໃຫ້ຊີວິດທຸກຄົນແຕ່ງຕັ້ງຜູ້ໜຶ່ງໃຫ້ເບິ່ງແຍງພວກອິດສະຣາເອນ.
17 ໃຫ້ຜູ້ນັ້ນເປັນຜູ້ນຳໜ້າແລະຊີ້ນຳເຂົາເຈົ້າໃນທຸກເລື່ອງ ເພື່ອຄົນຂອງພະເຢໂຫວາຈະບໍ່ໄດ້ເປັນຄືກັບແກະທີ່ບໍ່ມີຜູ້ລ້ຽງ.”
18 ພະເຢໂຫວາກໍເລີຍເວົ້າກັບໂມເຊວ່າ: “ໃຫ້ເຈົ້າວາງມືເທິງຫົວໂຢຊວຍລູກຊາຍຂອງນູນ ຍ້ອນລາວເປັນຄົນທີ່ມີຄວາມສາມາດ.*+
19 ຈາກນັ້ນ ໃຫ້ລາວໄປຢືນຕໍ່ໜ້າປະໂລຫິດເອເລອາຊາແລະພວກອິດສະຣາເອນ. ເຈົ້າຕ້ອງແຕ່ງຕັ້ງລາວໃຫ້ເປັນຜູ້ນຳຕໍ່ໜ້າທຸກຄົນ.+
20 ເຈົ້າຕ້ອງເຮັດໃຫ້ພວກອິດສະຣາເອນເຫັນວ່າລາວສົມຄວນໄດ້ຮັບຄວາມນັບຖື+ ເພື່ອເຂົາເຈົ້າຈະເຊື່ອຟັງລາວ.+
21 ເມື່ອລາວມີເລື່ອງຢາກຖາມພະເຢໂຫວາ ລາວຕ້ອງໄປຫາປະໂລຫິດເອເລອາຊາ ແລະເອເລອາຊາຈະໃຊ້ອູຣີມ*+ຖາມແທນລາວ ເພື່ອລາວຈະຮູ້ວ່າຕ້ອງເຮັດແນວໃດ. ທຸກຄົນຈະຕ້ອງເຮັດຕາມຄຳສັ່ງຂອງລາວ ທັງໂຕລາວເອງແລະພວກອິດສະຣາເອນທັງໝົດ.”
22 ໂມເຊກໍເຮັດຕາມທີ່ພະເຢໂຫວາສັ່ງ. ລາວພາໂຢຊວຍໄປຢືນຢູ່ຕໍ່ໜ້າປະໂລຫິດເອເລອາຊາແລະພວກອິດສະຣາເອນ.
23 ຈາກນັ້ນກໍວາງມືເທິງຫົວຂອງໂຢຊວຍ ເພື່ອແຕ່ງຕັ້ງລາວໃຫ້ເປັນຜູ້ນຳ+ຕາມທີ່ພະເຢໂຫວາໄດ້ສັ່ງໂມເຊ.+
ຂໍ
^ ເປັນສຳນວນບົດກອນທີ່ໝາຍເຖິງຕາຍ
^ ແປຕາມໂຕວ່າ “ມີຄວາມຄິດທີ່ແຕກຕ່າງ”
^ ເບິ່ງສ່ວນອະທິບາຍຄຳສັບ
